MAZMUR 20 - ALLAH NIHYET MEM TUNGWATU NYANadi di ingat mem nibou ndig leu binhyepo bindei timek nide siceu nya 1 Doia Daud mem no di bie tut doia nimpung. 2 Handei kon ba, tuhan buhup ahyet mpe dino mun di buhun buhun tak na. Handei kon ba, Yakub de Allah nisindemti nyohou na! 3 Handei kon ba, Noni ba ninda di su kwei leu Nide Ig ei Mbigdip Sion bimpu na. 4 Handei kon ba, joi sut Ade midut nibikuk na biNoniti nya hagom ba, ningon kei sut Ade midut nindig mindhe ei nimbar hum dokti nya cem. 5 Handei kon ba, Noni yai mun nyeng di allei sut nya hagom bina bibindei ba, Ade nikos tutti nya hagom mipek kep mem na. 6 Leu api miniba ningon di nggei bimbos-hi-bos tirigi abindei timek ade siceu nya biniba kendera bikon ide Allah ninyeng cem. Handei kon ba, tuhan buhup igbit mun di ahara No tut nya hagom. 7 Nogindini dikan tut bipia tuhan yai nisindemti bak Nide nibou ndig di Nonti dimig ei su leu binhyepo bindei timek nide siceu nya. tuhan gwam ei Nide mpia di kwes-kwau ei gwamti bibuhup nibou ndig nihyet. Nibou ndig ba tuhan de nisindemti bibindei timek nide siceu nya. 8 Tungwatu bihi iba ingon com ide kroba pran nya lene bihi iba ingon com ide kuda nya. Noro tut nyeni ne iba ingon com ide tuhan Allah bitut Nide nisindemti. 9 Yo pima mindrat mpia bicut noro nyeni mikiju bigya ngkiem kei. 10 tuhan e, handei kon ba, abindei ba, nibou ndig mibindei timek nide siceu nya. Abuhup nadi di ningat ei mpe di nahara Nani. |
@ LAI 2009
Indonesian Bible Society