MAZMUR 35 - ALLAH NIHYET MEM TUNGWATU NYA

Ningat nadi mem tuhan nimpu nyeti

¹ Doia Daud. tuhan e, ahwen yo di ihwen da lene akon pran bit yo di ikon pran bit da.

² Asu anda kep Ade micim kin mun di abipukep tibor ninggwenti nya ba, akiju kwei ba, ampu da.

³ Asu anda kep Ade micim kin Ade oi di bon ninggwenti bei ninghim noho leu binhyepo ahwen yo di igyon igkep da. Apreu ei mem da bipia Nani ne No di teu da bidingwes ngun ri.

⁴ Handei kon ba, hi bindei timek yo di ijoi sut igyai nimai bida leu binhyepo immai sut yonti hak ug. Handei kon ba, yo di igyok ingon gom mem gima ihwen bit da isu jou kep inghim dip ba, ingon tai-tai bou cem.

⁵ Handei kon ba, tuhan de malaikati huk yok ba, idem kep biei nnir di ndung-diem di hou yai di bit hou nimig.

⁶ Handei kon ba, tuhan de malaikati huk yok kak puig di dindi-kai kin puig di bindei ba, idilleu bicut bibor cem.

⁷ Yo dima indin bon ser da bipi bisrou da lo, gima yok mikui-kausi he. Itig jui mem gima ipi bibikat da lo, gima cem mikui-kausi he.

⁸ Handei kon ba, itug ndei nisar ningwig krosti ba, ibiam ide bon leu api icut bisar hak ug.

⁹ Lene midimbos-hi-mbos tut tuhan ninyenga. Dingon cem minggei-hi-nggei lewo tuhan teu da bidingwes ngun.

¹⁰ Diba dingon titut yam bipai “tuhan e, hi noyam kin Nani bi! Apas no di sindem bi leu no di sindem ninda nsi kin no di nuhui mbum kin no di yai ninghuisi wei leu no di co kep yok ninda nsi.”

¹¹ Yo di isibut nya ikiju ei nikei noho bei bipai kep da mikuisi biris mun ei da dip. Ipai bipia dibon mun di mbuk di dikan tut bi nya.

¹² Iba igyai munti di kinei bibor bibuhup diyai munti di kei ba, disar hak ei ningon di hai biborti.

¹³ Noro mpe dino yo dima icut ei ninggwenti ne dingon ngguk tut yok lene diyem njita cem bi ba, duhuk bou bidingat nadi tindei yok,

¹⁴ noyam kin gi dingat nadi tindei ditde adig-ajoi kin disut. Dindun bou bidipim tut yok tereu nok dingon ngguk tut dipmem pimo.

¹⁵ Noro mpe dino dingon buhun lene yoni ingon kei drek dip ba, ingwig kep da mem gima ihwen bit da. Iba intig di kibou-kibou yam bimbut nok yo di iba ighyet bicig da.

¹⁶ Iba ingon di sibui bitou kep da noyam kin gino iba no di nimig lit bikek.

¹⁷ tuhan e, aba ayai ngat yok he ei njap pig bu i? Ateu da bidingwes ngun leu ide ninjei siceu kweisi dima ba, ateu da bidingwes ngun leu yo di inok mindhe singa dima yok.

¹⁸ Leu api midipai sigyo bina ei Ade limwa nya ikieti ba, dikon anyeng ei mpe di induk yam ei nok gom.

¹⁹ Ma asindui sut ba, yo di imbuk tut da iba da bikek mikui-kausi au. Ma asindui sut ba, yo di ingon sibui sut da imbos-hi-mbos bingon kei kep da mikui-kausi au.

²⁰ Iba ighyet di nem bi bimbrap bitin ei ingonti mem gima iris mun ei yo di ingon kwes kin yamti.

²¹ Isrep huk da bipai “Ningat ade nibon mun tunggweisi tu.”

²² Noro Na di tuhan angat mun dima yok hagom tu. tuhan e, ma aba aji di buhun bikimut ahui ba, agwam ting leu dani au.

²³ Akiju ba, ambrap gau da. Ditde Allah e, ampu da o!

²⁴ Ditde tuhan Allah e, ambrap gau da lewo angon sren-srau. Ma asindui sut ba, ditde siceu nya ingon kei kep dani au.

²⁵ Ma abigen ser yok tirigi inyohou pai biyam “Sigyo, nyeni ningon kanti pek kep mem noni ba, niyai nimai bak noni tu!”

²⁶ Handei kon ba, yo di ingon kei kep da drek dip dinghuisi weisi nya ingon tai-tai bou ba, igwam nimmaiti ug. Handei kon ba, yo di ipai sut yonti bipia ikei-kau dor njiriek da pima cem igwam nimmaiti ug.

²⁷ Dijoi sut gima yo di ijoi sut nikei tti kin da bipai sut da bipia dingon ngun nya iba ingon di nggei-hi-nggei bimbos-hi-mbos. Dijoi sut gima ipai-pai nyen “Jit jit tuhan kei-kau-kei ri! Ningon kui sut gima Nide awak yai mun bipek nipekti!”

²⁸ Leu api miditri tut angon sren-srausi ba, dibikon anyeng bijo njap jei.