MAZMUR 121 - ALLAH NIHYET MEM TUNGWATU NYA

Ninang coi tuhan ti

¹ Doia nikui ug ei Mbigdip Sionti. Dicap ser nungug him nya bidingat no di mpu da mikwei leu hantou i?

² tuhan di pai tes mpia-bbed him kin dihyeisi dini mikwei mpu da.

³ Noni misindui sut ba, acut ug ei nikineisi bi lewo Noni bong nyek ser na.

⁴ No di ngkiem ser mben Israel niyai nggrop buhun bibong mai bi sren.

⁵ tuhan miya ser na ba, ngkiem ser na cem.

⁶ Mpia njap mibindei ba, anggwen mem njap bi, bed mmun mibindei ba, anggwen mem mmun cem bi.

⁷ tuhan miya ser na leu binhyema mun di buhun bibor cut igkep na bi. Noni miteu na ba, angwes ngun apino ayaijo a.

⁸ Noni miya ser na mpe di angkwei-ngkwei nyen mem njap di ammani kui bijo ninno bijo kikau.