MAZMUR 52 - ALLAH NIHYET MEM TUNGWATU NYA

Hukum di micut igkep yo di isibut nya

¹ Daud de doia ningginausi mem no di bie tut doia nimpung.

² Daud ba doia dini bikiek mpe di Doeg di timiei minu Edom gom kwei pai bak Saul bipia Daud ug krau ig bei di Abimelekh de tu.

³ Na di asibut bibor e, nggon rino akon nanti drek dip abon munti di kinei bibor tut yo di Allah ningon ngakei yok i?

⁴ Aris mun ba, ayok angon gom mem mun di kinei bibor ei njap jei ba, adweb dem kep singau brek sra di nggwen bibor.

⁵ Angon ngakei mun di kinei bibor dor njiriek mun di kei. Ajoi sut niris mun dor njiriek mun di nijit.

⁶ Aba ahyet biris mun ba, ahyet dima bisibui hiter ningon cem!

⁷ Allah mibindei sar na bihigom. Noni mikat na bikri anda leu ade ig bicok tut na leu minu di yo di igyaijo nya ide cem.

⁸ Yo di ingon kwes ingat mun di cut igkep na lene idigit tut leu api ipa ndip na bipai biyam,

⁹ “Jingat i! No dima ne no di gwam coi Allah bi ri. Noni ba ningon com nide ndigban di nyeng tut di nindig bibor nya binggok tut nibong kei nigwam keisi tug hon nide mun di pos nya.”

¹⁰ Noro tut dani ne dinok biei zaitun di nimeng ngun-ngau ei Allah De Ig. Diba dingon com Allah ningon ngakei dati bijo ninno bijo kikau.

¹¹ Midipai sigyo biNa bijo kikau. Miditri tut asingat keisi ei Ade limwa nya di induk yam ei gomti yoho bei.