MAZMUR 73 - ALLAH NIHYET MEM TUNGWATU NYA

NIMPUNG GI NININGAI MAZMUR KIN DOIA 73–89 tuhan ne Nikei di ningon sren ri

¹ Doia Asaf. Igbit ri! Allah ningon singat tut Nide limwa Israel kin yo di ingon kwes kin yo di ingon gom.

² Noro tut dani ne dingon bos-bos nyen ba, nahanok diba ningon comti ngwig hon nohonti.

³ Lewo dibou dut tut yo di ingon jei nya tirigi dingat bou diyai him bipia yo di isibut nya ibong kei igwam kei.

⁴ Lewo yo dima inggwen bi sren noro isindem ba, inghuisi kwes.

⁵ Mun di buhun bibor cut igkep yok ba, ingon bos-bos nyen noyam kin yo di hiter bi.

⁶ Gima rino indei inggei-nggwangti noyam kin no di ndei miep ba, ijuk ingon mbukti noyam kin sinsun ndok di jei di ijuk.

⁷ Imbukti biam kwei leu ingon bei ba, ibou sibui sut gi igyok ingon gom mem tungwatu nya.

⁸ Ipa ndip tungwatu nya bisimbot biyam tut mun di mbuk. Ingon jeisi bindei ba, igyok ingon gom mem hiter bico kep yok.

⁹ Ighyet wer mpiahi tut Allah ei gwamti leu api ingwes pri gau yo di hiter ba, iba nibisinggreti cuk-cuk nyen yok.

¹⁰ Apino Allah de limwa nya cem iba yoho rok yok bingon jo kep mun di tibim ei yuhui him.

¹¹ Yo di ingon jei pima yok ikan “Allah kan tut siyai munti nya bi. No Di Ninyeng Jei Bibor miba niyai hwen kep singon kanti nya bi.”

¹² Yo di isibut nya ipai nok gima. Ibong kei igwam kei bikum ei ide mun di inyeng tut nya bu bijo ninno.

¹³ Dinyohou dingon kwesti bidimbres danti leu sisar mikui-kausi e?

¹⁴ Allah e, akes mun di buhun ei da dip bikwop njap jei ba, akes hukum ei da dip bikwop mpia tekti.

¹⁵ Gino dani dipai bram yo pima ipaisi lene gima dem kep nok dibakilak amunggwom bat di nijam dini.

¹⁶ Diba dingon srip huk mun di buhun dini noro dingon kiowi niti lewo buhun bibor mem da bibou,

¹⁷ duug coi ug ei Ade Ig ug e. Mpe dima lene dingon dorti tut mun di micut igkep yo di isibut nya.

¹⁸ Leu mporo akes yok bimbut kak puig di dia-diau apino asindui sut ba, icut bisar bingwig.

¹⁹ Imai kros biwer nimbiam.

²⁰ tuhan e, yo di isibut nya idem kep nok mumpriem di kinei bibor di pren hanyen leu ibou ngwakti mem njap bigyoti. Tirigi akiju ba, aya lene yahagom ipror kros bingwig.

²¹ Tirigi dinso-nso nyen ba, dingon dindi ne,

²² dingon mbum ba, dingon kiowi cem apino dinok mindhe ei ayai him.

²³ Mbro nok gima lo, diya kui Na bikwop mmun-njap leu api akrau dinda com bingkiem.

²⁴ Aba apingok dati nya bibie tut da leu api mporo aba anggei sut dati buum da ei ningwigsi.

²⁵ Ditde Allah e, Nangkom ei gwamti ampu da. Ter leu Nani lene disuar tungwatu dihyeisi dini mem gima impu da bi.

²⁶ Mbro nok gino dinghuisi jet bidingon bbwe lo, Na di Allah asindem tut da. Disuar Nani nindig bibor dor njiriek mun nindigsi nya hagom bijo ninno bijo kikau.

²⁷ Jo nibreisi bipia yo di ikes Na ei mitug midut. Mporo abindei sar yo di ingon gom tut Na bi nya.

²⁸ Noro tut dani ne gino diya kui Na di tuhan biditri tut Ade midyai nya ne dingon llei bibor lewo Nani ne mpia di diya coi ri.