MAZMUR 48 - ALLAH NIHYET MEM TUNGWATU NYA

Sion ne Allah de minu ndig ri

¹ Nimpung Korah ide doia.

² tuhan ne No di kei-kau-kei. Nyeni ikon ninyeng bibor ei ide Allah de minu ndig di iwin ei mbigdip di kwes-kwau.

³ Mbigdip di Allah de dima kei-kau ba, ninyeng rino Sion. Nibou ndig di ninyeng jei bibor de minu ndig dima ne biyai tungwatu dihyeisi dini hagom ingon nggei-hi-nggei.

⁴ Allah gwam ei Nide tentara nibousi di igya coi nya ei minu ndig dima. Jo nibreisi bipia Nonti rino nyohou a.

⁵ Nibou ndig nya induk yam ei ba, itin ei mem injei siceu kwei mem gima icoi bihwen Nungug Sion.

⁶ Noro ingat mbigdip dima ne idigit tut lene inga leu ba, ingon ttin bibor cem leu api iba ingon tai-tai bou binang leu.

⁷ Igwam nittin kin nidigitti ei mpia dima binggwen dem kep sop di ninghim dut dideu nisrekti pimo ba,

⁸ idem kep kibar minyei di sigau hwen di nggek sinsiou.

⁹ Nyeni imiap ninghapti tut Allah de mindur di nipou pima tu. Noro tini bu ne ingat gima ei tuhan Di Ninyeng Jei Nide Minu Ndig bou igyai him tu. Minu ndig dima ne ide Allah Nide Minu Ndig ri. Noni ya srak ko hagau mpia dima bijo ninno bijo kikau.

¹⁰ Nikan-kan nyen tut angon ngakei nyeti tirigi nikuk nye bak Nani ei Ade Ig.

¹¹ Anyeng tibim bidem minu bibindei ba, tungwatu dihyeisi dini hagom ikon anyeng lewo Nani ne nibou ndig di ningon sren-srau ri.

¹² Abindei ba, limwa Sion kin timiei Yehuda nya iba ingon di nggei-hi-nggei bimbos-hi-mbos hak ug. Lewo aba angon di sren-srau bimbus ingonti ba, akos tut angon kanti mem yok cem.

¹³ Ma jinjei ttai Sion bijinghau ttai. Ma jibikwop nide ig di bon ninggre di jo-jo yam dip anai mem gima ibiya ser minu ndig dima cem.

¹⁴ Jicap ngug tig ba, jiyok jiyai kep tentara nibousi di igya coi nya leu binhyepo jipui sut gima yok hagom bak jide nintun him yamti di bram yam nya bu. Ma jipui biyok,

¹⁵ “Allah dini ne ide Allah rin bijo ninno bijo kikau. Noni mibie tut nye kikau ug bipek nijam di nidipti buug hon nohonti bi.”