MAZMUR 115 - ALLAH NIHYET MEM TUNGWATU NYA

Doia nibikiek Allah Di Ninyeng Jei Bibor

¹ Suar nyeni ninggei sut Na di tuhan lene ma ninggei sut nyenti bi sren. Lewo Ade ningon ngakei nyeti ug hon nohonti bi sren ba, angon gom cem.

² Nggon rino ngkiai nya ihig ser yam “Ide Allah No ritou i?”

³ Nyeni ide Allah No rima ei gwamti. Noni yai midyai nya bit leu ningon kanti.

⁴ Ngkiai nya iba perak kin mas bibon ide kwar di ikuk yok bak bou inda him.

⁵ Kwar dima yok ibon yuhui noro bit bon imbrap kan bi. Ibon igyai noro bit bon ingat mpia cem kan bi.

⁶ Ibon itingou noro bit bon imiap kan bi. Ibon ihwap noro bit bon itinip ninghap hi kan bi.

⁷ Ibon inda noro bit bon iprios mun nyeng hi kan bi. Ibon imig noro bit bon imbut kan bi. Ibon ikibou noro bit bon ighyet tibim leu yuhui him kan bi.

⁸ Nna ba mun dima yok hagom cut igkep yo di ibon kwar dima yok di iba ingon com nya.

⁹ Je di mben Israel e, ma jiba jingon com tuhan lewo Noni mpu je biya srak ko hagau je.

¹⁰ Je di tuhan de imam nya e, ma jiba jingon com Noni lewo Noni mpu je biya srak ko hagau je.

¹¹ Je di jikuk je bak tuhan jahagom e, ma jiba jingon com Noni lewo Noni mpu je biya srak hagau je.

¹² tuhan yok ngon kep nye binjei mun di kei binye cem. Noni minjei mun di kei bak mben Israel cem nide imam nya yahagom cem.

¹³ Noni minjei mun di kei bak yo di inyeng jei nya kin yo di ibon inyeng bi nya yahagom gino ikon ninyenga.

¹⁴ Ma tuhan bindei ba, jeni kin jide nintun him yamti di bram yam nya idigek kep mpia!

¹⁵ Ma tuhan di pai tes mpia-bbed him kin dihyeisi dini njei mun di kei bak jeni!

¹⁶ tuhan Nongkom nyeng tut mpia-bbed him noro Noni yai dihyeisi dini bak tungwatu nya.

¹⁷ Bit bon yo di imai su nya di yuug ei dihyei jou di bon nimbum-brati inggei sut tuhan kan bi.

¹⁸ Noro nye dino igyaijo ipai sigyo hanyen biNoni mem nijam dini cem kikau ug hon nohonti bi cem. Jikwei ba, inggei sut tuhan!