MAZMUR 22 - ALLAH NIHYET MEM TUNGWATU NYA

No di ningon buhun ngat nadi binggei sut Allah

¹ Doia Daud mem no di bie tut doia nimpung. Bit leu nihyet nibikiek Rusa Mpe Di Mpia Pri Bicom Nimigsi.

² Ditde Allah e, akes da ei leu binggon i? Anggon rino ambres Nanti ei minu ting ba, angkek ndok tut da lene angig atingou mem dihyet cem bi i?

³ Ditde Allah e, dahara Na mem mmun-njap noro abuhup dihyet bi. Dingat nadi mem mmun noro dingon jo nyahan bi sren.

⁴ Gi nok lo, agwam ei anai nok Nibou Ndig Di Kwes-Kwau ei Ade banggo mbrei dip. Mben Israel ikon anyenga.

⁵ Nyeni nidigup bat-nidigai bat nya iba ingon com Nani. Gima rino ateu yok ba, ingwes ngun.

⁶ Yahara Nani lene ateu yok leu mun di buhun ba, ingwes ngun. Iba ingon com Na apino ingon pus tut Na bi.

⁷ Dinok tungwatu bi noro dinok adihyeisi he. Imang bibor ingwes pri gau da ba, iba ighyet bicig da!

⁸ Yo di imian huk da yahagom iba da bikek bipu yuhui tut da lene ikit ibou leu da cem.

⁹ Ipai “Aba angon com tuhan bi e? Nggon rino Noni teu na ba, angwes ngun bi i? Gino Noni joi sut na lene nggon rino Noni mpu na bi i?”

¹⁰ Na di Allah e, Nangkom abindei hei da kwei leu dipmem ninghopti leu api dingon jo nyahan tirigi po digwam ei dipmem nimigsi.

¹¹ Diyaijoti no jo nyahan ei anda bia bei bidikuk da biNa cem habiei dimien kikau kwei bipek ammani kep.

¹² Ma ambres Na ei minu ting leu da au. Lewo ditde siceu nya imbris nyahan bikwei dideu su noro hi mpu da bi.

¹³ Ditde siceu nya rinok sapi banteng nya di igyon ttai da. Yoni idem kep nok sapi banteng leu minu Basan di bit bon tungwatu nya ipijuk kan bi ba, itindei ser da.

¹⁴ Sapi dima yok yahap iji dem kep nok mindhe singa di yau-yau nyen bittem da.

¹⁵ Dinghuisi jet dem kep nok minyei di isiber ug ei dihyeiti. Dinjum tuti nya hagom pis ba, dingon dahat leu dem kep nok lilin ngei di jet bingwig.

¹⁶ Dikibou ngak-cai dem kep nok hum pimbang di ndung ba, didwep rap duhui him. Na di tuhan e, akes da bidibong ei dihyei nindungti tereu dimai su.

¹⁷ Yo di bigbehei di isibut bibor nya ingwig ttai da. Yoni inok nsien di niten-pos nimpung gom di yaham dimig-dinda nya.

¹⁸ Dinjum nya hagom jo brei bou diyai him bidikwop nimangti. Ditde siceu nya imian huk da tereu nok mun di bindei bigyai ngkek ttin ser.

¹⁹ Yoni iko binggok tut ditde sinsun bikwas hagom tut yam.

²⁰ tuhan e, ma ambres Nanti ei minu ting leu da au! Abrim amig ba, akwei teu da bidingwes ngun lewo Nani ne ditde nisindemti ri!

²¹ Ateu da bidingwes ngun leu ditde siceu di ihwen da kin nsien di niten-pos dini yok.

²² Ateu da bidingwes ngun leu mindhe singa nya kin sapi banteng di niten-pos dini yok lewo dinghuisi jet.

²³ Miditri tut ade midyai nya hagom bak dide bat mben Israel nya. Tirigi idem yam ei ide ig mbusyamei lene midinggei sut Na.

²⁴ Je di Allah de awak nya e, ma jinggei sut Noni! Je di jintun Yakub him e, ma jikon Allah ninyenga! Je di mben Israel e, ma jikuk je biNoni!

²⁵ Allah ningwes pri gau yo di yuhui mbum nya biningkek ndok tut mun di buhun tak yok lene ba ningha bak yoni cem bi. Noro tirigi yahara Noni lene Noni buhup ighyet.

²⁶ Midinggei sut Na di Allah ei Ade limwa nya yahagom yoho bei tut Ade midyai nya hagom. Midibon midut nindig mindhe kep humti ei yo di ikuk yok biNa yoho bei bit leu nok dipreu ei mem Nani tu.

²⁷ Nuhui mbum nya mikwei yem njita bindei yok bit leu ingon kanti. Yo di induk yam kwei ndam Na yahagom minggei sut Na di tuhan. Dijoi sut gima jibong kei jigwam kei bijo ninno bijo kikau!

²⁸ Ngkiai nya yahagom mibisrip tut tuhan leu api yahagom mingkwei ndam Noni hanyen bikuk yok bak.

²⁹ tuhan ne nibou ndig rin ba, ninyeng tak kep ngkiai nya yahagom.

³⁰ Yo di inyeng jei nya yahagom mikuk yok ei nimig him. Tungwatu dihyeisi dini yahagom mikuk yok ei Noho bei.

³¹ Tungwatu dihyeisi dini ide nintun him yamti di bram yam nya mikuk yok bak tuhan. Yoni mitri tut Noni bak yo di intun him yok nya sindam.

³² Tungwatu nya mitri tut tuhan niteu Nide limwa nya bingwes ngunti bak yo di isrek ei nidipti bu.