MAZMUR 25 - ALLAH NIHYET MEM TUNGWATU NYA

Nadi di ingat leu binhyepo Allah bie tut yok binyohou yok

¹ Doia Daud. tuhan e, dibindei kui ditde nadi biNa.

² Ditde Allah e, diba dingon com Nani! Ma asindui sut ba, dimmai mpe dino ditde siceu nya ibindei cut da bingon kei kep da au.

³ Yo di yaham di imbuk kep Nani mitug ndei nimmai sut yonti drek dip. Noro yo di iba ingon com Nani mingon nghen leu bi.

⁴ tuhan e, ando angon kanti bida. Ando mun di suar diyai kep nya bida.

⁵ Angginau da ba, abie tut da cem leu binhyepo didimig diyaijoti bit leu angon kanti mem da. Lewo Nani ne Allah di teu da bidingwes ngun leu ditde siceu nya ri. Diba dingon com Na kikau.

⁶ tuhan e, ayok ngon kep Ade nisingat tut nyeti kin angon ngakei nyeti di ando binye ei nimbie him ngat kwei bipek ammani tu.

⁷ Akos ser ditde sisar kin ditunggweisi nya di dibon habiei leu dipilei kwei su nya. Ayok ngon kep da lewo Nani ne Na di angon ngakei Ade limwa nya rin ba, asingat bibor.

⁸ tuhan ndo puig bak yo di israwir nya lewo Noni kei ba, ningon gom cem.

⁹ tuhan bie tut yo di iba ibou coi mem Noni bingginau yok tut Nonti ningon kanti.

¹⁰ Noni ba ningon ngakeisi kin ningon di gomti bimpu yo di ikrau kep Nide nipreu ei mem yokti kin nisok kep yokti nya.

¹¹ tuhan e, akos ser ditde sisar bit leu Ade nipreu ei mem dati. Lewo diyai mun tunggweisi nindig bibor.

¹² tuhan ngginau yo di ingon gom nya tut puig di suar imbut kak.

¹³ Yo dima ibong kei igwam kei ba, ide nintun him yamti di bram yam nya miba yokep dihyei ninda rom di ide nya.

¹⁴ tuhan ne yo di ingon gom nya isut rin bimbot kep tut ningon kanti biyok.

¹⁵ Diyai jo kep tuhan nggilun mem nituti hagom leu api Noni teu da leu mun di nahanok micut igkep da.

¹⁶ Angig ayai kep da lene angondut da lewo dingwes srek ba, ditde siceu nya ihwen bit da.

¹⁷ Ditde ningon buhunti kum eisi kikau. Ateu dani leu ditde mun di buhun di kri kep da.

¹⁸ Aba angon bisrip huk mun di buhun tak da kin ditde siceu nya di ihwen bit da. Lene akos ser ditde sisar nya hagom.

¹⁹ Angat i! Ditde siceu nya imang bibor ba, ingon mpo tut da cem.

²⁰ Acuon ser diyaisi ba, ateu da bidingwes ngun leu binhyepo dimmai sut danti bi. Lewo diya coi Nani.

²¹ Dijoi sut gima angon singat tut dati kin angon sren-srausi nyohou da lewo diba dingon com Na.

²² Allah e, ateu Ade limwa nya leu mun di buhun di kri kep yok nya hagom.