MAZMUR 66 - ALLAH NIHYET MEM TUNGWATU NYA

Doia nibinggei sut Allahti kin nipai sigyo biNoniti

¹ Doia mem no di bie tut doia nimpung. Je di tungwatu dihyeisi dini hagom e, ma jiba nimbos-hi-mbosti binggei sut Allah!

² Jiba doia bikiek ninyeng di jei bibor bijinggei-nggwang tut Noni cem.

³ Jipai bak Allah “Abon munti bibon ninggap leusi nijit-jau a! Ade nisindem biborti mipbor ngat. Gima rino Ade siceu nya iba ingwak bikik dihyei ba, idigit tut Na bibor.

⁴ Tungwatu dihyeisi dini hagom iba ibiau bicom mpia bikuk yok biNani. Ipai doia bibikon anyeng.”

⁵ Jikwei ba, icap ser Allah nibon munti nya. Mun di Noni yai ei tungwatu nya ikieti bindei ba, inggap leu bibor.

⁶ Noni luei muk ndigsi binok dihyei nggati bu. Nyeni nidigup bat-nidigai bat nya imbut ba, isigon biyuug dihip ei nite hi. Nyeni ningon nggei-hi-nggei sut nibon munti ei mpia pima.

⁷ Noni ba mimbri di kui ningkek bininyeng tak kep limwa nya bijo ninno bijo kikau. Noni mian huk ngkiai nya leu binhyepo yaham imbuk kep bisrep huk Noni bi.

⁸ Je di ngkiai nya e, ma jiba jihyet di tibim tignam ei nyeni nitingou nsi bikon nyende Allah ninyeng a!

⁹ Noni nyohou nye leu binhyepo nitug ndei nimai ba, nicut bak nyende siceu nya bi kikau tu.

¹⁰ Allah e, abingon nye noyam kin tukan nya ikwen perak nitu ei humti bibindei ba, pimbai kei.

¹¹ Asindui sut ba, nisrei bonti leu api akes mun di buhun bibor ei ninghat dip.

¹² Asindui sut ba, nyende siceu ico kep nye nyen-nyen. Nisigon minyei di su bibor kin hum di njeng bibor. Noro tini bu ne abuwak nye kwei ei mpia di kei ba, nibong kei nigwam kei tu.

¹³ Midijem mindhe mem midut nindig mindhe titut ei humti kwei ei Ade Ig ba, dibiyai mun bipek kep mun di dipreu ei mem Na nipou su.

¹⁴ Gima ne mun di dipreu ei mem Na mpe di po duum mun di buhun pima ri.

¹⁵ Midijem mindhe-ndhe di pap nap kei nok kambir kin domba kin sapi nikre nya mem midut nindig mindhe titut ei nimbar hum dokti bidibikuk da biNani. Lene nimmup brou bikui ug ei mpia-bbed him.

¹⁶ Je di jingon gom tut Allah e, jahagom jikwei ba, jingig jitingou mem Allah nibon munti nya di bon mem da.

¹⁷ Nipou ne dahara Noni leu binhyepo mpu da. Tini bu ne diba doia bikon ninyenga.

¹⁸ Gino diba doho rok ditde sisar nya lene Allah mikou sut gi miap dihyet di dahara bak Noni.

¹⁹ Noro Allah miap dihyet bingig nitingou mem nadi di dingat bak Noni cem tu.

²⁰ Dikon Allah ninyeng lewo Noni girok ditde nadi di dingat bak ba, gikes hon ningon ngakei dati bi.