MAZMUR 108 - ALLAH NIHYET MEM TUNGWATU NYA

Nadi nahara Allahti drek dip siceu nya (Mazmur Kin Doia 57:7-11, 60:5-12)

¹ Doia Daud.

² Allah e, diba dingon com Na bingkiem kei. Midipai doia ba, dibikon anyenga. Dinnei e, akiju!

³ Ditde nggong kin nggong mbrei e, ma jikiju! Lewo midiwin mpia tekti.

⁴ tuhan e, midipai sigyo biNani ei ngkiai nya ikieti. Midipai doia bidibikon anyeng ei tungwatu nya ikieti.

⁵ Lewo angon ngakeisi di ug hon nohonti bi kui sur mpia-bbed him. Angon gomti kui sur bumbuhui nijunti.

⁶ Allah e, ando Ade ninyeng jei biborti ei mpia-bbed him kin Ade nikei-kau-keisi bidem dihyei nisurti-nipekti.

⁷ Aba Ade nisindemti biteu nyeni biningwes ngun lene abuhup nyende nadi cem leu binhyepo yo di angon ngakei yok nya ingwes ngun.

⁸ Allah nihyet tibim kwei leu nigwamti di kwes-kwau bipai “Dimbos-hi-mbos ba, dikwas minu ndig Sikhem kukiau. Midiko bidibinggok tut gima dikwas Mbang Briep Sukot kukiau cem.

⁹ Dinyeng tut hanjop Gilead kin Manasye ba, Efraim ne Ditde topi yeng ngkuong ri. Yehuda ne Ditde tom di ndo tut dinyeng tak kep limwa nyati ri.

¹⁰ Noro minu Moab ne bokor di dipiap dimig eisi ri. Dimbos-hi-mbos tut gino dibindei timek mben Filistea. Midipas Ditde srop ba, dicom bak mben Edom nok bindo bipia dinyeng tut minu dima.”

¹¹ Tou ribuwak da ug ei minu Edom i? Tou rikrau dinda bibie tut da ug ei minu ndig di bon tentara nibousi di inang coi dima i?

¹² Allah e, anjei bit nye ba, akiju ba, ahei sut nyende tentara bi e?

¹³ Ampu nye tirigi nihwen nyende siceu di imbuk tut nye nya lewo tungwatu nya ibon nisindemti mem gima impu nye bi.

¹⁴ Gino Allah tti kin nye lene migyai nisindem ba, mimbri mikui ingkek lewo Noni ribindei timek ide siceu nya.