MAZMUR 39 - ALLAH NIHYET MEM TUNGWATU NYA

No di um ninghuisi wei pai jit nide sisar

¹ Doia Daud mem Yedutun di bie tut doia nimpung.

² Dikan “Misinyohou santi leu binhyepo siba sidwe bibon sisar bi. Gino yo di isibut ingat rin dideu sa lene sikou sut gima simbrap a.”

³ Dikimut duhui ba, digwam bidimmou kei leu api gima buhun mem danti. Leu api dinghuisi wei di buhun tak da bikum eisi.

⁴ Ningon di bos-bos nyen bibor jo kep da. Gino dikan-kan nyen tutti kum eisi ne dingon di buhun cem kum eisi bu. Lo bi lene dipai,

⁵ “tuhan e, apai sut nicunti tirigi ditde njap ug hon nohonti bida leu binhyepo dikan tut ditde njap nijeisi.”

⁶ Ayo! Akos tut bipia ditde njap cun bibor. Ditde njap nijeisi bon ninyeng ei ayai him bi. Ningat ne tungwatu nya idem kep ninnei di tau nuhwap nsi he.

⁷ Ba, igyaijoti dem kep ningwes di kigyei he. Mun di ibou sibui sut nya hagom mikui-kausi he. Inju ndigban keyam lo, tirigi imai ne igikan tut tungwa di miba nokep ndigban dima cem bi.

⁸ tuhan e, nogindini midiyok dingon mem mindei i? Handei kon ba, midiyok dingon mem Nangkom he.

⁹ Ateu da leu ditde sisar nya hagom lene ma asindui sut ba, yo di ingon mbum nya iba da bikek au.

¹⁰ Digwam nyahan bidimmou kei ba, dahap diji bi lewo Nani rino attem da.

¹¹ Ayai Ade hukum leu da leu mbigom midimai drek dip Ade nibui dati.

¹² Akes hukum ei tungwatu nya dip drek dip itunggweisi nya ba, ambas yok drek dip. Ba, abindei sar mun di bon ninyeng mem yok noyam kin cipo nibindei sarti. Ningat ne tungwatu nya idem kep ninnei di tau nuhwap nsi he.

¹³ tuhan e, amiap kep ditde nadi di dingat bak Nani. Angig atingou mem nadi di dahara bak Nani. Gino dipim lene ma agwam hak ba, ammou he au. Digwam bit Na mem nituti poi noyam kin didigup bat-didigai bat nya.

¹⁴ Nipou tirigi duug bihigom bidiyaijo ngwig hon bigyo ne ma awaisi da au. Leu binhyepo dingon jo nyahan ug e.