MAZMUR 80 - ALLAH NIHYET MEM TUNGWATU NYA

Nadi nahara leu binhyepo Allah miteu mben Israel

¹ Doia Asaf mem no di bie tut doia nimpung bit leu nihyet nibikiek Mitou Bakung.

² Na di Gembala di anyohou mben Israel e, ma angig atingou mem nyeni nihyet. Na di abie tut Ade domba nya e, ma antu kep nye. Na di agwam nai kerub nya ei Ade banggo mbrei dip e,

³ ma ando Nanti brei bak keret Efraim kin Benyamin kin Manasye. Ma ando Ade nisindemti binye ba, akwei teu nye leu nyende siceu nya.

⁴ Allah e, ma awin kep nyende nisindemti! Ma angondut nye ba, ateu nye leu nyende siceu nya.

⁵ tuhan Di Sindem Bibor e, anghek tut Ade limwa nya bitut ide nadi di tibim ei yuhui him apig bu i?

⁶ Abindei ba, niyem kep ningon di buhun dem kep nok niyem njita binidut kep niyai nggwei nindig bibor dem kep nok nidut minyei.

⁷ Asindui sut ba, ngkiai nya di ibong ttai nye isrep tut yam drek dip nyende minu di ikwas tut yam dini ba, ipa ndip nye.

⁸ Allah Di Sindem Bibor e, ma awin kep nyende nisindemti. Angondut nye ba, ateu nye leu nyende siceu nya!

⁹ Nyeni ne ba anggur ninjem di ahom leu minu Mesir rin ba, apwoi ba, ambut tut. Tirigi ajji ngkiai nya bingwig leu itimieisi lene ata ba anggur ninjem dima ei mpia dima hanyen.

¹⁰ Atin ei mpia di kei gom ba, ata ba anggur dima eisi leu binhyepo micom nigau ug ei dihyei jou apino nimeng nggrou bikieng kep minu dima nisurti-nipekti.

¹¹ Ninda-nda nya kieng kep nungug tou nya ba, ceu binsip di jei bibor nya cem.

¹² Ninda nya su kikau ug bipek kin Muk Hacan ba, ninggrupti nya diwim kikau ug bipek kin Minyei Efrat nyai cem.

¹³ Allah e, nggon rino anggek ngug di bikrop ttai minu dima i? Nogindini tungwatu nya di injiriek minu dini imbrai ba anggur dima ningat tu.

¹⁴ Niaihim nya item dihyei tut binok timbukti ba, mindhe-ndhe bigbehei nya igyem njita dima bingwig su.

¹⁵ Allah Di Sindem Bibor e, akwei mpu nye hanyen. Angig ayai kep nye leu gwamti ma kwei ba, ateu nye leu nyende siceu nya.

¹⁶ Ateu Ade limwa nya di inok ba anggur ninjem di ata dini kin ba anggur nikioi di asindem tut dini leu binhyepo mui bingwig bi!

¹⁷ Lewo nyende siceu nya iwim ba anggur dima ba, ipindei hagom leu su. Ma angwak mbriu sut yok ba, abindei sar yok bingwig hak ug.

¹⁸ Ma anyohou Ade limwa nya di adimig ei su ba, Ade mben di asindem tut ba, aya srak ko hagau yok.

¹⁹ Leu api miniba ninghim bak Nani bu bi sren. Ma anyohou nye leu binhyepo niyaijo hanyen leu api mininggei sut Na.

²⁰ tuhan Allah Di Sindem Bibor e, ma awin kep nyende nisindemti. Angondut nye ba, ateu nye leu nyende siceu nya cem.