MAZMUR 72 - ALLAH NIHYET MEM TUNGWATU NYA

Nadi di ingat mem nibou ndig

¹ Doia Salomo. Allah e, ma angginau nibou ndig tut Ade nikos tutti nya. Akwas angon sren-srausi ndrim hi tut nibou ndig nipmot,

² leu binhyepo ninyeng tak kep Ade limwa nya kin ningon gom ba, ba ningon sren bibon yo di indwau nya cem.

³ Ma asindui sut ba, nyende miai nya ngat ningat di kei bibor lene Ade limwa nya ibong kei igwam kei tug hon ingon srenti.

⁴ Ma abindei ba, nibou ndig ba ningon gom bimbrap gau yo di indwau nya bimpu yo di yuhui mbum nya lene bindei sar yo di igyem hiter nya imuhup cem.

⁵ Ma asindui sut noni kin yo di intun noni him nya ba, inyeng tak kep Ade limwa nya kikau bibou mpia njap kin bed mmun com ninjeng bu bi ug e.

⁶ Asindui sut ba, nibou ndig ninyeng tak kepti noyam kin mpia di but kep miai nya kin biget di mbras kep susti.

⁷ Abindei ba, ningon kwes kin yamti kieng kep tungwatu nya mem nijam di nibou ndig ninyeng tak kep ba, tungwatu nya ibong kei igwam kei kikau ug bipek bed mmun com ninjeng bu bi.

⁸ Ninyeng tak kepti mikieng kep dihyei nisurti-nipekti leu Minyei Efrat kikau ug bipek minu nohon keti.

⁹ Yo di ibong bidem iggum ndigsi mikwei kuk yok binoni ba, nide siceu nya miba ingwak bikik dihyei ei nimig him.

¹⁰ Nibou ndig minu Tarsis kin mios nya mikwei binjei munkwas bak noni. Nibou ndig minu Arab kin Etiopia nya mikwei go belasten binoni.

¹¹ Nibou ndig dihyeisi dini hagom mikwei kuk yok binoni ba, ngkiai nya bidem dihyeisi dini hagom minok awak mem noni.

¹² Lewo noni teu nikinei-kinau di isindem bi nya kin yo di yuhui mbum di yahara noni apino ingwes ngun.

¹³ Noni ngondut yo di inghuisi jet kin yo di ihwap mbum kin yo di indwau nya biteu yok apino ingwes ngun.

¹⁴ Noni pos yok leu yo di isibut nya kin yo di imbuk nya indati lewo yonti njem-nnei bon ninyeng mem noni.

¹⁵ Abindei ba, nibou ndig bong kei gwam kei bijo ninno bijo kikau! Abindei ba, mben Arab injei mas bak noni ba, tungwatu nya ingat nadi tindei noni mem mmun-njap cem. Allah e, ma anjei mun di kei bak noni bijo ninno bijo kikau.

¹⁶ Abindei ba, ig gudan ei nide dihyei nisurti-nipekti hagom mpung tut gandum ba, miai nya ngat ningat mang bibor bidem nungug tou nya hagom. Abindei ba, dihyei bon ninnumti di kei bibor dem kep nok nungug Libanon ninda dip nya. Asindui sut ba, nide limwa nya idigek kep mpia dem kep nok minta di kieng kep dumti.

¹⁷ Abindei ba, tungwatu nya ingon prion ser nibou ndig ninyeng bi sren. Lene nikei-kau-keisi kum eisi kikau mem nijam di mpia njap com nimig. Ma abindei ba, ngkiai nya yahara Allah leu binhyepo Noni minjei mun di kei bak yoni bit leu nok Noni njei mun di kei bak nibou ndig ba, yo dima yahagom ingat nadi tindei ningon llei biborti mem noni.

¹⁸ Jikwei ba, inggei sut tuhan di mben Israel ide Allah! Nongkom bibon mindur di bibon ninggap leusi.

¹⁹ Ma yahagom ikon ninyeng bijo ninno bijo kikau! Abindei ba, nikei-kau-keisi kieng kep dihyei nisurti-nipekti. Ma gima yok hagom pek kep. Igbit ri!

²⁰ Nipas kepti dini ne Daud di Isai nipmot de nadi nohonti ndia ri.