MAZMUR 75 - ALLAH NIHYET MEM TUNGWATU NYA

Allah ne nikei di ninyeng jei

¹ Doia Asaf mem no di bie tut doia nimpung bit leu nihyet nibikiek doia Ma Jicok Tut Au.

² Allah e, nikuk nye biNani. Nipai sigyo biNa ba, nitri tut Ade nibon munti di bibon ninggap leusi nya.

³ Allah pai “Midiba dingon di sren bimbus tungwatu ingonti ei nituti di Danti dikos tut ei su.

⁴ Mbro nok gino dihyeisi dini bitut mun di ninnei tau nuhwap nsi hagom ugwa-kwei lo, midibindei ba, cou dihim nya ngkiem kei.”

⁵ Disok kep yo di ingon jei nya “Ma jikes hon ba, jingon jei bu au.”

⁶ Ma jingon llei-lau ba, jiba jingon di jei bimbrap au.

⁷ Lewo hukum di micut igkep tungwatu nya mikwei leu mpia nipriti kin mpia nicutti bi. Mikwei leu mpia nijjai kin mpia nibiho cem bi.

⁸ Allah rino nikei di mimbus tungwatu nya ingonti a. Noni moom bihi ei bijehei lene mikon bihi ei anai.

⁹ tuhan niggati dem kep mok nibou ndig de di jo nindati. Ba anggur ngei di ten jo mok dimati. Noni hug ningei di joti ei yo di isibut di ibong ei dihyeisi dini hagom insi lene suar idut bingwig.

¹⁰ Noro miditri tut Yakub de Allah kikau bidipai doia nibikon ninyengti bak Noni.

¹¹ Noni midahat yo di isibut ide nisindemti. Noro Noni mikum ei yo di isingat nya ide nisindemti.