MATIUS 5 - ALLAH NIHYET MEM TUNGWATU NYA

Yesus tri tut nihyet ei mbigdip di nipieti

¹ Mpe di Yesus cap tungwatu ningot ndig dima lene Noni kui bigwam jug ei mbigdip di nipieti leu api kinyon ei ningginau yokti. Lene yo di ijop bram yahagom ingwig tai Noni ba,

² Noni sindi tri tut nihyet biyok,

Ingon di nggei-hi-nggei

³ “Bikwop yo di ikan tut bipia isindem bi lo, iba ingon com Tuhan he ingon nggei-hi-nggei lewo inggre kin Allah Ninyeng Tak Kepti tu!

⁴ Bikwop yo di ingon ngguk bibor nya ingon nggei-hi-nggei lewo Allah migwam ser ingona!

⁵ Bikwop yo di iba ibou coi mem yam nya ingon nggei-hi-nggei lewo yoni migyai mun di Allah preu ei mem yok!

⁶ Bikwop yo di ijoi sut gima ibit leu Allah ningon kanti mem yok nya ingon nggei-hi-nggei lewo Allah misindem tut yok mem gima!

⁷ Bikwop yo di ingondut yo di hiter nya ingon nggei-hi-nggei lewo Allah mingondut yoni cem bu!

⁸ Bikwop yo di ingon gom nya ingon nggei-hi-nggei leu yoni mingat Allah bou igyai him!

⁹ Bikwop yo di ibakei tungwatu nyati nya ingon nggei-hi-nggei lewo Allah mipai bipia yoni ne nimunggwom bat nya ri!

¹⁰ Bikwop yo di igyai igbit Allah ningon kanti mem yok apino tungwatu nya ihwen bit yok nya ingon nggei-hi-nggei lewo inggre kin Allah Ninyeng Tak Kepti tu!

¹¹ Mpe dino tungwatu nya ipai je kinei cem ihwen bit je cem ikkin kep jinghapti cem drek dip Dani lene ma jingon nggei-hi-nggei.

¹² Lewo tungwatu nya ihwen bit nabi gi nipou nya cem tu. Gima rino ma jingon llei bibor ba, jingon kei bibor cem lewo Allah mitin ei mun di kei bibor ei gwamti mem je yo.”

Ningginausi tut nsim kin mini njeng

¹³ “Jinok nsim mem tungwatu dihyeisi dini hagom. Gino nsim mbum hanyen binyop bi lene bit bon ikinding binyop hanyen kan bi. Nsim dima kinei su apino tungwatu nya icom ba, ico kep hak ug.

¹⁴ Jinok ninjeng mem dihyeisi dini hagom. Gino tungwatu nya iwin minu ndig ei mbigdip lene bit bon iku minu ndig dima bijo nding kan bi.

¹⁵ Tungwatu nya itin mini binjeng lene ikibou kep ninjeng hanyen ei bokor nibehei bi. Noro ikon bikes ei nidihimti leu binhyepo piga digai ig bei hagom.

¹⁶ Jeni cem ma jinok ninjeng di piga digai dihyeisi dini hagom leu binhyepo tungwatu nya ingat jiyai munti di kei bibor nya apino inggei sut Jicig ei gwamti.”

Ningginausi tut Puig Yahudi niggai serti nya

¹⁷ “Harin dima jikan bipia dikwei nggek tut Puig Yahudi niggai serti di tug hon Musa kin mun di nabi nya ingginau je tut a. Dikwei nggek tut mun dima yok bi noro dibindei bipek kep hagom.

¹⁸ Ma jiyok ngon kep bipia ei nijam di mpia-bbed him kin dihyeisi dini pror bigyo ne bit bon hurup mien kin titik di jo ei niggai serti nya dima pror kan bi bibou hagom dem igbit ug e.

¹⁹ Gima rino no di pigau niggai serti dima poi mien leu api ngginau hiter cem tut nok migwam ei nohon keti ei Allah Ninyeng Tak Kepti. Noro no di bit niggai serti dima bingginau hiter cem tut nok miyai ninyeng di jei bibor ei Allah Ninyeng Tak Kepti.

²⁰ Ma jiyok ngon kep bipia gino jingon gom tut niggai serti nya dima dor njiriek guru Puig Yahudi nicukti kin Farisi nya bi lene bit bon jicoi bit Allah Ninyeng Tak Kepti kan bi.”

Ningginausi tut ningon sibui sut tungwatu nyati

²¹ “Jikan tut nicukti di sok kep idigup bat-idigai bat nya bipia harin dima jihwen mun a. No di hwen mun miya ei nikei noho bei ri.

²² Noro tini bu ne Da dipai bije bipia no di ningon sibui sut hiter miya ei nikei noho bei. No di pai hiter kinei miya ei Nikei Puig Yahudi nya yoho bei. No di pai bak hiter ‘Arom ndok!’ dima ningwes ngun leu hum njengti bi.

²³ Gima rino gino jigom tin ei mem gima kwas mun nyeng hi tut Allah leu api kan lo, hiter ningon kwes kin je bi,

²⁴ ne ma jikes mun di jikwas tut Allah dima ei nimbar hum dok leu bibou juug krau yam nda ser nipou ug e leu api jingkwei hanyen bijikwas mun dima tut Allah.

²⁵ Gino jigom yai mun tunggwei sut tungwagom leu api noni kos tut bipia buwak je ug ei nikei noho bei drek dip lene ma jikum ningwam ba, jikrau yam nda ser nipou tirigi jiya ei nikei noho bei bigyo. Gi bi ne noni mikes je ei nikei nindati leu api nikei mikes je ei yo di igya ser nya indati leu api jisima hukum.

²⁶ Ma jiyok ngon kep bipia yoni mikau dimbou pmem ig bui leu je bi bibou jikum ningwam hagom bingwig ug e.”

Ningginausi tut nicut tut hiter nitnemti

²⁷ “Jikan tut nicukti di sok kep nye bipia harin dima jicut tut hiter nitnem a.

²⁸ Noro tini bu ne dipai bije bipia no di ningon pri kep sop hi ba, ningon bisau sut gima cut tut noni lene no dima bon sisar nicut tut sopti ei ningonti ba, ningon mui su.

²⁹ Gino jiyai igdo hi bindei ba, jicut ei sisarti lene ma jiket jiyai njep dima leu ba, jicom ug! Gi kei rino jingut ninggre hi sar hak leu gima jingut titut yam sar ei hum njengti a.

³⁰ Gino jinda com bindei ba, jicut ei sisarti lene ma jirop hak ba, jicom ug. Gi kei rino jingut ninggre hi sar hak leu gima jingut titut yam sar ei hum njengti a.”

Ningginausi tut nikou nitnemti

³¹ “Gima cem nicukti hi sok kep nye ‘Bikwop no di kou nitnem lene ma bon srat di bindo tut nikou sut nitnemti biyai bak nitnem.’

³² Noro tini bu ne dipai bije bipia no di kou nitnem di cut tut hiter bi ne no dima ningon mui. Leu gino nitnem wak nijjep hiter bu ne tungwa dima ribindei dino nitnem cut ei sisar nicut tut yamti. Ba, pinai di wak no pima nitnem micut ei sisar nicut tut yamti sindam.”

Ningginausi tut nehengti

³³ “Jikan tut nicukti di sok kep idigup bat-idigai bat nya bipia harin dima jiluei jingonti tut mun di jeheng tut ei Allah Noho bei a. Noro ma jiyai igbit mun di jeheng tut hagom.

³⁴ Noro tini bu ne dipai bije bipia ma jeheng bitug hon mun nyeng hi au. Ma jeheng bitug hon mpia-bbed him au. Lewo mpia-bbed him ne Allah de banggo mbrei ri.

³⁵ Ma jeheng bitug hon dihyeisi dini au. Lewo dihyeisi dini ne bilen mem Allah nimig ri. Ma jeheng bitug hon minu ndig Yerusalem au. Lewo minu ndig dima ne Nibou Ndig nibongti ri.

³⁶ Ma jeheng bitug hon jibou cem au. Lewo bit bon jibindei jibou nta hi tiei hi mmun cem kan bi.

³⁷ Ma jice hak ‘I’ he lene ma jikou hak ‘Bi’ he. Lewo mun di jibikum bu hagom kwei leu Bilis.”

Ningginausi tut nibuhup hanyen biyamti

³⁸ “Jikan tut nicukti di sok kep nye bipia ma jiba jiyai njep biluei igyai njep lene ma jiba jikwai biluei ikwai.

³⁹ Noro tini bu ne dipai bije bipia harin dima jiba nimbuk bibuhup hanyen tut no di mbuk tut je a. Gino hi ttem jingyoi ei nite bei jinda com lene ma jikiek jingyoi ei nite bei jinda prak bak bittem bu.

⁴⁰ Gino tungwagom kos tut bipia buwak je ug ei nikei noho bei drek dip jide sinsun ninda lene ma jiyai sinsun ninda dima bitut sinsun ndok di jei cem bijibikum bak.

⁴¹ Gino tentara cuk je mem gima jibiang nide minai mbrei bidem kilometer gom lene ma jibiang kikau bidem kilometer can njiriek bu.

⁴² Gino tungwagom hara je tut mun nyeng hi lene ma jiyai binoni hak ug. Gino hi joi sut ppiet jide mun nyeng hi lene ma jirok noni tut au.”

Ningginausi tut ningon ngakei ide siceu nyati

⁴³ “Jikan tut nicukti di sok kep nye bipia ma jingon ngakei jisut bat nya lene ma jingon mpo tut jide siceu nya.

⁴⁴ Noro tini bu ne dipai bije bipia ma jingon ngakei jide siceu nya ba, jingat nadi tindei yo di ihwen bit je,

⁴⁵ leu binhyepo hiter ingat brei bipia jeni ne Jicig Allah ei gwamti nimunggwom bat nya ri. Lewo Noni bindei ba, mpia wam yo di isingat kin yo di isibut nya ba, mpia but mem yo di ingon sren kin yo di ingon rom nya.

⁴⁶ Leu gino jingon ngakei yo di ingon ngakei je he lene mijitug ndei nibiropti di notou leu Allah i? Lewo yo di igya tindei belasten bigyem jimuhup cem igyai nok gima.

⁴⁷ Gino jipigo jisut bat nya he lene jibon munti dima bon ninyeng di notou dor njiriek yo di hiter i? Lewo yo di igwam Allah ninghim cem igyai nok gima!

⁴⁸ Jicig ei gwamti ba ningon di gom bingon ngakei tungwatu nya yahagom. Suar jeni cem jiyai bram niyaisi dima.”