MAZMUR 37 - ALLAH NIHYET MEM TUNGWATU NYA

Mun di mipek kep mem yo di isibut kin yo di isingat ei nidipti bu

¹ Doia Daud. Ma jingon mbut-mbut nyen tut yo di isibut nya ba, jingon kinei sut yo di ikrau tunggwei puig au.

² Jei bi lene yahagom mipror dem kep nok minta di mpia wam bimui. Yahagom mimai dem kep nok mitou susti nya.

³ Ma jiba jingon com tuhan cem jinda jo kep jide midyai di kei nya cem. Ma jibong ei minu dima ba, jiba jingon di gom biyai mun nyeng hagom.

⁴ Ma jinggok tut jingon di llei ndam tuhan leu api Noni miyai mun di jiyok jingon mem bije.

⁵ Ma jikes jiyaijoti titut ei tuhan nindati bijiba jingon com Noni leu api Noni mimpu je.

⁶ Noni mindo bindo tut jingon ngunti ei nibreisi lene mimbrap gau je bindo jingon srenti dem kep nok mpia nuhuk pijumti.

⁷ Ma jiba jingon di jo nyahan bimem kep ser tuhan bijibet jingon mem nikwesti dima Noni yai nibou tut. Ma jingon mbut-mbut nyen tut yo di ibikum ei ide mun di inyeng tut nya kin yo di iris igkei nya au.

⁸ Ma jikrop je leu gima jingon sibui sut yok kin jingon di koi kep yok lewo gima hagom nok puig di bie ndam mun di buhun mem je.

⁹ tuhan mibindei ba, yo di isibut nya mitug midut noro yo di iba ingon com Noni mibong kei migwam kei ei idihyei di Noni yai biyok.

¹⁰ Jei bi lene yo di isibut nya mipror leu nye. Gino jinggok ser yok lene mijingat yok bu bi.

¹¹ Bikwop yo di iba ibou coi mem yam miba yokep idihyei leu api iba ingon di jo nyahan bibong kei bigwam kei eisi.

¹² No di sibut tin ei ningon kanti di kinei mem no di ningon sren. Ningwak mbriu sut ba, ningon mpo tut noni cem.

¹³ Noro tuhan pa ndip yo di isibut nya lewo Noni kan tut bipia igyaijo ningwig honti dideu su.

¹⁴ Yo di isibut nya yihit ide singau simeda biyar ide hampiap ba, ibihwen yo di indwau di yuhui mbum nya biprindei yo di ingon sren nya cem.

¹⁵ Noro tuhan mibindei ba, yoni mitug midut tug hon yonti ide singau simeda ba, Noni midahat ide hampiap nya cem.

¹⁶ Ndigban gom-gom di no di ningon sren nyeng tut nibok kak bibor dor njiriek ndigban mang bibor di yo di inyeng nya inyeng tut.

¹⁷ Lewo tuhan mipos yo di isibut nya ide nisindemti bingwig leu yok noro Noni minyohou yo di ingon sren nya.

¹⁸ tuhan nyohou yo di ingon sren. Mun di iba yokep nya mijo mem ide nintun him yamti di bram yam nya bijo ninno bijo kikau.

¹⁹ Yo di ingon sren nya mibong kei migwam kei mem nijam di kinei bibor. Gino nijam ninggum hwen yok ne yo di ingon singat nya minggum bi.

²⁰ Noro yo di isibut nya misar bingwig. tuhan de siceu nya mipror dem kep nok mitou susti. Yahagom mipren hanyen dem kep nok hum mmuba.

²¹ No di sibut dahat ndiyok leu tungwatu nya lene rop ningwam hanyen bi. Noro no di ningon sren ba ningondut yokti bikwas mun tut tungwatu nya.

²² Yo di tuhan bindei ba, ingon nggei-hi-nggei micoi ug ei minu di Noni preu ei mem yok. Noro Noni mibindei ba, yo di itug ndei Nide nisigionti mitug midut.

²³ tuhan bie tut no di ningon sren kak puig di igbit mem noni. Noni nyohou yo di Noni joi sut yok nya.

²⁴ Gino no dima ndrat mpia ne kinoi bi lewo tuhan krau ninda bingkiem.

²⁵ Ei dipileisi kikau kwei bipek diwer andig-ndausi dini ne dingat lo, tuhan kes no di ningon sren ei bibindei ba, nimunggwom bat nya inggunggia huk tungwatu nya bihi bou diyai him bi sren.

²⁶ Noni kwas mun tut yo di hi ter lene bisindui sut hiter ibon ningwam binoni cem ba, nimunggwom bat nya mibiyai ningon nggei-hi-nggei.

²⁷ Jimbres jenti leu sisar lene ma jiyai kep jiyai munti di kei nya leu api jide nintun him yamti di bram yam nya mibong kei migwam kei ei idihyei bijo ninno bijo kikau.

²⁸ Lewo tuhan ningon llei ndam niyai munti di sren kei nya. Noni mikes Nide limwa di ingon gom nya bihigom ei bi sren. Noni nyohou yok bijo ninno bijo kikau. Noro Noni mibindei timek yo di isibut ide nintun him yamti di bram yam bingwig.

²⁹ Yo di ingon sren nya miba yokep idihyei bibong kei bigwam kei bijo ninno bijo kikau.

³⁰ No di singat kei hap niji ne ba ningon ki bimbrap ba, nihyet tibim kin ningon kanti di sren-srau.

³¹ No dima pwoi nide Allah nihyet ei ningonti leu api krau tunggwei nihyet dima bi sren.

³² No di sibut kos dik sir no di ningon sren nimbutti bipi bihwen noni.

³³ Noro tuhan mikes no dima bicut ug ei nide siceu nindati bitug ndei hukum tirigi noni ya ei nikei noho bei bi.

³⁴ Ma jiyok jingon mem tuhan bijibit nihyet leu api Noni mikon jinyeng leu binhyepo jiba jekep jidihyei. Noni mihwen yo di isibut nya bingwig bou jiyai him.

³⁵ Nipou lene dikan tut no di sibut bibor di biyai hiter ingon ttin bibor ba, nintig bou jei bibor ug bipek binsip ninggrupti.

³⁶ Noro njap poi ser lene dimbut ug ei mpia dima bidingat lo, dingat ningat bi ba, dinggok ser noni noro digingat bi.

³⁷ Ma jitou kep no di ningon singat kin no di ningon sren. No di ningon jo nyahan bon nide nintun him yamti di bram yam nya imang bibor.

³⁸ Noro yo di ibon kep sisar misar bingwig ba, ide nintun him yamti di bram yam nya imai bitimek.

³⁹ tuhan teu yo di ingon sren nya binyohou yok ei mpe dino mun di buhun om kep yok.

⁴⁰ Noni mpu yok biteu yok bingwes ngun leu yo di isibut nya indati lewo igwam coi Noni.