MAZMUR 57 - ALLAH NIHYET MEM TUNGWATU NYA

Nadi nahara mem gima Allah mpu no

¹ Doia Daud mem no di bie tut doia nimpung ba, ibrim leu doia Asindui Sut Hi Bindei Timek Dani Au. Daud ba doia dini bikiek mpe dino noni nang bicoi ug ei hak mihyeti boom no leu Saul.

² Allah e, angondut da lewo digwam coi Nani. Diku da nding ei anyehei behei kikau bibou hou sigau di nimig ten bibor kes leu ug.

³ Dahara Allah Di Ninyeng Jei Bibor di yai nibou tut mun nyeng hagom di disuar nya.

⁴ Noni mibuhup dihyet leu gwamti biteu da ba, dingwes ngun. Noni mibindei timek yo di ico kep da nya cem. Allah mindo bipia ningon gom tut da ba, ningon ngakei da bikwop ug.

⁵ Ditde siceu igyon ttai da ba, idem kep mindhe singa di briug tungwatu bipinde yok. Ikwai noyam kin micim di nggwen kin tibor cem. Idweb dem kep singau simeda di nggwen bibor.

⁶ Allah e, ando Ade nisindem biborti brei ei mpia-bbed him a. Ando Ade nikei-kau-keisi bidem dihyei nisurti-nipekti.

⁷ Ditde siceu nya icom bon ser da ba, ibicut mimbri dikui dingkek bingwig leu da. Itig jui ser puig di dimbut kak noro yonti icut eisi.

⁸ Allah e, diba dingon di ngkiem kei bicom Nani o! Midipai doia bidibikon anyeng o.

⁹ Dinnei e, akiju! Nggong kin nggong brei jen e, ma jikiju! Midiwin mpia njap cem bikiju.

¹⁰ tuhan e, midipai sigyo biNani ei ngkiai nya ikieti. Midiba doia bikon anyeng ei tungwatu dihyeisi dini ikieti.

¹¹ Lewo angon ngakeisi nindig bibor ba, kui sur mpia-bbed him lene angon gomti kui bipek kin bumbuhui nijunti.

¹² Allah e, ando Ade nisindem biborti ei mpia-bbed him. Ando Ade nikei-kau-keisi bidem dihyei nisurti-nipekti.