MAZMUR 135 - ALLAH NIHYET MEM TUNGWATU NYA

Doia nibikon Allah ninyenga

¹ Ma jinggei sut tuhan! tuhan de awak jen e, ma jinggei sut tuhan.

² Je di jikuk je ei tuhan De Ig e, ma jikon ninyeng ei Nide mpia di Ningat rin eisi.

³ Ma jinggei sut tuhan lewo Noni kei-ngat-kei. Ma jikon Ninyeng lewo Noni singat kei sut nye.

⁴ Noni dimig yo di intun Yakub him ei mem Nonti bikon mben Israel bou No nok Nide.

⁵ Lewo dikan tut bipia tuhan nindig bibor ba, ninyeng jei bibor dor njiriek kwar di ngkiai nya ikuk yok bak hagom.

⁶ Noni yai igbit ningon kanti ei mpia-bbed him kin dihyeisi dini kin muk ngeisi kin muk ndigsi di jut bibor cem.

⁷ Noni bindei ba bumbuhui kwei leu dihyei nohon keti bibindei ba, kigyei ninjeng srei mem bed di biang biget leu api cuk hou behei leu mpia di kes kep yam eisi.

⁸ Noni yai nimai bak munggwom mighumbou nya kin mindhe-ndhe nipmot bou nya yahagom ei minu Mesir.

⁹ Noni bon mindur kin bindo nya mang bibor mem gima bikes hukum ei nibou ndig kin yo di igya kui noni yahagom dip.

¹⁰ Noni bindei sar ngkiai nya imang bibor ba, yai nimai bak nibou ndig di mimbri kui ingkek nya.

¹¹ Nibou ndig dima yok rino Sihon di nok nibou ndig mem mben Amori kin Og di nok nibou ndig mem mben Basan kin nibou ndig minu Kanaan nya yahagom.

¹² Leu api kes ide dihyei di igya niti bak Nide limwa mben Israel binok ide dihyei ninda rom.

¹³ tuhan e, tungwatu nya mitri tut Nani kikau buug hon nohonti bi ba, ide nintun him di bram yam nya yahagom miyok ngon kep anyeng.

¹⁴ Lewo ambrap gau Ade limwa nya ba, angondut Ade awak nya.

¹⁵ Ngkiai nya iba perak kin mas bibon ide kwar nya bou inda him.

¹⁶ Ide kwar nya imbun yuhui noro igimbrap kan bi. Imbun igyai noro igingat mpia kan bi.

¹⁷ Imbun itingou noro igimiap nibimbiti kan bi. Innei gitau ei ihwap nsi cem kan bi.

¹⁸ Handei kon ba, ma mun dima yok hagom cut igkep yo di iba ingon com kwar dima yok.

¹⁹ Limwa mben Israel kin je di imam nya e, ma jinggei sut tuhan!

²⁰ Je di jintun keret Lewi him kin je di jikuk je bak tuhan e, ma jikon ninyenga.

²¹ Ma jinggei sut tuhan ei Sion kin minu ndig Yerusalem di nok Nide mpia di ningat rin eisi cem. Ma jinggei sut tuhan!