MAZMUR 132 - ALLAH NIHYET MEM TUNGWATU NYA

Doia ninggei sut tuhan De Ig

¹ Doia nikui ug ei Mbigdip Sion. tuhan e, ma angon prion ser Daud kin mun di buhun bibor di tak kep noni hagom au.

² tuhan e, ma ayok ngon kep mun di noni preu ei mem Na di Yakub de Allah Di Sindem Bibor tug hon neheng.

³ Noni pai “Midingkwei hanyen ei ditde ig bidibong kep dinghuisi ba,

⁴ dibong nyek cem dibong mai cem bi,

⁵ bibou dingot ig mem Yakub de Allah kin nghim nsi gom mem tuhan Di Sindem Bibor ug e.”

⁶ Nyeni nimiap tut Brua Gi Preu ei Betlehem leu api nittau kep brua dima ei susti dideu Yaar.

⁷ Nipai cuk yam “Jikwei ba, yuug ei tuhan De Ig ba, ikuk nye ei Nide banggo mbrei nikiou.”

⁸ tuhan e, ma akwei sut Brua Gi Preu di bindo tut Ade nisindemti leu api acoi ug ei Ade Ig ba, abong ei mpia dima bijo ninno bijo kikau.

⁹ Abindei ba, Ade imam nya igyai munti nya bit leu nok angon kanti mem yok ba, Ade limwa nya iba ingon di llei bimbos-hi mbos.

¹⁰ tuhan e, apreu ei mem Ade awak di Daud tu. Gima rino ma arok noni ei au. Lewo adimig noni ei su.

¹¹ Apreu ei mem noni tug hon neheng tu. Ba, angkwei leu nipreu eisi dima bu au. Nipreu eisi dima pai “Midikon apmot gom nok nibou ndig ba, noni miya luei ahoti ba, ninyeng mitak kep mben Israel.

¹² Gino apmot bat nya ikrau kep nipreu eisi dima kin Ditde nicuk yokti nya lene yo di intun yoni him migya luei yam hoti bu binok nibou ndig nya sindam bijo ninno bijo kikau.”

¹³ tuhan dimig Sion ei bindo minu ndig dima nok mpia di Noni bong ser.

¹⁴ Noni pai “Midibong ser mpia dini bijo ninno bijo kikau. Dani dijoi sut minu dini binok nibousi mem Ditde ninyeng tak kep limwa nya.

¹⁵ Midinjei mun nyeng di timiei Sion nya isuar hagom bak yoni. Midikwas njita nok gi dem tut yo di yuhui mbum nya leu binhyepo igyem bindei yok.

¹⁶ Imam nya ei Sion mindo Ditde puig di bindei ba, igyai niteu leu ide sisarti biyok. Timiei minu dima miba ingon di llei bimbos-hi mbos.

¹⁷ Midikon tungwagom di ntun Daud him ninyeng nok nibou ndig di sindem bibor ei Sion. Midibindei ba, ninyeng tak kep limwa nyati ei minu dini ug hon nohonti bi sren.

¹⁸ Ninyeng di tak kep mibindei ba, tungwatu nya ibong kei igwam kei bijo ninno. Noro midinim kep nide siceu nya yahagom.”