MAZMUR 31 - ALLAH NIHYET MEM TUNGWATU NYA

Doia niba ningon com Allahti

¹ Doia Daud mem no di bie tut doia nimpung.

² tuhan e, digwam coi Nani. Ma asindui sut ba, hi bindei timek da au. Ateu da bidingwes ngun tug hon angon sren-srausi.

³ Amiap kep dihyet ba, ateu da leu mun di ngot kep da haninyai. Abindei ba, anok nungug tig di digwam coi bidigwam nding eisi. Anok tentara nibousi di diya coi bidingwes ngun ei niti.

⁴ Igbit ri! Nani ne nungug tig di digwam coi kin tentara nibousi di diya coi bidigwam nding ei niti ri! Abie tut da dem igbit apreu ei mem dati.

⁵ Ateu da leu bansi di ikim mem gima ibisrou da. Lewo Nani ne mpia di digwam coi ri.

⁶ Dikes danti ei anda nsi. tuhan e, Nani ne Allah di ningon gom di miteu da leu mun di ngot kep da.

⁷ Angon mpo tut yo di ikuk yok bak kwar nya. Noro tut dani ne diba dingon com Na di tuhan.

⁸ Dingon nggei-hi-nggei ba, dillei ngwig sut Nani lewo angon ngakei dati ug hon nohonti bi sren. Angat ditde ninghuisi weisi ba, ayok ngon kep mun di buhun di cut igkep da cem.

⁹ Agisindui sut ba, ditde siceu nya ikat da bidisima bi. Noro abindei ba, diyati kwes bidimbut-mbut wai.

¹⁰ tuhan e, angondut da lewo mun di buhun bibor tak kep da. Diyai mpo drek dip gi dipim kikau ba, dinghuisi jet bibor cem.

¹¹ Diyai munti nya ngwig ei dinghuisi weisi ba, ditde njap cem mbut ei ninso-nso nyenti ba, dilua tut cem. Ditde nibon mun di kinei biborti bindei ba, nisindemti cut-cut nyen leu da bidinjum nya cem binggun.

¹² Ditde siceu nya kin yo di dinttig-tta nya yahagom ingwes pri gau da. Tirigi disut bat nya yuum da puig sinon lene inang lewo idigit tut da.

¹³ Didem kep no di mai kin ndigban di kinei di icom ba, ibbwe ser hak.

¹⁴ Mun di bindei ba, dingon nde yon ttai da lene ditde siceu nya ide nahamuisi tibim tut hou ban bei. Igyok ingon gom mem da ba, yuhum yam nsi mem gima igyai nimai bida cem.

¹⁵ Noro tuhan e, diba dingon com Nani. Lewo Nani ne ditde Allah ri.

¹⁶ Anyohou da kikau. Gima rino ma ateu da bidingwes ngun leu ditde siceu nya kin yo di ihwen bit da inda nsi.

¹⁷ Dijoi sut gima ajoi sut da. Ateu da bidingwes ngun tug hon angon ngakei dati.

¹⁸ tuhan e, ma asindui sut ba, nimmai kui dati au. Lewo dahara bak Nani. Handei kon ba, yo di isibut nya itug ndei nimmai biborti leu api acom yok ug ei minu nimai nya ide ba, ei sirima ne hi nihyet tibim bi.

¹⁹ Atak kep ser yo di iris mun igkei nya yuhui hak leu gi iba ingon di jei bipai yo di ingon sren nya kinei a.

²⁰ Ade nisingat tut tungwatuti di atin ei mem yo di ittin tut Nani dima nindig bibor! Tungwatu nya yahagom ingat Ade nisingat tut yo di igya coi Na.

²¹ Aku yok ei anyehei behei ba, igwam nding leu yo di isibut di igyok ingon gom mem yok. Aku yok nyahan ei mpia di anyohou yok leu ide siceu nya ide nihyet nitigut yokti cem.

²² Dinggei sut tuhan! Lewo ningon ngakeisi bibon ninggap leusi nindig bibor mem da mpe di igyon siceu ttai da bihwen da.

²³ Dingon tai-tai bousi bindei bidikan bigya tuhan com da leu Noho bei tu. Noro Noni miap dihyet mpe dino dahara bak.

²⁴ tuhan de limwa jen e, ma jingon ngakei Noni. Lewo tuhan nyohou yo di iba ingon di gom bibit nihyet noro ba nihig ningon ei yokti nyen bi bikes hukum ei yo di ikon yonti dip.

²⁵ Je di jiba jingon com tuhan jahagom e, ma jingon ngkiem ba, jingon nddong cem!