MAZMUR 91 - ALLAH NIHYET MEM TUNGWATU NYA

Allah ya srak ko hagau nye

¹ No di bisau ndam Allah Di Ninyeng Jei Bibor di miya srak ko hagau noni kin no di ya coi Allah Di Sindem Bibor,

² mipai “tuhan e, Nani ne bor ngug mem da kin No di ya srak ko hagau da rin ba, dikuk da bak Na di Allah bidiba dingon com Na.”

³ Allah nyohou na leu mun di buhun di akan tut bi nya kin nsuwer ajar di hwen na.

⁴ Noni nyohou na dem kep nok ha di kieng ninyehei gau nimien bat nya leu binhyepo angwes ngun ba, angon jo nyahan. Noni ba ningon gomti biya srak ko hagau na binok bor ngug mem na cem,

⁵ ser nhyepo adigit tut ninnei rom nya di ilus-lus nyen mem mmun kin yo di isibut di mihwen na mem mpia nicomti,

⁶ kin nsuwer ajar di hwen tungwatu nya mem nidinditi kin yo di isibut nya di ihwen kikep tungwatu nya mem mpia nicomti bu bi.

⁷ Mbro nok gino ibou sribu gom imai biwer nimbiam simiak na lene ibou sribu simnai di igya ttai na cem imai biwer nimbiam lo, nani mporo atug midut bi.

⁸ Tirigi amian ttai na ser lene angat bou ayai him bipia yo di isibut nya itug ndei nimai tu.

⁹ Lewo abibon tuhan nok No di ya srak ko hagau na. tuhan Di Ninyeng Jei Bibor ne bor ngug di anang coi ri.

¹⁰ Gima rino mun di kinei bibor micut igkep na ba, nsuwer ajar hwen ade ig bei nsi nya cem bi.

¹¹ Allah micuk nide malaikati nya leu binhyepo igya ser na bidem ambutti nya hagom.

¹² Yoni isu inda biteu na ba, angwes ngun leu gima amig ndei tigya.

¹³ Mporo asu amig gau mindhe singa kin wou nya. Ningat ne aco kep singa di niten-pos nya kin wou piet nya.

¹⁴ tuhan simbot dat “Miditeu yo di ingon ngakei Da bingwes ngun. Dinyohou yo di indo tut ingonti bipia dinyeng tak kep yok.

¹⁵ Tirigi yahara Da lene dibuhup ighyet. Tirigi mun di buhun cut igkep yok lene Dingat rin bit yok biditeu yok bingwes ngun ba, dikon inyeng cem.”

¹⁶ Disindui sut ba, igyaijo jei bibor biditeu yok leu ide sisar cem.