MAZMUR 51 - ALLAH NIHYET MEM TUNGWATU NYA

Nadi nibittin ser sisarti

¹ Doia Daud mem no di bie tut doia nimpung

² tirigi Natan pai kep noni drek dip gi cut tut Batsyeba.

³ Allah e, ma angon nggriu sut da tug hon angon ngakei dati di ug hon nohonti bi. Ma aciu ser ditde nitunggweisi tug hon angondut dati di nindig bibor.

⁴ Apiap da leu mun di kinei di rap da lene abindei ba, ditde sisar di noyam kin map cug leu da.

⁵ Dipai jit ditunggweisi nya hagom ba, ditde sisar nya jo nibreisi mem da bikwop mmun-njap.

⁶ Dibon sisar tut Na di Allah Nangkom he ba, diyai mun di apai sut bipia kinei bibor tu. Gima rino ayai mun di igbit tirigi akes hukum ei da dip. Akos tutti nya sren-srau kei.

⁷ Diyai mun tunggwei ba, dingon mui habiei disrekti he bi. Sisar kui da hammi tirigi dipmem sindi nghop tut da.

⁸ Mun di bon ninyeng ei Na di Allah ayai him rino ningon di gom. Abindei ba, dingon bei mpung tut angon kiti.

⁹ Aciu ser ditde sisar leu api dingon kwes hanyen. Apiap da leu sisar leu binhyepo dingon tiei kei noyam kin bunggum.

¹⁰ Asindui sut ba, nihyet di bindei di dingon llei bibor hanyen tibim kwei ei ditingou nsi. Lene mbro nok gino aco kep da tu lo, dingon minggan-triot kei hanyen bu.

¹¹ Akiek ayai ter leu ditde sisar nya ba, aciu ser hagom hak ug.

¹² Allah e, apai tes ningon di kwes mem da lene abindei ba, dingon bei jep-jau cem nddong cem hanyen.

¹³ Ma acom da bihigom leu Aho bei ba, akus Ade ninnei gi kwes leu dingonti au.

¹⁴ Abindei ba, dingon llei bibor tug hon Ade gi teu leu sisar ug ei niyaijo nijepti di ayai bida tu. Abindei ba, dingon llei ndam gi dibit ahyet.

¹⁵ Leu api miditri tut Ade nicuk nyeti nya bak yo di ibon sisar nya leu api yoni mingkwei hanyen leu puig srawir ndam Na hanyen bu.

¹⁶ Allah di teu da leu sisar e, suar ditug ndei hukum nimai noro asindui sut ba, diyaijo bu leu binhyepo bon nituti mem gima diba dingon llei bibor bitri tut angon srenti hanyen bu.

¹⁷ Allah e, ampu da leu binhyepo diji nggan tut nimbrap hanyen leu api midibinggei sut Na.

¹⁸ Ajoi sut midut nibui mindhe tut ninggrom bi. Gino dibon midut nindig mindhe titut kep humti ne ajoi sut gima cem bi.

¹⁹ Midut di Allah joi sut rino ningon di nggriu-nggrop. Akou sut no di kuk ningon tut Na bi kin no di ttin ser nide sisar bi sren nya.

²⁰ Allah e, ma angon singat tut Sion. Abindei ba, tungwatu nya iwin ngug tig di bikrop ttai minu ndig Yerusalem hanyen.

²¹ Apino ajoi sut midut nibui mindhe tut ninggrom mungkun kei kin midut nindig mindhe titut kep humti cem. Mpe dima lene minibon midut nindig sapi nikre titut ei Ade nimbar hum dokti.