MAZMUR 21 - ALLAH NIHYET MEM TUNGWATU NYA

Doia nipai sigyo bak Allahti drek dip nibou ndig di bindei timek nide siceu nya

¹ Doia Daud mem no di bie tut doia nimpung.

² tuhan e, nibou ndig ningon nggei lewo asindem tut noni tu. Noni yai nillei lewo abindei ba, noni bindei timek nide siceu nya leu api,

³ ningon kanti kin mun di hara Na tut nya pek kep mem no tu.

⁴ Na di Allah aya um nibou ndig ba, anjei mun di kei mpung bipias hagau bak lene aba topi mas bijuk nibou cem.

⁵ Noni hara Na mem niyaijo lene ayai niyaijo bak he bi noro ayai nide njap di jei bijo ninno bijo kikau cem bak.

⁶ Noni yai ninyeng jei bibor lewo ampu noni apino ninyeng tibim bidem minu. Gima rino yo di yahagom ibou cut binoni bibor.

⁷ Ayai mun di kei binoni bijo ninno ba, Angat rima bit noni apino gima biyai ningon mpung tut ningon lleisi cem.

⁸ Nibou ndig ba ningon com tuhan Di Ninyeng Jei ba, ningon jo nyahan lewo tuhan de ningon ngakei noti ug hon nohonti bi sren.

⁹ tuhan mibindei sima Nide siceu nya yahagom lene mikat yo di yahagom di ingon sibui sut Noni cem.

¹⁰ Noni micut igkep yok nok hum di ninjeng cig-cai bibindei sar yok. tuhan miba hum di bindei ngkiong yok bidip tut yok tug hon nigga biborti.

¹¹ Ide nintun him yamti di bram yam nya hi dima niken jo bi. Lewo nibou ndig micok tut yahagom.

¹² Mpe dino igyok ingon gom mem gima ihwen bit nibou ndig lene ide nuhum yam nsi dima mipek kep bi.

¹³ Noni mikri nide tibor bikes bibindei ba, ikiek kep inghim dip binang.

¹⁴ tuhan e, nikon anyeng lewo Ade nisindemti nindig bibor. Niba doia bikon anyeng bitut ayai munti di mindur nya.