MAZMUR 60 - ALLAH NIHYET MEM TUNGWATU NYA

Nadi nahara mem gima Allah mpu yok

¹ Daud de doia ningginausi mem no di bie tut doia nimpung di ibrim leu doia Mitou Bakung Nibigyok Ngon Kep.

² Ba doia dini bikiek mpe dino ikon pran bit mben Aram-Mesopotamia kin mben Aram-Zoba ba, bikiek mpe di po Yoab ngkwei hanyen leu api bindei timek mben Edom ibou sribu simnaibrimigcan ei Mbang Briep Nsim cem.

³ Allah e, arok nye ei lene abisindui sut ba, nyende siceu nya ihwen nye binicut biyok cem. Angon sibui sut nye. Nogindini apindi nye nok gi nipou pima hanyen bu.

⁴ Abindei ba, dihyeisi dini ugwa-kwei lene gima bindei ba, dihyei ninjek dip kimbo. Akinding nikimboti nya hanyen lewo dihyeisi dini krup tut nye ri.

⁵ Asindui sut Ade limwa nya ba, icut ei ninghuisi wei di buhun biborti. Nibou ngwak sibui-sibui nyen nok no di dut pes di pu no pimo.

⁶ Asok kep yo di ikuk yok biNa leu binhyepo ingwes ngun leu hukum di micut igkep tungwatu nya.

⁷ Aba Ade nisindemti biteu nye biningwes ngun ba, abuhup nyende nadi cem leu binhyepo yo di angon ngakei yok nya ingwes ngun.

⁸ Allah nihyet tibim kwei leu nigwamti di kwes bipai “Dimbos-hi-mbos kep minu ndig Sikhem di dikwas kukiau. Midiko bidibinggok tut nikwas Mbang Briep Sukot kukiausi cem.

⁹ Dinyeng tut hanjop Gilead kin Manasye ba, Efraim ne Ditde topi yeng ngkuong ri. Yehuda ne Ditde tom di ndo tut dinyeng tak kep limwa nyati ri.

¹⁰ Noro minu Moab ne bokor di dipiap dimig eisi ri. Dimbos-hi-mbos tut gino dibindei timek mben Filistea. Dicom Ditde srop bak mben Edom nok mun di bindo bipia dinyeng tut minu dima.”

¹¹ Tou rimibuwak da ug ei minu Edom i? Tou rino tin puig bibie tut da ug ei minu ndig di bon tentara nibousi di igya coi dima i?

¹² Allah e, Angat rin bit nye bi e? Akiju ba, anjei bit nyende tentara nya bi e?

¹³ Ampu nye tirigi nikon pran bit nyende siceu nya leu gino tungwatu nya idem mem gima impu nye bi a.

¹⁴ Gino Allah tti kin nye lene ninok nihwen kep mun cig nya ri. Noni rino bindei ide siceu nya di icut a.