MAZMUR 68 - ALLAH NIHYET MEM TUNGWATU NYA

Doia nibiyok ngon kep Allah di hwen Nide siceu bicut

¹ Doia Daud mem no di bie tut doia nimpung.

² Allah kiju lene bindei ntek gimahap Nide siceu nya. Yo di ikinei sut Noni inang leu Noho bei.

³ Allah jji yok binang bidem kep hum mmup di hou yai di pren hak. Yo di isibut nya mipror hak ei Allah Noho bei noyam kin lilin ngei di jet ei humti.

⁴ Noro yo di ingon sren nya igyai nillei ba, inggei-hi-nggei nindig bibor. Yoni imbos-hi-mbos bigyai nillei ei Allah Noho bei.

⁵ Ma jipai doia bak Allah bijikon ninyeng cem. Jitin simpak mem No di krau bumbuhui bidor tut. Ninyeng rino tuhan. Ma jiyai nillei ei Noho bei!

⁶ Allah di gwam ei Nide Ig di kwes-kwau ne munggwom awak nya icig rin biya srak ko hagau sop kibom nya.

⁷ Noni yai mpia di mem nibongti bak yo di igwam biyongkom di ingwes kinyon nya bibongti. Noni kwek yo di isima nya leu ig bui nsi apino igwam ingon di kei a. Noro suar yo di ikiek imig jou tut tuhan ibong ei dihyei di ngak-cai di ngoi-nga cem.

⁸ Allah e, tirigi po abuwak Ade limwa nya ba, abie tut yok bimbut kak iggum ndigsi di ngak-cai pima ne,

⁹ dihyei ugwa-kwei ba, biget mbras ei Aho bei tug hon Na di Allah Sinai kin Israel de Allah nikweisi.

¹⁰ Abindei ba, biget but mbras. Apui ahyet tut dihyei di ngak-cai binok Ade dihyei di ningei joti bibor.

¹¹ Leu api Ade limwa nya ibong timiei ei mpia dima. Allah e, anyohou yo di yuhui mbum nya tug hon angon di kei sut yoti.

¹² tuhan cuk sop nya leu api ittei nihyet bitri tut,

^13-14 “Nibou ndig nya igya tut ide nimpung tentara nya binang tu!” Inang bidem kep hakimoi mbrei di dimba buug bihigom. Sop di ig bei nsi nya ikwas perak kin mas di icat di inang tut nya tut yam. Mbro nok gino Allah de limwa nya imang ibit yok bikon pran bi lo, ibindei timek ide siceu nya.

¹⁵ Mpe di Allah Di Sindem Bibor bindei ntek gimahap nibou ndig nya ei mpia dima ne Noni bindei ba, es cut kwei leu Nungug Salmon.

¹⁶ Nungug Basan ne nungug di bibon ninggap leusi ba, bon ninggram him mang-mang cem ri.

¹⁷ Nggon rino Nungug Basan di bon ninggram him nya mang bibor ningon kinei sut Mbigdip Sion i? Allah dimig Mbigdip Sion binok Nide mpia di bong eisi ri. tuhan mibong ei mpia dima bijo ninno bijo kikau.

¹⁸ Allah Di Ninyeng Jei Bibor kwei sut Nide kroba pran ningat sribu-ribu kwei ei ikieti.

¹⁹ tuhan buwak nikat yok nya imang bibor bikui sut yok ug ei mpia di anai bibong ei mpia dima bijo ninno bijo kikau. Noni tug ndei munkwas leu tungwatu nya kin nimpung di ikiek imig jou tut Noni ikieti cem.

²⁰ Ma jinggei sut tuhan lewo Noni ne Allah di teu nye di ingwes ngun bikon ide mun di buhun ei ninghat dip bikwop njap-njap cem ri.

²¹ Ide Allah ne tuhan di teu nye di ingwes ngun bikwek nye ba, ingwes ngun leu nimai ri.

²² Ningat ne Allah mico kep Nide siceu di ihwen bit Noni nya ibou binem-nnai. Yo dima ne yo di ibon kep sisar kikau ri.

²³ tuhan pai “Ditde limwa jen, midibuwak jide siceu di ihwen bit je hanyen kwei leu minu Basan cem leu muk jou cem,

²⁴ leu binhyepo jiba inggrom bipiap jimig ba, nsien jide nya cem ipiei inggrom binghop nggiling-nggilau sut.”

²⁵ Allah e, yahagom ingat Na tirigi akri yo di abindei timek yok nya kwei. Ditde Allah di Nibou Ndig e, aya bit yo di injei bram yam ug ei mpia di agwam kikau eisi.

²⁶ Nimpung nipai doia injei bibie lene nimpung di ikek nggong mbrei injei abia kep yok lo, nimpung sop nigwam nitta pilei di impig mun di nggileng igya nahacanti. Doia di ipai dima nibimbiti pai,

²⁷ “Ma jikon Allah ninyeng ei Nide limwa nya di idem yam ei ikieti. Je di jintun Yakub him jahagom e, ma jinggei sut tuhan!”

²⁸ Benyamin de keret di mien bibor injei bibie ngat, leu api nibou keret Yehuda nya injei yo bram lene keret Zebulon kin Naftali ide nibou nya ipek kep niabiati bu.

²⁹ Jide Allah wit je tut jide nisindemti. Allah e, ando Ade nisindemti nya di abon mem nye.

³⁰ Nibou ndig nya ittei ide munkwas nya binjei bak Nani ei Ade Ig ei minu ndig Yerusalem.

³¹ Akon ahyet kep mindhe di ten bibor di ya ei lipig ngohousi ei minu Mesir. Akon ahyet kep ngkiai nya di inok nimpung sapi banteng bitut imunggwom bat nya bibou yahagom ikuk yok bikwas ide perak tut Na. Allah e, abindei ntek gimahap ngkiai nya di ikon kep pran kikau nya.

³² Awit huk mben Mesir ide nibou di inyeng jei nya leu binhyepo ipwoi ngkimom-tembaga bikwei sut. Bitut timiei Sudan leu binhyepo ibipbur ba, igo belasten bak Allah.

³³ Je di ngkiai nya e, ma jahagom jipai doia bak Allah lene ma jiba jide doia binggei sut tuhan,

³⁴ di mbut kak mpia-bbed him di jo mimbrek ngan tu. Jimiap e, tuhan ba nihyet di dem kep kru nibimbiti di bong mpiati bibor bahara.

³⁵ Ma jitri tut Allah de nisindemti di nindig bibor di bitak kep Israel. Nide nisindemti kui sur mpia-bbed him.

³⁶ Mben jen! Mpe dino ide Allah hei leu Nide mpia di gwam niti kwei lene biyai ingon di nggap leu. Mben Israel ide Allah yai nisindemti kin ningkek sibuisi bak Nide limwa nya. Ma jikon Allah ninyeng!