MAZMUR 62 - ALLAH NIHYET MEM TUNGWATU NYA

Iba ingon com Allah di ya srak ko hagau nye

¹ Doia Daud mem Yedutun di bie tut doia nimpung.

² Diba dinnei di jo nyahan bibet dingon mem Allah. Danti dingwes ngun tug hon Noni he.

³ Nongkom he rino nyohou da biteu da bidingwes ngun. Noni ne tentara nibousi di diya coi ri. Gima rino midicut bi sren.

⁴ Jahagom jikwei hwen tungwagom di noyam kin ngug di lus tu bipek apig bu i?

⁵ Jiyok jingon mem gima jibindei cut ninyeng jeisi. Jiyok jingon gom mem joom biei kep noni lewo jipai nihyet di binjei mun di kei bak noro jiba nihyet di jibisigion noni ei jingonti.

⁶ Diba dingon di jo nyahan bibet dingon mem Allah. Diba dingon com Noni.

⁷ Nongkom he rino nyohou da biteu da ba, dingwes ngun. Noni ne tentara nibousi di diya coi ri. Gima rino midicut bi sren.

⁸ Noni ne Allah di bindei ba, dingwes ngun biyai dinyeng di jei bida ri. Noni ne No di ya srak ko hagau da kin hak mihyeti di diku da eisi ri.

⁹ Ditde limwa jen e, ma jiba jingon com Allah bikwop mmun-njap hagom. Ma jipai jit mun di jo jingon bei hagom brei biNoni. Lewo Noni ne mpia di igya coi dima ingwes ngun ri.

¹⁰ Tungwatu nya idem kep ninnei di ihi mbigom ngat he. Yo di inyeng jei kin ide limwa nya yahagom ibon inyeng bi. Gino ibakilo inyeng jeisi nibuhunti ne ingat lo, nggan-nggau dor njiriek ninnei di ihi mbigom ngat he nibuhunti.

¹¹ Ma jiba jingon com mun di jiyai leu nico kep tungwatuti au. Ma jiyok jingon mem mun di jitug ndei tug hon ndigban di jipos nya au. Mbro nok gino mun di jinyeng tut nya kum eisi lo, ma jiba jingon com ndigban dima au.

¹² Dimiap Allah nihyet di pai poi su bipia ninyeng tak kep nisindemti titut yam ba,

¹³ ningon nggriu sut tungwatu nya. Na di tuhan abuhup bak tungwagom-gom bit leu niyai munti nya.