MAZMUR 119 - ALLAH NIHYET MEM TUNGWATU NYA

Doia nibinggei sut tuhan nicukti Nya No di bit de nicuk noti ningon nggei-hi-nggei

¹ Yo di ingon kwes di ibit tuhan nicukti nya ingon nggei-hi-nggei.

² Yo di ibit tuhan nicukti ba, iba ingon titut biyai hamem gima ikan tut Nide nicukti nya ingon nggei-hi-nggei.

³ Yo di ibon mun di kinei bi di idimig ide niyaijoti ba, ibibit tuhan ningon kanti nya ingon nggei-hi-nggei.

⁴ tuhan e, ayai Ade nicukti binyeni leu binhyepo niba ningon di gom bibit nicukti dima.

⁵ Dibingwam ndam gima diba dingon di nddong bibit Ade nikos tutti nya.

⁶ Gino dingig ditingou mem Ade nicukti nya hagom lene midiyai nimmai drek dip bi.

⁷ Mpe dino dipikor tut Ade niggai serti di sren kei ne midiba dingon di kwes bikon anyenga.

⁸ Midibit Ade nicuk dati nya hagom. Ma akes da gom ei cem au.

Niyai igbit tuhan nipingokti nya

⁹ Gino pilei nya idimig ide niyaijoti ba, ibibit Ade nicukti nya lene dem mem gima yoni igya ser ide niyaijoti bikwes.

¹⁰ Diba dingon gom biyai hamem gi dikuk da biNati. Asindui sut ba, dikriek leu Ade nicukti au.

¹¹ Dipoi Ade ningginausi ei dingonti leu binhyepo dibon sisar tut Nani bi.

¹² tuhan e, dikon anyenga. Angginau da tut Ade nimbrap tutti nya.

¹³ Diba dihyet nindig bimbrap tut nicukti nya di ayai binye tu.

¹⁴ Dingon llei sut gi dibit Ade nicukti nya ba, hagom bon ninyeng dor njiriek nitug ndei ndigban nyeng hagomti pimo.

¹⁵ Dipikor ei Ade nikos tutti nya ba, diyok diyai kep Ade ningginausi nya.

¹⁶ Ade nimbrap tutti nya hagom bindei bidingon kei. Midibbwe ser Ade ningginausi nya bi.

tuhan nicukti nya bindei ba, ingon nggei-hi-nggei

¹⁷ Ma asingat tut Ade awak di dani ba, aya ser diyaisi leu binhyepo dibit Ade ningginausi nya.

¹⁸ Ada diyai bidingat Ade ningginausi di tug hon Ade nikos tutti nya ba, bibon ninggap leusi.

¹⁹ Dingat rin ei dihyeisi dini lai-lai de. Gima rino ma aku Ade nicukti leu da au.

²⁰ Ditde ningon di ya mem ahyetti dima bindei ba, dingon dut. Disuar gi dingon dorti tut Ade nikos tutti nya bikwop mmun-njap.

²¹ Akon ahyet kep yo di ingon jei nya ba, asigion no di kriek leu Ade nicukti nya.

²² Akwek da leu ighyet di tigut da kin ide nipai kep dati cem lewo diyai kep Ade nicukti nya.

²³ Mbro nok gino yo di inyeng jei nya yuhum yamsi mem Ade awak di dani lo, midiyok ngon kep ayai kepti nya.

²⁴ Dijoi sut Ade nicukti nya lewo dem kep nok yo di ipingok kep dingonti.

Dita dibou ei nibit tuhan nimbrap tutti

²⁵ Dibong ei dihyei ndungti biduhug-duhug nyen. Ma apui ahyet tut diyaisi hanyen bit leu Ade nipreu ei mem dati.

²⁶ Dipai jit ditde nibon munti nya leu api abuhup dihyet tu. Angginau da tut Ade nimbrap tutti nya.

²⁷ Ampu da leu binhyepo dingon hukti tut Ade niggai serti nya leu api midiyok ngon kep Ade ningginausi di bibon ninggap leusi.

²⁸ Dingon di buhun bindei bidingwes srek bibor. Asindem tut da bit leu Ade nipreu ei mem dati.

²⁹ Aom da ei minu ting leu puig srawir ba, aba Ade nisingat keisi bingginau da tut Ade nicukti.

³⁰ Dikos tut bipia dibit ahyet. Dikan-kan nyen tut Ade nikos tutti nya tu.

³¹ tuhan e, dibit Ade nipingok dati nya tu. Asindui sut ba, digwam nimmaiti au.

³² Dingon nggan mem gima dibit Ade nicukti nya lewo abindei ba, dingon huk niti bibor.

Nahara mem ningon hukti tut Allah nicukti nya

³³ tuhan e, angginau da tut Ade nimbrap tutti nya leu binhyepo dibit bipek ningwigsi.

³⁴ Abindei ba, dingon hukti tut Ade nicukti nya leu binhyepo dibit leu api midiba dingon titut yam biyai hagom.

³⁵ Abindei ba, dikrau kep Ade nicukti nya bingkiem lewo Ade nicukti nya dima biyai dingon nggei-hi-nggei.

³⁶ Abindei ba, dijoi sut Ade nicukti dor njiriek leu gi diba doho rok ndigban nindig bibor.

³⁷ Anyohou da leu binhyepo duhuk bram mun di mipror yon au. Abindei ba, diyaijo dem igbit angon kanti.

³⁸ Dinok Ade awak ba, akrau kep Ade nipreu ei mem dati bit leu nok Ade nipreu ei mem yo di ibit ahyet.

³⁹ Aom nihyet mpiei sut dati di dittin tut ug ei minu ting leu da. Ade nicukti nya bibon ninggap leusi bibor.

⁴⁰ Ayai niyaijo nijep bida lewo angon sren-srau. Dibimbeu sut nibit Ade nikos tutti nya bibor.

Niyok ningon mem tuhan nicukti

⁴¹ tuhan e, ando angon ngakei da biborti bida ba, ateu da bidingwes ngun bit leu Ade nipreu ei mem dati.

⁴² Leu api dem mem gima dibuhup bak yo di ighyet tigut da lewo diba dingon com ahyet.

⁴³ Ampu da leu binhyepo mun di nijit tibim ei duhui him bikwop mmun-njap lewo diba dingon com Ade nikos tutti nya.

⁴⁴ Midikrau kep Ade nicukti nya bijo ninno bijo kikau.

⁴⁵ Leu api diyati kwes ba, mun hi ngot kep da bi. Lewo dibingon mem gima dibit Ade ningginausi nya.

⁴⁶ Miditri tut Ade nicukti nya bak nibou ndig nya leu api midiyai nimmai drek dip bi.

⁴⁷ Dijoi sutti rino diyai igbit nihyet Ade nipaisi lewo dingon ngakei nihyet Ade.

⁴⁸ Diba dibou coi mem Ade nicukti bidingon ngakei nicukti dima yok cem. Midiyok ngon kep Ade nimbrap tutti nya.

Niba ningon com tuhan nicukti nya

⁴⁹ Ma ayok ngon kep Ade nipreu ei mem dati di bindei ba, diyok dingon mem Na.

⁵⁰ Mbro nok gino dicut ei ninghuisi weisi lo, nipreu ei mem dati dima rino bigwam ser dingon bisindem tut diyaijoti lewo Ade nipreu eisi bindei ba, diyaijo.

⁵¹ Yo di ingon jei ingwes pri gau da bibor lo, digikriek leu Ade nicukti nya bi.

⁵² tuhan e, diyok ngon kep Ade nikos tutti nya di jo habiei nipou kwei tu leu api gima bigwam ser dingon.

⁵³ Dingon sibui sut yo di isibut bibor nya lewo ikes Ade nicukti nya bijo hak ei tu.

⁵⁴ Diba doia bikiek Ade nimbrap tutti nya mem ditde njap di jei bi ei dihyeisi dini.

⁵⁵ tuhan e, diyok ngon kep Na bidikrau kep Ade nicukti nya mem mpia mmun.

⁵⁶ Ditug ndei ditde ningon nggei-hi-nggeisi tug hon gi dibit Ade nicukti nya.

Ningon gom tut tuhan nikos tutti nya

⁵⁷ tuhan e, disuar Nangkom he bidipreu ei mem Na bipia midibit Ade ningginausi nya.

⁵⁸ Diba dingon titut bahara Na leu binhyepo angon nggriu sut da ba, angondut da bit leu Ade nipreu ei mem dati.

⁵⁹ Diba dingon bisrip huk diyai munti nya bidipreu ei mem Na bipia midibit Ade nipingok dati nya.

⁶⁰ Dibipbur bidibindei mbut Ade ningginausi nya lene ditum dingon tut bi.

⁶¹ Mbro nok gino no di sibut com jala ser da lo, dibbwe ser Ade nicukti nya bi.

⁶² Dikiju mem mmun mmau bidikon anyeng drek dip Ade nikos tutti nya di sren-srau.

⁶³ Dijem disut bit yo di ikuk yok biNani kin yo di ibit Ade nicukti nya yahagom.

⁶⁴ tuhan e, dihyeisi dini mpung tut Ade ningon ngakeisi di ug hon nohonti bi. Angginau da tut Ade nimbrap tutti nya.

tuhan nicukti nya bon ninyeng dor njiriek ndigban

⁶⁵ tuhan e, ayai mun bipek kep Ade nipreu ei mem dati tu. Ba, asingat tut Ade awak di dani.

⁶⁶ Abindei ba, dingon ki ba, ditde nikos tutti nya hagom igbit lewo diba dingon com Ade nicukti nya.

⁶⁷ Nipou tirigi attem da bigyo lene dipigau Ada nipingok dati nya lo, tini bu ne dikrau kep Ade nicukti nya.

⁶⁸ Lewo asingat kei ba, abon mun di kei. Angginau da tut Ade nimbrap tutti nya.

⁶⁹ Yo di ingon jei nya ingwes om kep da bibor lo, diba dingon titut bibit Ade nikos tutti nya.

⁷⁰ Yo dima ingon huk niti bi. Noro Ade nikos tutti nya biyai dingon di kei.

⁷¹ Ade nittem dati kei bibor ba, bindei bidikan tut Ade nimbrap tutti nya.

⁷² Nikos tutti di ayai bida bon ninyeng dor njiriek mas kin perak ei dihyeisi dini hagom.

tuhan nicukti nya sren-srau kei

⁷³ Apai tes da ba, abibon jau da ei dipmem ninghopti. Ayai ningon huk niti bida mem gima dipikor ei Ade nicukti nya.

⁷⁴ Yo di ikuk yo biNa ingon kei tirigi ingat da lewo diba dingon com Ade nipreu ei mem dati.

⁷⁵ tuhan e, dikan tut bipia Ade nikos tutti sren-srau kei. Attem da drek dip angon di gom.

⁷⁶ Asindui sut ba, angon ngakei dati bigwam ser dingon bit leu nok Ade nipreu ei mem Ade awakti tu.

⁷⁷ Angondut da apino midiyaijo lewo Ade nikos tutti nya biyai dingon kei.

⁷⁸ Nna ba yo di ingon jei immai sut yonti drek dip gi iris mun ei da dip. Noro tut dani ne midiba dingon bisrip huk Ade nicukti nya.

⁷⁹ Abindei ba, yo di ikuk yok biNani di ikan tut Ade nicukti nya yahagom ikwei ngat da.

⁸⁰ Abindei ba, dingonti kriek leu Ade nimbrap tutti nya bi leu binhyepo diyai nimmai bi.

Nadi nahara Allah mem niyai gi kwek leu siceusi nya

⁸¹ Diyok dingon mem gima ateu da bidingwes ngun ba, diba dingon com Ade nipreu ei mem dati.

⁸² Diyai nggrop buhun drek dip gi dinggok Ade nipreu eisi nya nitau kep dati. Dipai “Apig bu leu api akwei biwin dingonti i?”

⁸³ Dingkek njui-jua bidem kep aigmui mindhe ngkek di ngak-cai. Noro digibbwe ser Ade nimbrap tutti nya bi.

⁸⁴ Ditum dingon apig bu i? Apig bu leu api akes hukum ei yo di ihwen bit da dip i?

⁸⁵ Yo di ingon jei di ibit Ade nicukti nya bi itig ndep jui mem gima dicut eisi.

⁸⁶ Ade nicukti nya hagom dem mem gima tungwatu nya iba ingon com. Ampu da lewo ibisinggre bihwen bit da.

⁸⁷ Nahanok ma igyai nimai hak bida lo, digiba diyai ngat Ade nicukti nya bi.

⁸⁸ Ateu da bidingwes ngun tug hon Ade ningondut dati di jo kikau leu binhyepo dibit Ade nikos tutti nya.

Niba ningon com tuhan nikos tutti nya

⁸⁹ tuhan e, ahyet sindem bijo ninno bijo kikau ninghig-niker ei gwamti.

⁹⁰ Angon gom tut tungwatuti nya jo kikau bijo nijam jei. Apai tes dihyeisi dini apino dihyeisi dini jo nijoti di bijo a.

⁹¹ Mun nyeng hagom wer awak mem Nani ba, Ade nicukti nya no mbut kikau kwei bipek ammani kep.

⁹² Gino Ade nicukti nya nok nibousi mem ditde ningon nggei-hi-nggeisi bi lene mpaba dinghuisi di wei mibindei bidimai su.

⁹³ Midiba diyai ngat Ade nipingok dati nya bi sren lewo aba nipingokti dima binyohou da bidiyaijo.

⁹⁴ Dijem diceu bit Na. Gima rino ma ateu da bidingwes ngun. Dibingon mem gima dibit Ade nikos tutti nya tu.

⁹⁵ Yo di isibut nya ibet ingon mem gima igyai nimai bida. Noro midiyok ngon kep Ade nikos tutti nya.

⁹⁶ Dingat lo, mun nyeng hagom bon nohonti noro Ade nicukti nya kei-kau ba, bon nohonti bi sren.

Ningon ngakei tuhan nicukti

⁹⁷ Dingon ngakei Ade nicukti nindig bibor. Dikan-kan nyen tut bikwop mmun-njap hagom.

⁹⁸ Ade nicukti ningat rin bit da bikwop mmun-njap bibindei ba, dingon ki dor njiriek ditde siceu nya.

⁹⁹ Dingon dorti tut mun nyeng hagom dor njiriek guru nya di ipingok dingonti yahagom lewo dikan-kan nyen tut apingok dati nya.

¹⁰⁰ Dingon ki dor njiriek andig-ndau nya lewo dibit Ade nikos tutti nya.

¹⁰¹ Dimbres danti leu tungwatu nya igyai munti di kinei nya leu binhyepo dibit ahyet.

¹⁰² Disindui sut Ade nipingok dati nya bi lewo Nangkom ne guru di bie tut da ri.

¹⁰³ Ahyet ui-gwang kei ba, nyop kei dor njiriek ahwei lon ningei cem!

¹⁰⁴ Ade niggai serti nya bindei bidingon ki. Gima rino dingon mpo tut nibon mun hacicanti.

Allah nikos tutti nya piga digai puigya

¹⁰⁵ Ahyet ne ninjeng di bie tut da ba, nipigati di piga digai puig mem da ri.

¹⁰⁶ Midiyai igbit Ade nipingok dati di sren kei nya bit leu nok dipreu ei mem Na tug hon neheng.

¹⁰⁷ Allah e, diyai dinghuisi wei nindig bibor. Ma acuon diyaisi bit leu nok apreu ei mem dati.

¹⁰⁸ Allah e, ma ace tut ditde nadi nipai sigyo binati ba, angginau da tut Ade niggai serti nya.

¹⁰⁹ Mbro nok gino ditin ei mem diyai nimai bikwop mmun-njap hagom lo, dingon prion ser Ade nikos tutti nya bi.

¹¹⁰ Yo di imbuk nya ibon bon bitindei ser da noro diyai mun tunggwei Ade nikos tutti nya bi.

¹¹¹ Ade nicukti nya ne dijem bou da nok ditde mun ninda rom bijo ninno bijo kikau ba, hagom bindei ba, dingon llei nindig bibor.

¹¹² Dikos tut bipia midibit Ade nimbrap tutti nya kikau ug bipek diyaijo ningwig honti.

tuhan nicukti nya cuon diyaisi

¹¹³ Dingon mpo tut yo di ingon gom tut Na bi nya noro dingon ngakei Ade niggai serti nya.

¹¹⁴ Ambrap gau da bidigwam coi Nani lene diba dingon com Ade nipreu eisi nya.

¹¹⁵ Je di jisibut e, ma jimbres jenti ei minu ting leu da! Midibit ditde Allah nicukti nya.

¹¹⁶ Asindem tut da bit leu nok apreu ei mem dati leu binhyepo dimai urung bi. Lene asindui sut ba, dingon pus tut ditde niba ningon comti au.

¹¹⁷ Ahati tut da leu binhyepo dingwes ngun bidiyok ngon kep Ade nicukti nya.

¹¹⁸ Akou sut gi ikriek leu Ade nimbrap tutti nya. Igyok ingon gom mem niris ei tungwatu nya dip lo, igyaisi dima mikui-kausi he.

¹¹⁹ Abibon yo di isibut nya yahagom nok mumpiang he. Gima rino dingon ngakei Ade nikos tutti nya.

¹²⁰ Didigit lewo dittin tut Nani ba, didigit tut Ade nikos tutti nya.

Nibit tuhan nikos tutti

¹²¹ Diyai munti nya sren kei bidiyai mun di igbit he. Ma akes da ei siceu nya inda nsi au.

¹²² Ma apreu ei mem da bipia mporo ma ampu da lene ma asindui sut ba, yo di inggei sut yonti ico kep da au.

¹²³ Dinyohou put-put nyen ser Ade nimpu dati di bindei bidingwes ngun noro diyai nggrop buhun. Diyok dingon mem niteu ningwes ngunti di apreu ei mem da tu.

¹²⁴ Aba angon ngakeisi bibibon da ba, angginau da tut Ade nimbrap tutti nya cem.

¹²⁵ Dinok awak mem Nani. Abindei ba, dingon dor niti leu binhyepo dingon ki tut Ade ningginausi nya.

¹²⁶ tuhan e, nituti dem mem gima ayai abou tut tungwatu nya tu lewo ibit Ade nikos tutti nya bi.

¹²⁷ Dingon ngakei Ade nicukti nya dor njiriek mas di pimbai kei.

¹²⁸ Gima rino dibit Ade nipingokti nya bidingon mpo tut niyai mun tunggweisi nya hagom.

Nibimbeu sut nibit tuhan nikos tutti

¹²⁹ Ade ningginausi nya bibon ninggap leusi. Diba dingon titut bibit hagom.

¹³⁰ Tirigi ambot kep tut Ade ningginausi ne ninjeng piga digai nye ba, biyai ningon ki bak yo di ingon mbum nya.

¹³¹ Dingon ya mem Ade nicukti nya ba, dinnei sor tut.

¹³² Ma akiek aho ndam da ba, angondut da bit leu nok angondut yo di ingon ngakei Na.

¹³³ Abindei ba, dimbut lo, didilleu bi bit leu nok apreu ei mem dati. Ma asindui sut ba, sisar om kep da au.

¹³⁴ Ma ateu da bidingwes ngun leu yo di ico kep da leu binhyepo diyai nisindemti mem gima dibit Ade nikos tutti nya.

¹³⁵ Abindei ba, gi Nani angat rin bit da biyai dingon nggei-hi-nggei lene ma angginau da tut Ade nimbrap tutti nya.

¹³⁶ Diyai nggwei kibor bijo ninno drek dip tungwatu nya di ibit ahyet bi.

tuhan nikos tutti nya sren-srau kei

¹³⁷ tuhan e, angon sren-srau ba, Ade nikos tutti nya cem igbit.

¹³⁸ Nicukti di atri tut binye nya hagom sren-srau ba, nddong kei cem.

¹³⁹ Dingon sibui sut siceu nya dem kep hum di sror da lewo yo dima ibbwe ser Ade ningginausi.

¹⁴⁰ Ade nipreu eisi nya micut bi sren! Dem mem gima diba dingon com bidingon ngakei nipreu eisi dima hagom cem!

¹⁴¹ Dibon dinyeng bi ba, tungwatu nya ingwes om kep da cem noro dingon hou ser Ade ningginausi nya bi.

¹⁴² Angon sren-srausi mijo ninno bijo kikau ba, Ade nikos tutti nya nggek-nggek nyen bi sren cem.

¹⁴³ Mun di buhun bibor kin ningon priti tak kep da noro Ade nimbrap tutti nya bindei ba, dingon llei bibor.

¹⁴⁴ Ade nikos tutti nya hagom sren-srau kei bijo ninno bijo kikau. Ma abindei bidingon dor niti leu binhyepo diyaijo.

Nadi nahara mem Allah niteu noniti

¹⁴⁵ tuhan e, diba dingon titut bahara bak Nani. Abuhup dihyet leu api midibit Ade nicukti nya.

¹⁴⁶ Dahara bak Nani leu binhyepo ateu da bidingwes ngun leu api midikrau kep Ade nikos tutti nya.

¹⁴⁷ Dikiju mem njap tekti bidahara mem gima ampu da. Diba dingon com Ade nipreu ei mem dati.

¹⁴⁸ Dibong mai mem mmun jei bi leu binhyepo diba dingon bisrip huk Ade ningginausi nya.

¹⁴⁹ tuhan e, amiap kep dihyet lewo angon ngakei da. Acuon diyaisi drek dip angon sren-srausi.

¹⁵⁰ Yo di isibut nya yuhuk-huk nyen da ba, idideu su. Yo dima igimiap kep Ade nikos tutti nya bi.

¹⁵¹ Noro tuhan e, angat rin simiak da ba, Ade nicukti nya hagom ne igbit ri.

¹⁵² Nipou ne dipikor ei Ade ningginausi di atak buk kep bijo ninghig-niker.

Nadi nahara mem Allah nimpu noti

¹⁵³ Angig ayai kep ditde niwei-nidutti ba, ateu da bidingwes ngun lewo diba diyai ngat Ade nicukti nya bi.

¹⁵⁴ Ambrap gau ditde munhyet ba, akwek da bidiyati kwes. Ateu da bidingwes ngun bit leu Ade nipreu ei mem dati.

¹⁵⁵ Yo di isibut nya mingwes ngun leu mun di buhun tak yok bi lewo igibit Ade nimbrap tutti bi.

¹⁵⁶ tuhan e, angondut tungwatu nyati nindig bibor. Ateu da bidingwes ngun tug hon Ade ningon sren-srausi.

¹⁵⁷ Yo di imang bibor iba nitok bida bihwen bit da noro diba dikou yai Ade nikos tutti nya bi.

¹⁵⁸ Tirigi dingat yo di yaham imbuk kep Na lene dingon mpo tut yok lewo igibit Ade ningginausi bi.

¹⁵⁹ tuhan e, angat i! Dingon ngakei Ade nicukti nya bibor. Ade ningon ngakeisi jo ninghig-niker. Gima rino ateu da bidingwes ngun.

¹⁶⁰ Nihyet Ade nya hagom igbit hak. Ade nikos tutti nya hagom dem kei bijo ninno bijo kikau.

No di ningon gom tut tuhan nicukti nya

¹⁶¹ Yo di inyeng jei nya ihwen bit da mikui-kausi noro dittin tut Ade nikos tutti nya ningkom he.

¹⁶² Ade nipreu eisi nya biyai dingon nggei-hi-nggei dem kep nok no di ttau kep mun di bindei ba, noni nyeng bibor.

¹⁶³ Dingon sibui sut niris mun cig nya yahagom noro dingon ngakei Ade nikos tutti nya.

¹⁶⁴ Dipai sigyo biNani mbimuhwindacan bikwop mmun-njap hagom drek dip Ade nikos tutti nya di sren-srau.

¹⁶⁵ Yo di ingon ngakei Ade nikos tutti nya ijo nyahan ba, ibong kei igwam kei. Hi di bindei ba, icut bi.

¹⁶⁶ tuhan e, dibet dingon mem Ade niteu da bidingwes ngunti bidiyai igbit Ade nicukti nya.

¹⁶⁷ Diba dingon titut bingon ngakei Ade nikos tutti nya bidibit hagom.

¹⁶⁸ Dibit Ade nicukti kin Ade nipingokti nya lewo angat ditde nibon munti nya hagom bou ayai him tu.

Nadi nahara mem Allah nimpu noti

¹⁶⁹ tuhan e, asindui sut ba, ditde nahara Nati hwou bipek Na. Ayai ningon di huk niti bida bit leu Ade nipreu eisi.

¹⁷⁰ Asindui sut ba, ditde nahara Nati hwou bipek Na ug. Ateu da bidingwes ngun bit leu Ade nipreu eisi.

¹⁷¹ Midikon anyeng bikwop mmun-njap hagom lewo angginau da tut Ade nimbrap tutti nya.

¹⁷² Midiba doia bikiek Ade nipreu eisi nya lewo Ade nicukti nya hagom sren-srau kei.

¹⁷³ Ma atin ei ba, ampu da bikwop mmun-njap lewo dikos tut bipia midibit Ade nikos tutti nya.

¹⁷⁴ Diyok dingon mem Ade niteu da bidingwes ngunti. Ade nikos tutti nya biyai dingon nggei-hi-nggei.

¹⁷⁵ Asindui sut ba, diyaijo leu binhyepo dikon anyenga. Ma Ade nimbrap tutti nya hagom mpu da ug.

¹⁷⁶ Disrawir dem kep nok domba di pror. Gima rino akwei ba, anggok Ade awak di dani. Lewo diba diyai ngat Ade nicukti nya bi.