MAZMUR 26 - ALLAH NIHYET MEM TUNGWATU NYA

No di yai mun tunggwei bi ngat nadi

¹ Doia Daud. tuhan e, asimbot dat bipia dingon sren lewo diba dingon com Nani. Dihig dingon ei Nati poi mien cem bi.

² tuhan e, ambus dingonti ba, abingon da lene ma aput ser dingon priti kin dikan-kan nyenti nya.

³ Diyok ngon kep angon ngakei dati bidingon gom tut Na kikau.

⁴ Dikou sut gima dibicom yam bit niris kep mun cig nya bidimbres da leu yo di ingon mang nya cem.

⁵ Dijem disut bit yo di isibut nya bi. Doom danti leu nimpung nibon kep mun di kinei bibor cig nya.

⁶ tuhan e, dipiap dinda lene gima bindo tut bipia ditunggwei sut Nani bi. Leu api dimbut nyen ttai Ade nimbar hum dok.

⁷ Dipai doia nibipai sigyo ba, dibitri tut Ade nibon munti di bibon ninggap leusi.

⁸ tuhan e, dingon ngakei Ade Ig lewo gima ne mpia di agwam tut Ade nikei-kau-keisi di nindig bibor eisi ri.

⁹ Ma ayai nimai bida bit yo di ibon sisar nya ba, akus dinnei leu bit yo di isiber tungwatu nggrom nya au.

¹⁰ Yo dima ibon mun di kinei bibor bijo kikau ba, itindei ser nituti tirigi ibrim mun nibingot kep yokti cem bikwop ug.

¹¹ Noro tut dani ne diba dingon sren kei bidimig diyaijoti. Gima rino angondut da ba, ateu da leu mun di kri kep da!

¹² Lene midingwes ngun leu mun di nahanok micut igkep da. Midinggei sut tuhan bit Nide limwa di induk yam ei gomti nya.