MAZMUR 55 - ALLAH NIHYET MEM TUNGWATU NYA

Nadi nahara bak Allahti tirigi hi ningon di kieti bakilak noni

¹ Doia nibingginau di Daud pai ei mem no di bie tut doia nimpung. Ipai doia dini ba, ibibit nggong brei nibimbiti.

² Allah e, angig atingou mem ditde nadi. Akiek Aho tai leu ditde nahara Nati au.

³ Ayok ngon kep da ba, abuhup dihyet. Mun di buhun tak da bindei bidinghuisi wei.

⁴ Ditde siceu ipai ihwen da ba, yo di isibut ico kep da apino gima biyai ningon di ttin bida. Lewo ibibon dingon buhun ba, ingon sibui sut dati bindei ba, iba nitok bida.

⁵ Dingonti ttin bibor. Gino diba dingon bisrip huk diyaijo ningwig honti lene gima bindei ba, dinghuisi mpig sut.

⁶ Nidigit kin nittin nggai da lene ningon di ttin yai nidigit-digoi bida.

⁷ Handei kon ba, midibon dinyehei di dek da nok hakimoi mbrei ne mididimba bidinggok mpia nimbum-brati hak ug.

⁸ Handei kon ba, mididimba ug ei minu ting bibor bidibong bidangkom ei iggum ndigsi.

⁹ Dibipbur bidinggok mpia dima digwam coi leu hou sigau kin hou di nimig ten bibor nimig a.

¹⁰ tuhan e, abindei ba, ditde siceu nya ingon tai-tai bou. Ayok nisinsiou ei ikieti tut mun di isimbot dat nya. Lewo dingat tungwatu nya isibut tut yamti kin ihwen yamti di kieng kep minu ndig.

¹¹ Igya bidem minu ndig ba, isibut bibor bibindei mun di buhun bibor cut igkep timiei nya binggek yok.

¹² Ninggek kep mun cig nya igya nyen bidem minu ndig dima ba, nico kep mun cig kin niris kep mun cig igya bikieng kep cem.

¹³ Gino ditde siceu nya rino iba da bikek lene midoom dingon tut. Gino hi di ba nitok bida rino nihyet kinei sut da lene midiku da nyahan leu yok.

¹⁴ Noro no di ham nimbuk kep da ne no di dijem disut bit kin disut ningat kin disut di dingon kieti ri.

¹⁵ Nipou yo ne nahacem nigwam bit yam ba, nisingat tut yam cem. Nahacem nittei yam binikuk nye bak Allah bit yam ei Nide Ig.

¹⁶ Handei kon ba, ditde siceu nya imai kros hak leu api ijuk tut igyaisi jo yo ug ei minu nimai nya ide. Lewo ingon di mpung tut nisibut biborti kieng kep ide ig di ingkwei-ngkwei nyen kep.

¹⁷ Noro dahara tuhan Allah kwei mpu da. Noni miteu da bidingwes ngun.

¹⁸ Ninso-nso nyenti kin nipim-pim nyenti yem da mem mmun jei njap jei lo, Noni mimiap kep dihyet,

¹⁹ biteu da bidingwes ngun leu ditde siceu di injei siceu bihwen da kin siceu di induk yam kwei bikon pran bit da inda nsi.

²⁰ Allah di ninyeng tak kep mun nyeng hagom habiei ei nimbie him kikau kwei bipek ammani kep mimiap dihyet ba, bindei timek yok. Lewo ikou sut gi ittin ser ide sisar. Iba yoho rok Allah ba, igittin tut Noni cem bi.

²¹ Disut timiei pima kiju kep nisut bat nya bihwen yok. Nonti bikep ser nipreu eisi nya tu.

²² Ba nihyet di mmau bihwen ingon noro ningat ne ningon mpo bibor. Ba nihyet di nem-nnai kei cem bihwen ingon noro gima noyam kin singau simeda di nggwen-gwau di digo yok.

²³ Ma jikes jingon ku jentiti bak tuhan leu api Noni miya srak ko hagau je. Lewo Noni sindui sut ba, siceu nya ibindei timek yo di ingon sren nya bi sren.

²⁴ Noro Na Di Allah e, mporo ma acom niris mun cig nya kin nisiber tungwatu nggrom cig nya di imai urung ug ei jui di jut biborti. Noro tut dani ne diba dingon com Nani.