MAZMUR 36 - ALLAH NIHYET MEM TUNGWATU NYA

Tungwatu nisibutti kin Allah nisingatti

¹ Doia Daud di tuhan de awak mem no di bie tut doia nimpung.

Tungwatu nisibutti

² Sisar pijuk no di sibut ningon bei nyahan bibindei ba, noni ttin tut Allah bi sren.

³ No dima kon nonti nok no di mipbor ngat apino ningon guhukti tut nitunggweisi nya bi. Ningon hukti bi apino ningon gimpo tut niyai munti di kinei nya bi a.

⁴ Nihyet di simbot kep nya kinei bibor bimpung tut niris munti cem. Leu ba, nibon mun di keisi nya gibon ninyeng mem noni bi.

⁵ Noni tin ei ningon kanti di kinei bibor tirigi bong nibongti. Nibon munti nya hi di kei bi ba, girok mun di kinei nya cem bi.

Allah nisingatti

⁶ tuhan e, angon ngakeisi kui sur mpia-bbed him ba, angon gomti kui bipek kin bumbuhui nijunti.

⁷ Ade nisingatti kui sur nungug dip ba, Ade ningon sren-srausi jut bibor bidem muk ndigsi nijutti. tuhan e, anyohou tungwatu kin mindhe-ndhe nya.

⁸ Allah e, angon ngakei tungwatu nyati bon ninyeng nindig bibor. Yoni igwam coi anyehei behei ba, anyohou yok.

⁹ Ingon cut hon njita di mpung bipias hagau ei Ade Ig. Asindui sut ba, nidut minyei di biam kwei leu angon singat tut nyeti.

¹⁰ Nani ne niyaijo nibousi mem mun di ninnei tau nuhwap nsi hagom ri. Tirigi Ade nipigati piga digai nye lene nipigati jo nibreisi mem nye.

¹¹ Dijoi sut gima angon ngakei yo di iba ingon com Nani. Ma asingat tut yo di ingon sren nya.

¹² Ma asindui sut ba, yo di ingon jei icut igkep dani ba, yo di isibut yuhuk da cem au.

¹³ Jingat i! Yo di ibon kep mun di kinei bibor icut tu. Icut bibong sinsiou ei ba, gi mbun ikiju hanyen kan bi.