MAZMUR 33 - ALLAH NIHYET MEM TUNGWATU NYA

Doia nibinggei sut tuhan

¹ Je di jingon sren e, jikwei ba, iba nimbos-hi-mbos binggei sut tuhan niyai munti nya. Je di jibit tuhan nihyet e, jikwei ba, ikon ninyenga.

² Ma jiba jide nggong nya bikwei pai sigyo bak tuhan. Ma jiba jide nggong mbrei nya bikwei pai doia ei Noho bei.

³ Jikwei ba, ipai doia di nijep-jau bibiwim Noni. Nikek nggong mbrei cig jen e, ma jikek nok mungkun kei. Ma jiba nimbos-hi-mbos binggei sut Noni.

⁴ tuhan nihyet hagom jit-jau ba, niyai munti nya ndo igbit ningon gomti.

⁵ tuhan ningon ngakei ningon di kwes-kwau kin ningon di sren-srau. Ningon ngakei nyeti ug hon nohonti bi bikieng kep dihyeisi dini hagom.

⁶ tuhan pai tes mpia-bbed him tug hon nicukti. Noni pai tes mpia njap kin bed mmun kin ham mpia-bbed him nya hagom tug hon nihyet di tibim ei nuhui him.

⁷ Noni hajung muk ndigsi hagom bijo ei mpia tou nsi gom lene kat kep muk jou titut yam ug ei ugyousi gom.

⁸ Je di tungwatu dihyeisi dini hagom e, suar jikuk je bak tuhan. Je di jikieng kep dihyei nisurti-nipekti hagom e, suar jikon ninyenga.

⁹ Noni hap niji bipai tes dihyeisi dini hagom. Tirigi Noni kes nicukti lene nipai testi hagom tau hak ei nibreisi.

¹⁰ tuhan tte tut keret dihyeisi dini ingon kanti nya bibindei ba, hagom cut hacan. Noni bigen ser yok leu binhyepo igyai kep ingon kanti nya kan bi.

¹¹ Noro ningon kanti nya kin nikos tutti nya ngkiem kei bijo ninno bijo kikau.

¹² Mben dino ikuk yok bak tuhan nok ide Allah ne ingon nggei-hi-nggei. Mben di Noni dimig ei nok nide limwa nya tu ingon nggei-hi-nggei!

¹³ tuhan gwam nuhu kwei ei gwamti bicap kwei ei dihyeisi dini bingat tungwatu nya yahagom.

¹⁴ Noni gwam nuhu kwei ei nide banggo mbrei dip bicap kwei ei dihyeisi dini bingat yo di ikieng kep dihyei nisurti-nipekti.

¹⁵ Noni pijuk yahagom ingonti biyai nisindemti biyok leu binhyepo ikan-kan nyen. Noni kan bidem tut igyai munti nya hagom.

¹⁶ Nibou ndig bindei timek nide siceu nya bingwig tug hon nide tentara ide nisindemti bi. Bit bon nikon kep pran cig hwen nide siceu tug hon nide nisindemti cem bi.

¹⁷ Kuda pran sindem mem no di bri bigwam dip bico kep nide siceu nya kan bi. Mbro nok gino kuda dima anjan bibor lo, bit bon noni teu no di bri bigwam dip ningwes ngun kan bi.

¹⁸ tuhan nyohou yo di ikuk yok biNoni kin yo di iba ingon com ningon ngakei yokti di jo ninno bijo kikau.

¹⁹ Noni teu yok bingwes ngun leu nimai binyohou yok ei nijam di ninggum hwen tungwatu nyati.

²⁰ Nyeni niba ningon com tuhan lewo Noni ya srak ko hagau nye binyohou nye.

²¹ tuhan niyai munti nya bindei ba, nyeni ningon llei bibor. Niba ningon com Noni lewo Noni kwes-kwau kei.

²² tuhan e, Handei kon ba, angon ngakei nyeti di jo ninno bijo kikau minyohou nye lewo niba ningon com Na.