MAZMUR 4 - ALLAH NIHYET MEM TUNGWATU NYA

Nadi di ipai mem mmun

¹ Doia Daud mem no di bie tut doia nimpung di iba nggong mbrei bikek nya.

² Allah e, Nani ne No di ya srak ko hagau da ri. Tirigi dahara Nani lene ma abuhup dihyet. Mpe dino mun di buhun srou da lene ampu da tu. Tini bu ne ma angondut da ba, amiap ditde nadi di dipai hwou biNa.

³ Je di tungwatu nya e, jihyet wer mpiahi tut ditde Allah mem njap pig bu i? Jiba joho rok mun di mipror yon bijuhuk bram mun di igbit bi ug ei apig bu i?

⁴ Ma jiyok ngon kep bipia Tuhan dimig yo di ingon kwes nya ei mem Nonti tu. Mpe dino dahara tuhan lene Noni miap ditde nadi.

⁵ Ma jingon digit tut mun di micut igkep je noro ma jibon sisar drek dip au. Jikan-kan nyen tut he ba, jibigwam nyahan jug ei nghim nsi di jibong niti.

⁶ Ma jibui mindhe-ndhe bijindig ei nimbar hum dokti nok gi igbit ba, jibikuk je bak tuhan. Ma jiba jingon com Noni.

⁷ Imang bibor ingat nadi “Tuhan e, anjei mun di kei hi kin bu binye lene angon kei sut nye cem.

⁸ Noro abindei ba, dingon nggei-hi-nggei dor njiriek yo di ikos ide gandum kui ig gudan bimpung pias hagau ba, ipot ba anggur ngei nok gi dem mem yok cem.”

⁹ Apino dipu dinghim bidibong mai lewo Na di tuhan Nangkom he rino anyohou ya ser diyaisi!