MAZMUR 107 - ALLAH NIHYET MEM TUNGWATU NYA

NIMPUNG GI NIMUHWI MAZMUR KIN DOIA 107–150 Jikwei ba, ipai sigyo bak tuhan di singat tut nye

¹ Jikwei ba, ipai sigyo bak tuhan di singat tut nye lewo ningon ngakei nyeti ug hon nohonti bi sren!

² Gino Noni teu je leu nikineisi tu ne ma jindat kep nihyet dima ei juhui him.

³ Noni buwak je hanyen kwei leu jingkiaisi ei nite bei mpia nipriti kin nikimbasti kin ei mpia nijjai kin nibiho hagom tu.

⁴ Bihi ite-te nyen bisrawir ei iggum ndigsi bingkwei hanyen kwei ei minu ndig bibong eisi kan bi.

⁵ Yoni inggum ba, inggobiau cem leu api ingon cut leu bihigom tu.

⁶ Tirigi ingon buhun bibor lene ingat nadi bak tuhan leu api Noni teu yok bingwes ngun leu mun di buhun tak yok.

⁷ Lene Noni bie tut yok kak puig di sren kei ug ei minu ttou nsi gom leu binhyepo ibong nyahan eisi.

⁸ Suar yoni ipai sigyo hanyen bak tuhan tut ningon ngakei yokti di ug hon nohonti bi sren kin mindur nya di Noni bon mem yoni cem.

⁹ Lewo Noni yai minyei biyok ba, bicug inggobiausi leu yok leu api kwas njita tut yok bibindei ba, ninggum di hwen yok pren leu yok.

¹⁰ Bihi isima ei nidinditi di dindi-kai. Iba lante biteu yo di isibut nya ba, igyai nidut ei lanteti.

¹¹ Gima cut igkep yok drek dip gi yaham imbuk kep Allah Di Sindem Bibor nicuk yokti nya ba, ikou sut nipingok yoti.

¹² Noni bindei ba, ide midyai di buhun bibor buhun tak yok apino itti ug ei dihyeisi noro hi gingondut yok bi.

¹³ Tirigi ingon buhun bibor ne ingat nadi bak tuhan leu api Noni teu yok bingwes ngun leu mun di buhun tak yok.

¹⁴ Noni buwak yok kwei leu nidinditi di dindi-kai dima bibindei ba, ide lante nya tun bingwig.

¹⁵ Suar ipai sigyo hanyen bak tuhan tut ningon ngakei yokti di ug hon nohonti bi sren kin mindur nya di Noni bon mem yok cem.

¹⁶ Lewo Noni nggek dimbou pmem di iba ngkimom-tembaga bibon ba, dram tom ngkimom nitu di ibahau yam ser kendera mihyeti leu binhyepo kwek Nide limwa nya leu nikineisi.

¹⁷ Bihi intu kep ingon mien paisi bi apino itug ndei inghuisi di dut drek dip ide sisar kin ide nitunggweisi nya di hwen bit yok cem.

¹⁸ Ingon him wei bibindei ba, igyem njita kan bi apino iduhug-duhug nyen.

¹⁹ Tirigi ingon buhun bibor ne ingat nadi bak tuhan leu api Noni teu yok bingwes ngun leu mun di buhun tak yok.

²⁰ Noni ribindei dino ikei hanyen tug hon Nide nicukti nya biteu yok bingwes ngun leu jui nsi.

²¹ Suar ipai sigyo hanyen bak tuhan tut ningon ngakei yokti di ug hon nohonti bi sren kin mindur nya di Noni bon mem yok cem.

²² Suar iba midut nibipai sigyo bikuk yok bak Noni bitri tut niyai munti nya hagom tug hon doia di iba ningon llei bibor bipai.

²³ Bihi itug ndei imuhup tug hon midyai timiei kibar nsi bimbut-mbut nyen ei muk ngwa dip.

²⁴ Ingat tuhan de midyai nya kin Nide mindur nya di Noni bibon ei muk ndigsi brei bou igyai him.

²⁵ Lewo hou di nimig ten bibor cut bibindei ba, muk roi nindig bibor tug hon nihyet di tibim ei tuhan nuhui him.

²⁶ Muk ndigsi di roi nindig bibor bikon kibar kui bicut hanyen ug ei minyei jou bindei ba, timiei kibar nsi nya ingwes mien drek dip ba,

²⁷ ibou sibui lene itti-tti nyen dem kep nok yo di idut kep pes di pu yok. Mbro nok gino igyai kep midyai nok timiei kibar nsi lo, bit bon igyai ibou tut kan bi.

²⁸ Tirigi ingon buhun bibor ne ingat nadi bak tuhan leu api Noni teu yok bingwes ngun leu mun di buhun tak yok.

²⁹ Noni bindei ba, hou di nimig ten bibor kes hon ba, muk ndigsi di roi bibor cut leu api mpia mbum-bra hanyen.

³⁰ Mpia mbum-bra hanyen tu lene timiei kibar nsi nya ingon nggan-triot leu api tuhan buwak yok kikau ug ei muk nuhuisi bit leu ingon kanti.

³¹ Suar yoni ipai sigyo hanyen bak tuhan tut ningon ngakei yokti di ug hon nohonti bi sren kin mindur nya di Noni bon mem yoni cem.

³² Suar itri tut tuhan de nisindemti bak Nide limwa nya ei mpe dino idem yam ei ig mbusyamei bikon ninyeng tirigi igya ei nikei mben Israel nya yoho bei.

³³ tuhan bindei ba, minyei nggram nya pingge hanyen ba, minyei bousi nya biam bu bi.

³⁴ Noni bindei ba, dihyei ninnumti luei nitta binok iggum ndigsi drek dip timiei minu dima ide nisibutti.

³⁵ Noni bindei bu ba, igpong nya tau hak ei iggum ndigsi ba, minyei bousi nya tau hak ei nipingge leusi nya cem.

³⁶ Noni sindui sut ba, yo di inggum ibong timiei ei sirima biwin minu ndig nijep mem yonti.

³⁷ Yoni igyai miai nya ba, ita ba anggur nikioi nya eisi leu api hagom ngat ningat di kei bibor bu.

³⁸ tuhan singat tut yok bibindei ba, idigek kep mpia ba, ide mindhe-ndhe di ighyen kep nya ibep hanyen nok gi dem cem.

³⁹ Tirigi yo di isibut bibor nya ihwen tuhan de limwa nya bitimek lene imangti wer ndig bi bitug ndei mun di buhun tak yok ne,

⁴⁰ Noni om yo di inyeng tak kep yok nya bibindei ba, ite-te nyen bisrawir ei iggum ndigsi di bon puig hi bi.

⁴¹ Noro Noni teu yo di indwau nya bingwes ngun leu ide ningon buhunti bibindei ba, idigek kep mpia dem kep nok domba nya di ibep bisider-wap.

⁴² Yo di ingon sren nya ingat gima yok bou igyai him leu api ingon llei bibor noro yo di isibut nya yahap iji bibuhup kan bi.

⁴³ Dijoi sut gima yo di ingon ki nya ikan-kan nyen tut gima yok hagom ba, iba ingon srip bram tuhan de ningon ngakei nyeti di ug hon nohonti bi sren a.