MAZMUR 32 - ALLAH NIHYET MEM TUNGWATU NYA

Nipai jit sisarti bie ndam nikos ser sisarti

¹ Daud ba doia bikiek ningginausi. Bikwop yo di ipigau hanjop lo, tuhan kos ser ide sisar tu lene yo dima ingon nggei-hi-nggei lewo Noni ji kep ide sisar tu.

² Bikwop yo di ibon sisar lo, tuhan yok ngon kep ide sisar bu bi lene yo dima ingon nggei-hi-nggei lewo iba ingon can biris ei hiterti bu bi.

³ Nipou tirigi dipai jit ditde sisar bigyo ne diyai nggwei kibor ei njap jei bibindei ba, dinghuisi jet.

⁴ tuhan e, ahwen bit da bikwop mmun-njap apino ditde nisindemti pren hak leu da dem kep nok mpia di wam bibindei nindotti pingge hanyen.

⁵ Leu api dipai jit ditde sisar brei biNa bidiku ditde mun di diyai tunggwei nya nyahan bu bi. Dikan “Singkwei ba, sipai jit side sisar bak tuhan. Apino akos ser ditde sisar hagom bidingon mui bu bi.”

⁶ Gima rino ma yo di ingon gom nya ingat nadi tirigi mun di buhun cut igkep yok. Gino mun di buhun dima dem kep nok minyei di su lo, mihwen yok bi.

⁷ Na di tuhan anok hak mihyeti di diku da nyahan eisi lewo akwek da leu mun di buhun tak da. Diba dingon llei bibor bipai doia lewo ateu da bidingwes ngun tu.

⁸ tuhan pai “Midindo puig di suar akak bina bidingginau nani ba, dipingok angonti tut ambutti nya cem.

⁹ Ma anok kuda di mbut-mbut wai au. Tungwatu nya iba kuk kin ngkimom nitu buhum kuda nuhwap jou leu binhyepo mbut-mbut wai bi.”

¹⁰ Yo di isibut nya mitug ndei mun di buhun bibor. Noro tuhan ba ningon ngakeisi binyohou yo di iba ingon com Noni.

¹¹ Je di jingon sren e, ma jingon kei bibor bijiyai nillei drek dip tuhan niyai munti nya. Je di jibit tuhan nihyet e, ma jiba jingon di llei bimbos-hi-mbos binggei sut Noni!