MAZMUR 69 - ALLAH NIHYET MEM TUNGWATU NYA

Nadi nahara mem gima Allah mpu yok

¹ Doia Daud bit leu nihyet nibikiek Mitou Bakung mem no di bie tut doia nimpung nya.

² Allah e, ateu da bidingwes ngun lewo minyei di su kui sur dikimam tu.

³ Didilleu ug ei dum igkrop di jut biborti lo, tig di nddong hi mem dico dip bi. Midisar ei minyei di jut bibor nijou ba, muk di tti bibor mikot da.

⁴ Dahara ninno apino dinghuisi jet bibor ba, dikimam bok cem. Diyai njep dut drek dip gi dicem kep puig ser akwei mpu dati.

⁵ Yo di ingon mpo tut da mikui-kausi imangti nindig dor njiriek dibou nta nimangti. Yo di isindem bibor ihwen da bisrou da tug hon ighyet di ipai-pai wai. Icuk da bipia suar ditug mun di dipos leu yok bi nya hanyen biyok.

⁶ Allah e, akan bidem tut ditde nitunggweisi nya ba, ditde sisar jo nding leu ayai him bi.

⁷ tuhan Di Sindem Bibor e, ma asindui sut ba, nimmai kui yo di iba ingon com Nani au. Na di mben Israel ide Allah e, ma asindui sut ba, dihyet tigut yo di ikuk yok biNani au!

⁸ Lewo tungwatu nya inim kep da binjei mun nyeng mang bibor kep da drek dip anyenga.

⁹ Dikindig bat-dikinjoi bat nya ibibon da nok ngkiai. Dide bat nya ibibon da noyam kin ibibon yo di hi ter nya.

¹⁰ Dingon ngakei Ade Ig ba, gima nok hum di cig-cai ei dingonti. Nihyet nitigut Nati ndei dani cem dingonti.

¹¹ Ighyet tigut da drek dip gi diba dibou coi mem tungwatu nya tug hon gi diyem njita bi mem nituti poi.

¹² Ipa ndip da drek dip gi dijuk sinsun kron dem kep nok no di ningon ngguk tut nimai.

¹³ Ikkin kep dinghapti kak simpak ba, yo di pes pu yok nya iba doia di kinei bikiek da.

¹⁴ Noro midingat nadi bak Na di tuhan. Allah e, ma abuhup dihyet mem nikwesti di kei bibor mem Na. Abuhup dihyet tug hon angon ngakei dati di nindig bibor ba, tug hon angon gomti cem.

¹⁵ Ma ateu da bidingwes ngun leu igkrop di ningwa krup tut da kin ditde siceu indati kin minyei di jut bibor cem.

¹⁶ Ma asindui sut ba, minyei di su mihwen da bikot da ei minyei jou bibindei ba, dinnei kimbas buug ei jui nimai nya ide au.

¹⁷ tuhan e, abuhup dihyet lewo akei bibor ba, aba angon gomti bingon ngakei da. Ma akiek aho kwei ndam da lewo angondut da nindig bibor.

¹⁸ Ma aku Nanti nding leu Ade awak niyai him au. Mun di buhun bibor buhun tak da. Gima rino ma abuhup dihyet nogindini hak ug.

¹⁹ Ma abisau kwei ba, ampu da. Ateu da bidingwes ngun leu ditde siceu nya indati.

²⁰ Akan tut bipia ditde siceu nya ighyet tigut da ba, inim kep da bico kep dinyeng cem. Angat ditde siceu dima yok tu.

²¹ Ighyet di tigut da bindei bidingon tuam bicut leu su. Diyok dingon mem tungwatu di mingondut da nya kin yo di migwam ser dingon nya noro hi mpu da bi.

²² Tirigi dinggum lene iba krisieu bipijuk da. Mpe di dinggobiau lene isu mok tut cuka ngei di mpo-mpam bida.

²³ Handei kon ba, ide midut niyem njitati bindei ba, nitimek ningwigsi cut igkep yoni kin isut bat nya.

²⁴ Handei kon ba, abindei bigyai tu lene abindei inghim bikoi kikau ug.

²⁵ Ma asiber Ade niggati ei yok dip. Handei kon ba, akes Ade hukum di cig-cai ei yok dip hak ug.

²⁶ Handei kon ba, ide prak meng nya dem kep nok ha he bong drek dip gi hi bong ser bu bi.

²⁷ Lewo ihwen titip no di akes hukum ei no dip tu ba, isimbot kep biyam tut nidut kin niwei di Nani abindei bicut igkep yo di ibok-ba.

²⁸ Allah e, ma akwop kep ide sisar nimangti hagom ei Ade daptarti. Ma adip tut inyeng leu daptar di tibim tut yo ingon ngun inyenga.

²⁹ Ma adip tut inyeng leu Ade daptar di apas kep Ade limwa di igyaijo nya inyeng eisi hak ug. Ma inyeng tibim kin Ade limwa nya inyeng ei Ade daptarti au.

³⁰ Noro dinghuisi dut nindig bibor bidingon kiek tu. Allah e, ma ahati tut da ba, ateu da bidingwes ngun.

³¹ Lene midiba doia binggei sut Allah. Midiba doia nibipai sigyoti bikon anyeng di jei bibor.

³² tuhan mijoi sut diyaisi dima nindig bibor dor njiriek midut nindig mindhe kep humti kin midut nindig sapi nikre di mahan ei nimbar hum dokti.

³³ Tirigi yo di igyai nihwen titip yokti ingat lene ingon millei nindig bibor. Ba, yo di ikuk yok bak Allah migyai nibiwin kep yam ngonti.

³⁴ Lewo tuhan ngig nitingou mem yo di yuhui mbum nya ighyet ba, ningon prion ser nide limwa di isima ei ig bui nsi nya bi.

³⁵ Ma mpia-bbed him kin dihyeisi dini kin muk ngeisi bitut mun di joti nya cem hagom nggei sut Allah.

³⁶ Noni miteu minu ndig Yerusalem hanyen leu siceu nya inda nsi biwin minu mien ei Yehuda ninyeng tak kepti nya hanyen. Nide limwa nya mibong ser itimieisi hanyen ba, dihyei dima minok ide dihyei ninda rom.

³⁷ Yo di ikuk yok biNoni nya ide nintun him yamti di bram yam nya miba yokep minu dima. Yo di ingon ngakei Noni mibong timiei ei mpia dima.