MAZMUR 63 - ALLAH NIHYET MEM TUNGWATU NYA

No di yok ningon mem Allah

¹ Doia Daud mpe di noni ningat rin ei iggum ndigsi Yehuda.

² Allah e, dikuk da biNangkom ba, diyok dingon mem Nani cem. Dinggobiau sut Na noyam kin dihyei ngoisi di nggobiau sut minyei.

³ Ma asindui sut ba, diyai bong kep Na tirigi Angat rin ei Ade Ig ba, dingat Ade nisindemti kin Ade nikei-kau-keisi cem bou diyai him.

⁴ Angon ngakei dati di ug hon nohonti bi dima ne kei bibor kei dor njiriek niyaijoti. Gima rino midinggei sut Nani.

⁵ Midipai sigyo biNa kikau ug bipek diyaijo ningwig honti. Tirigi dingat nadi ne midisu dinda kui ndam Na.

⁶ Midiba dingon llei bibor binggei sut Na tug hon doia lewo abindei bidinnei mpung tut mun di kei dem kep nok njita ninyeng hagom di diyem tirigi ibon pesta.

⁷ Diyok ngon kep Na di Allah tirigi dibong dibongti bidikan-kan nyen tut Na kikau mmun jei binjap kep,

⁸ lewo ampu da ninno tu. Diba dingon di llei bibor bipai doia tirigi diku da ei anyehei di yon gau da.

⁹ Dikat Na bingkiem bibor leu api aba anda di sindem bibor bahati tut da.

¹⁰ Noro yo di ihwen da mijuk ug ei yo di imai su nya ikieti.

¹¹ Yoni mitug ndei nimai ei pranti leu api mindhe-ndhe di niten-pos nya miyaham yok bibriug yok ningwig a.

¹² Nibou ndig ningon millei bibor lewo noni hwen nide siceu nya tug hon nisindemti di Allah yai binoni. Yo di ipreu ei mem yam tug hon Allah ninyeng minggei bibor noro Allah midat kep ser yo di ipai-pai wai nya yuhuigya.