MAZMUR 116 - ALLAH NIHYET MEM TUNGWATU NYA

Tungwagom nggei sut tuhan di teu noni biningwes ngun

¹ Dingon ngakei tuhan lewo Noni ngig nitingou mem dihyet ba, yok ngon kep ditde nadi.

² Noni miap kep dihyet bikwop mpe dino dahara Noni.

³ Mpe di gom ne mun di buhun bibor cut igkep da bikat da ug ei nimai nya ikieti. Diyai ngkek ttin mun di micut igkep da ei jui nsi. Dinghuisi mpig sut bidingon pri tut kikau.

⁴ Lene dahara tuhan “tuhan e, dahara Na leu binhyepo ateu da bidingwes ngun!”

⁵ tuhan singat tut nye ba, ningon sren ba, nyende Allah ngondut nye nindig bibor cem.

⁶ Noni nyohou yo di iba ibou coi mem yam. Tirigi mun di buhun bibor nahanok micut igkep da ne Noni teu da bidingwes ngun.

⁷ Doom dingon lewo tuhan singat tut da nindig bibor.

⁸ Noni teu da bidingwes ngun leu minu nimai nya ide bigwam ser dingon. Noni nyohou da leu api mun nyeng hi bindei timek da bi.

⁹ Gima rino dikan tut bipia tuhan ningat rin bit da mem nijam dino diyaisi jo ei yo di igyaijo nya ikieti.

¹⁰ Mbro nok gino dikan “Mun di buhun bibor buhun tak sa lo, singon jo kep tuhan kikau.”

¹¹ Tirigi dingon tai-tai bou ne dikan “Tungwatu nya yahagom ingon mang. Bit bon siba singon com yok bi sren.”

¹² Midiyai mindei bak tuhan tut Nide nisingat tut dati i?

¹³ Midibon midut niyai ba anggur ngei bak tuhan ba, dibipai sigyo tut gi Noni teu da bidingwes ngun.

¹⁴ Midiyai mun di dipreu ei mem Noni ei Nide limwa nya yahagom yoho bei.

¹⁵ tuhan ningon ngguk tut nide limwa gom di Noni ningon ngakei nimaisi.

¹⁶ tuhan e, dinok Ade awak bidipwoi angon bit leu nok dipmem cem pwoi angona. Akwek da leu nimai tu.

¹⁷ Midibon midut nipai sigyo ba, dingat nadi bak Nani cem.

¹⁸ Midiyai mun di dipreu sut ei bak tuhan ei nide limwa nya yahagom yoho bei,

¹⁹ tirigi idem yam ei mpia di jo bas hak di iba ngug tig bikrop ttai ei Nide Ig ei minu ndig Yerusalem ninggimau yon. Jikwei ba, inggei sut tuhan!