MAZMUR 71 - ALLAH NIHYET MEM TUNGWATU NYA

No di nide njap ug ninno tu ngat nadi

¹ tuhan e, digwam coi anda nsi. Ma asindui sut ba, nimmai kui dati au.

² Ateu da bidingwes ngun lewo angon sren-srau. Angig atingou mem dihyet ba, ateu da bidingwes ngun.

³ Abindei ba, anok nungug tig di digwam coi bidigwam nding eisi. Anok tentara nibousi di dinang coi ba, dingwes ngun ei niti. Nani ne mpia di digwam coi kin mpia di digwam nding ri.

⁴ Ditde Allah e, ateu da bidingwes ngun leu yo di isibut kin yo di ingkek ndok nya inda nsi.

⁵ Lewo diba dingon com Na di tuhan Nangkom he bidiba dingon com Nani habiei leu dipilei kwei tu.

⁶ Dibram kui Na leu nipou kwei bipek ammani kep. Acuon diyaisi habiei leu dimig ngwoi kwei tu. Gima rino dikon anyeng bijo kikau.

⁷ Diyai munti nya ndo bindo di kei bibor bak yo di imang bibor. Lewo aya srak ko hagau dati sindem bibor.

⁸ Dikon anyeng bijo kikau. Ditri tut anyeng di jei biborti ei njap jei.

⁹ Ma acom da nogindini tirigi duug wer andigpoi tu au. Ma akes da ei nogindini tirigi nisindemti ngwig leu da au,

¹⁰ lewo ditde siceu nya yuhum yam nsi mem da. Yo di igyok ingon gom mem gima igyai nimai bida nya igyok ingon gom mem da tu.

¹¹ Ipai biyam “Allah kes no ei su. Jikwei ba, yuhuk noni bikat noni lewo hi di miteu no biningwes ngun bi.”

¹² Allah e, ma aom Na ei minu ting leu da au. Ditde Allah e, abipbur ba, ampu da haninyai.

¹³ Handei kon ba, nimmai kui yo di ikwei hwen da ba, ibisar cem. Handei kon ba, yo di ibingon mem gima duum mun di buhun ingon tai-tai bou ba, tungwatu nya inim kep yok cem.

¹⁴ Noro midiyok dingon mem Na kikau. Midikon anyeng bikum eisi bibor bu.

¹⁵ Miditri tut ayai munti nya di aba angon di sren bibon kin Ade niteu nye leu nimai ndam niyaijo nijepti kikau ei njap jei.

¹⁶ tuhan Allah e, dinggei sut mimbri di kui angkek. Ditri tut angon sren-srausi bidem minu lo, digitri tut mun nyeng hiter bi.

¹⁷ Angginau da habiei dipilei kwei tu. Ba, dipui sut Ade nibon munti nya di bibon ninggap leusi kwei bipek ammani kep.

¹⁸ Allah e, nogindini duug wer andig-ndau bidibou tiei su lo, ma akes da ei au. Noro anyohou da kikau leu binhyepo ditri tut Ade nisindemti kin mimbri di kui angkekti bak ditde nintun him yamti di bram yam nya yahagom.

¹⁹ Allah e, angon sren-srausi kui sur mpia-bbed him. Ade nibon munti nya nindig bibor ba, tou rima noyam kin Nani i?

²⁰ Ayai ninghuisi wei di buhun bibor mang bibor bida noro angkwei mimbri di kui dingkek hanyen bida ba, awin da bidikiju hanyen leu nimai jui cem.

²¹ Mporo abindei bidinyeng jei bibor bu lene agwam ser dingon hanyen bu.

²² Allah e, midiba nggong bikon anyeng lewo angon gom kikau. Israel de Allah di kwes-kwau e, midiba nggong mbrei bikon anyenga.

²³ Diba dingon di llei bibor bimbos-hi-mbos bidibipai doia nibikon anyeng. Diba dingut kin dinnei bipai doia bidingon llei lewo ateu da bidingwes ngun tu.

²⁴ Miditri tut angon sren-srausi ei njap jei lewo yo di ibingon mem ibindei biduum mun di nggruk itug ndei mun di bindei cut yok kin nibindei mmai yok tu.