MAZMUR 7 - ALLAH NIHYET MEM TUNGWATU NYA

Allah ne Nikei di ningon sren ri

¹ Doia Daud nipim bikiekti di pai bak tuhan drek dip Kus di ntun keret Benyamin him niyai munti ri.

² Ditde tuhan Allah e, digwam coi Nani. Ateu da bidingwes ngun. Ayai da leu yo di yuhuk kep da yahagom inda nsi cem.

³ Gi bi ne yo dima inok mindhe singa di ttem da bikri da ug ei nahamti hak leu api briug da bingwig ba, hi dima teu da bidingwes ngun bi.

⁴ Ditde tuhan Allah e, gino dingon koi ba,

⁵ disibut tut disut bat nya bidimbuk tut ditde siceu di ba nitok bida mikui-kausi cem ba, gino diyai nok gima,

⁶ lene asindui sut ba, ditde siceu di iba nitok bida yuhuk da bikat da leu api igyai nimai bida lene ibikes dingut bijo hak ei dihyei ngunti bimbut hak leu.

⁷ tuhan e, aba Ade nigga biborti bikiju ba, ahwen ditde siceu di iba nitok bida ide ningon kui kep dati hak ug. Akiju ba, ampu da lewo Nani rima akes ahyet bak nikei nya.

⁸ Aba ngkiai nya bicom yam ttai Na ba, anyeng di tak kep yokti kwei leu Ade banggo mbrei ei gwamti.

⁹ tuhan e, Nangkom di ambus tungwatu ingonti kan rin ba, akos tut mun di igbit bida. Lewo dibon mun tunggwei hi bi.

¹⁰ Acut yo di isibut nya ibon munti di kinei-kinau leu yok lene ayai ningon di ngkiem bak yo di isingat nya. Lewo Nani ne Allah di ningon sren-srau di kan bidem tungwatu ingonti kin ikan-kan nyenti cem ri.

¹¹ No di nyohou diyaisi rino Allah di teu yo di ingon sren nya bingwes ngun.

¹² Allah ne nikei di ningon sren-srau rin ba, kes hukum ei yo di ibon mun di kinei nya dip bikwop nituti hagom.

^13-14 Gino ikes hon igyai munti di kinei dima bi ne Noni tin ei Nide minggwen ba, biyai nimai biyok. Noni sien Nide singau simeda lene ba tibor bicom bisinei leu api kri Nide tibor di cig-cai bikes ei nihim.

¹⁵ Angat i! yo di isibut nya itin ei ingon kanti di kinei nya. Ikos tut gima ibon mun di mbuk ba, iris mun cem.

¹⁶ Itig jui mem yo di hiter noro yonti icut ei jui dimati hanyen.

¹⁷ Gima rino ide nisibutti dima bindei ba, hukum cut igkep yok hanyen. Yonti ide ningon mbukti hwen bit yok hanyen cem.

¹⁸ Dipai sigyo bak tuhan lewo ningon sren-srau. Diba doia bikon Allah Di Ninyeng Jei Bibor ninyenga.