MAZMUR 16 - ALLAH NIHYET MEM TUNGWATU NYA

No di ngat nadi kin gi ba ningon com Allah

¹ Doia Daud. Allah e, ma aya srak ko hagau da lewo diba dingon com bipia Nani rima anyohou da.

² Dipai “Ditde tuhan e, anok nibousi mem mun di kei bibor kei hagom lewo hi ninyeng jei dor njiriek Na bi!”

³ Dikon yo di ingon kwes-kwau nya ei minu dini inyenga. Tirigi dingat rin bit yok lene dillei ngwig sut yok.

⁴ Yo di ikuk yok bak kwar nya mitug ndei mun di buhun tak yok nindig bibor. Midinjei bit yok tirigi ibon midut nindig mindhe-ndhe nya kep hum bak ide kwar nya ba, midindat kep kwar dima yok inyeng ei duhui him bi sren.

⁵ tuhan e, dinyeng tut Nangkom he. Ayai mun di disuar nya hagom bida ba, mun di mipek kep mem da jo nyahan ei anda bia bei cem.

⁶ Mun di akwas tut da hagom kei bibor kei bindei ba, dingon llei bibor!

⁷ Dinggei sut tuhan lewo Noni pingok dingonti kan. Tirigi dibong mem mmun lene dingon mien sok kep danti cem.

⁸ Dingon huk niti tut tuhan ba, Noni ya bibie doho bei kikau. Noni ya kui dinda com apino mun nyeng hi bindin da bi.

⁹ Gima rino dingon llei-lau ba, dinnei mbos-hi-mbos. Mbro nok gino dingut dini mipror yon lo, dingon jo nyahan lewo diba dingon com Na.

¹⁰ Leu mporo asindui sut ba, dinnei ug bisrig yo di imai nya ikieti bihigom bi ba, ace tut Ade awak di ningon gom ningut mikroi ei bi.

¹¹ Ba, ando puig di bie tut da ndam niyaijo nijep. Dingon llei bibor ba, dingon nggei-hi-nggei cem bijo ninno bijo kikau lewo aya kui da.