MAZMUR 122 - ALLAH NIHYET MEM TUNGWATU NYA

Doia nibinggei sut minu ndig Yerusalem

¹ Daud de doia nikui ug ei Mbigdip Sionti. Dingon llei nindig bibor tirigi tungwatu nya icuk da bipai “Jikwei ba, icoi ug ei tuhan De Ig!”

² Nogindini nikwei krau binicoi kak dimbou pmem minu ndig Yerusalem tu.

³ Tungwatu nya iwin bikinding minu ndig Yerusalem ba, inyohou dimig ig hagom nok gi kei bibor.

⁴ Keret mben Israel di tuhan dimig ei su nya induk yam kwei ei mpia dini leu binhyepo ipai sigyo hanyen biNoni bit leu nok nicuk yoti.

⁵ Nibou ndig di intun Daud him nya imbus ide limwa nya ingonti ei mpia dini.

⁶ Jingat nadi tindei nibong kei nigwam keisi mem minu ndig Yerusalem bijipai “Dijoi sut gima yo di ingon ngakei minu ndig Yerusalem ibong kei igwam kei ba,

⁷ yo di ibong ei minu dini ingon kwes kin yam. Ma yo di inang bicoi ug ei ade tentara nibousi nya ibong kei igwam kei.”

⁸ Dipai bak timiei minu ndig Yerusalem “Ma jahagom jibong kei jigwam kei!” Lewo dingon a tut dide bat kin disut bat nya di ibong ei sirima.

⁹ Dingon a tut ide tuhan Allah De Ig. Gima rino dingat nadi leu binhyepo timiei minu ndig dini ibong kei igwam kei.