MATIUS 4 - ALLAH NIHYET MEM TUNGWATU NYA

Bilis bingon Yesus

¹ Mpe dima lene Ninnei Gi Kwes bie tut Yesus ug ei iggum ndigsi leu binhyepo Bilis bingon Noni.

² Tirigi Yesus ningat rin ei mpia dima lene Noni yem njita bi kikau mem mmun-njap ningot bitai apino nggum bibor.

³ Lene Bilis kwei pai biNoni “Gino Nani ne Allah Nipmot rin lene ma abindei tig dini yok nok roti.”

⁴ Noro Yesus pai “Allah Nihyet pai ‘Tungwatu nya igyaijo tug hon roti he bi noro tug hon nihyet di tibim ei Allah nuhui him cem.’ ”

⁵ Lene Bilis buwak Yesus ug ei minu ndig Yerusalem mpia di kwes kei lene kes Noni ei Tuhan De Ig biya ig bou ninjek dip anai bibor.

⁶ Bilis cuk Noni “Gino Nani ne Allah Nipmot rin lene ma anjei Nanti leu nanaisi dini ug ei dihyeisi mu. Lewo Allah Nihyet pai, ‘Allah micuk Nide malaikati nya leu binhyepo inyohou Na bisu inda biteu Na ba, angwes ngun leu gima amig ndei tigya.’ ”

⁷ Lene Yesus pai bu “Allah Nihyet pai ‘Ma jibingon Tuhan di nok jide Allah au.’ ”

⁸ Lene Bilis buwak Yesus ug ei mbigdip anai bibor leu api ndo minu ninyeng tak kepti di jodihyei nisurti-nipekti tut nikei-kausi nya hagom bak.

⁹ Lene pai bak “Gino akuk Na ei dimig him ba, anggei sut da lene midinjei mun dima yok hagom bak Nani.”

¹⁰ Noro Yesus pai bu “Bilis e, aug leu Da hak ug. Lewo Allah Nihyet pai bipia ma jikuk je bak jide Allah ba, jibit Nongkom hak.”

¹¹ Leu api Bilis kes Yesus hak ei lene malaikati nya ikwei nyohou Noni.

Yesus kinyon ei Nide midyaiti ei hanjop Galilea

¹² Tirigi Yesus miap Yohanes ninghapti bipia sima ei ig bui nsi lene Noni ngkwei hanyen ug ei hanjop Galilea,

¹³ bibong ei minu ndig Nazaret bi. Noro ug kikau ba, bong ei minu ndig Kapernaum di jo ei Igpong Galilea nitta ei keret Zebulon kin Naftali itimieisi.

¹⁴ Yesus yai nok gima leu binhyepo dem igbit tto bou mem nabi Yesaya nimbot kepti,

¹⁵ ‘Keret Zebulon kin Naftali di jitimieisi jo tai puig di bie ug ei Igpong Galilea ei Minyei Yordan nite dima ug bitut hanjop Galilea di ngkiai nya ibong eisi e,

¹⁶ mben di ibong ei nidinditi ingat ninjeng nindig bibor! Ninjeng di piga kei piga mem yo di ibong ei minu nindibutti di nimai nya ide tu!’

¹⁷ Mpe dima ne Yesus sindi tri tut nihyet bipai “Ma jittin ser jide sisar ba, jikiek ndam Allah lewo Allah Ninyeng Tak Kepti dideu kwei su!”

Yesus kinyon ei nidimig yo di igya kui Noti

¹⁸ Tirigi Yesus mbut nimig ug ei Igpong Galilea nintig dip lene Noni ngat Simon Petrus kin Andreas nikindig-nikinjoi nya di iba jala bipos wau ei minyeiti lewo gima ne ide midyai di igyai kep nya ri.

¹⁹ Yesus hig yok “Jikwei bit Da leu api midingginau je leu binhyepo jipos tungwatu nya kan.”

²⁰ Tirigi hig nok rino yahacem ikes ide jala bihigom ei leu lene ibit Noni.

²¹ Lene Yesus mbut mbigom kin bu bingat Yakobus kin Yohanes di Zebedeus nipmot bat cin. Yoni ne nikindig-nikinjoi nya ba, ibri ut bit icig bilit kep ide jala. Lene Yesus hig yok kwei.

²² Leu api ikes icig kin ide ut bihigom ei leu lene ibit Noni.

Yesus ngginau tungwatu nya bitri tut nihyet lene bindei ba, yo di inggwen ikei hanyen cem

²³ Yesus mbut nimig bidem hanjop Galilea hagom ba, ngginau mben Yahudi ei ide ig mbusyameisi bitri tut Nihyet Di Kei tut Allah Ninyeng Tak Kepti lene bindei ba, yo di inggwen ninyeng hagom ikei hanyen cem.

²⁴ Gima rino ninghapti tibim bidem hanjop Siria nisurti-nipekti apino tungwatu nya ibuwak yo di inggwen kin yo di imai-mai nyen kin yo di ninnei rom ya ingonti kin yo di ibuwei kin yo di las hwen yok cem hagom kwei leu api Noni bindei ba, ikei hanyen.

²⁵ Tungwatu nya ningot ndig leu hanjop Galilea kin Minu Ndig Ttou Nsi Simnai kin minu ndig Yerusalem kin hanjop Yudea kin minu di jo ei Minyei Yordan nite dima ug yahagom ijop bram Noni.