MAZMUR 58 - ALLAH NIHYET MEM TUNGWATU NYA

Nadi nahara mem gima Allah kes hukum ei yo di isibut nya dip

¹ Doia Daud mem no di bie tut doia nimpung ba, ibrim leu doia Ma Jicok Tut Au.

² Je di jinyeng tak kep limwa nya e, jiba jingon di gom bikos tut mun e? Jiba jingon di gom bigwam nok nikei di kim munhyet ei tungwatu ikieti e?

³ E bi! Jipwoi mun di kinei ei jingonti ba, jiba jiten biyai jiyai munti nya ei minu dini.

⁴ Yo di isibut israwir habiei leu ipmem ninghopti ba, iris mun igkei habiei leu isrekti.

⁵ Mun di pu tungwatu di bindei ba, imai dima noyam kin wou piet ba, idat kep itingou noyam kin wou hot di nitingou nam,

⁶ di gimiap nipijuk kep wou cig nihyet bibit nung di nihyet dwei nihyet cem bi.

⁷ Allah e, adahat ikwai nya. tuhan e, atiba mindhe singa nehen pap dima yok ikwai di tuk leu.

⁸ Handei kon ba, ipror hak nok minyei di nimihip kui leu di pingge kin tibor di bon ninggwenti bi.

⁹ Handei kon ba, idem kep mindhe siput di kri naham di nimbrai dek ba, inok munggwom ngwoi di srek urung bimai leu ba, gingat nipigati bi sren.

¹⁰ Isar nipou tirigi ingon huk niti bigyo dem kep nok biei war di nimon yo ba, mahan bigyo di hou kui binjei bingwig hak ba, noyam kin ndia kioi di mui su.

¹¹ Yo di ingon sren nya ingon nggei-hi-nggei mpe dino ingat yo di isibut nya di itug ndei hukum. Yo di ikiek imig jou tut Allah inggrom mirus yo di ingon sren nya imigya.

¹² Tungwatu nya mitri tut biyam “Jit. Yo di ingon sren nya itug ndei imuhup. Allah di nok nikei di mbus tungwatu dihyeisi dini ingonti no rinaha.”