MAZMUR 5 - ALLAH NIHYET MEM TUNGWATU NYA

Nadi mem gima Allah nyohou noni

¹ Doia Daud mem no di bie tut doia nimpung di iba porei bikek nya.

² tuhan e, angig atingou mem dihyet di dipai hwou biNa ba, angig ayai kep da tirigi dilua-lua nyen tut ditde nahara nyenti.

³ Ditde Nibou Ndig kin ditde Allah e, amiap kep dihyet di dahara Nati dini ba, ampu da.

⁴ Lewo tuhan e, dingat nadi bak Nani. Amiap kep dihyet di dahara Nani mem njap tekti. Dihwou sut nadi di noyam kin munkwas mem njap nitek-tek nyenti ba, dibikuk da biNa. Dibibet dingon mem abuhupti.

⁵ Nani ne Allah di ajoi sut mun di kinei bibor bi ri. Asindui sut ba, yo di isibut nya ihwou um Nani cem bi.

⁶ Ayai ngkek ttin ser yo di ikon yonti ba, akou sut yo di isibut nya yahagom.

⁷ Abindei sar yo di iris mun igkei yahagom ba, angwes om kep niris kep mun cig nya kin nihwen kep mun cig nya.

⁸ Noro dicoi ug ei Ade Ig tug hon angon ngakeisi di nindig bibor. Dikiek doho bidibirok kik Ade Ig Di Kwes-Kwau bidiba dibiau bicom mpia leu api diba dibou coi mem Nani tirigi dikuk da biNani.

⁹ tuhan e, ditde siceu di iba nitok bida imang bibor ngat! Akrau dinda ba, acen da leu binhyepo diyai igbit angon kanti mem da. Ma abindo Ade puig dima dimbut kak cem bida.

¹⁰ Lewo bit bon hi ba ningon com ditde siceu di iba nitok bida ighyet kan bi. Ingon mpung tut ide nitin ei ningon kanti di kinei bibor. Ikes ighyet di mmau kei di brim tungwatu nya ingon noro ingon bei mien mpung tut mun di mpiei ningkom.

¹¹ Allah e, akes hukum ei yok dip. Abindei ba, itug midut drek dip yonti ingon kanti di itin ei nya. Ide sisar nindig bibor. Gima rino ajji yok hak ug lewo ikiek imig jou tut Na.

¹² Noro ma asindui sut ba, yo di igwam coi Nani yahagom ingon nggei-hi-nggei hak ug ba, igyai nillei bijo ninno bijo kikau. Anyohou yo di ingon ngakei Nani leu binhyepo igyai nillei tug hon Nani.

¹³ Lewo anjei mun di kei bak yo di ingon gom tut Na. Aba angon di ngakei yokti binyohou yok.