MAZMUR 47 - ALLAH NIHYET MEM TUNGWATU NYA

Allah di kei-kau-kei ninyeng tak kep mun nyeng hagom

¹ Nimpung Korah ide doia mem no di bie tut doia nimpung.

² Jahagom e, ma jiba jingon di llei bibor bittem jinda. Ma jiba nimbos-hi-mbos binggei sut Allah tug hon doia nya!

³ Ma jinghuisi mpig sut tuhan Di Ninyeng Jei Bibor. Noni ne Nibou Ndig di ninyeng jei bibor di ninyeng tak kep dihyei nisurti-nipekti ri.

⁴ Noni bindei ba, nyeni yoom kep ngkiai nya. Noni ta nye ba, inyeng tak kep yo dima ide keret nya hagom.

⁵ Noni pek hanjop mem nye ei minu jep dini leu binhyepo nibong kei nigwam kei eisi. Nye di mben Israel di Noni ningon ngakei nya ninggei-nggwang tut Noni.

⁶ Tungwatu nya iba ingon di llei bimbos-hi-mbos bimiep pun mang bibor tirigi Noni kui bigwam ei Nide banggo mbrei dip.

⁷ Ma jiba doia binggei sut Allah. Ma jiba doia binggei sut jide Nibou Ndig!

⁸ Allah ne Nibou Ndig di ninyeng tak kep dihyeisi dini hagom ri. Gima rino ma jiba doia di singat kei binggei sut Noni!

⁹ Noni gwam ei nide banggo mbrei di Noni dimig ei mem Nonti dip ba, ninyeng tak kep ngkiai nya yahagom.

¹⁰ Nibou ndig dihyeisi dini induk yam kwei bigya bit Abraham de Allah de limwa nya. Lewo Allah ne Nibou Ndig di ninyeng tak kep nibou dima yok hagom ri. Nongkom ninyeng jei bibor ba, kei-kau-kei cem.