MATIUS 27 - ALLAH NIHYET MEM TUNGWATU NYA

Ibuwak Yesus ug ei Pilatus noho bei

¹ Njap bigyoti ne imam nindig nya kin nibou mben Yahudi nya yahagom isimbot kep Yesus ninghapti biyam leu binhyepo ijem nimai gau Noni.

² Iba lante biteu nimig ninda leu api ibuwak biyuug sut bikes ei Pilatus di Kaisar ta nok nibou mem minu dima nindati.

Yudas nimaisi

³ Tirigi Yudas di tri Yesus ngat lo, nibou nya ijem nimai gau Yesus lene noni nso nonti tut niyai munti bitug mitiei di buhun nitig ningot ningai hanyen bak imam nindig nya kin nibou mben Yahudi nya,

⁴ bipai biyok “Dibon sisar tug hon gi ditri No di ningon ngun pima apino Noni miyai nimai drek dip!” Noro ibuhup “Nyeni ningon a tut gima bi. Suar abiang ayai munti dima nibuhunti hak ug!”

⁵ Yudas com mitiei pima bigimahap ei Tuhan De Ig leu api ug leu lene ba kuk bisrou nikimam bimai.

⁶ Imam nindig nya imbus mitiei dima keyam leu api isimbot kep biyam tut bipai “Mitiei dini ne mitiei rindin ri. Allah niggai serti pai ser nye bipia ma nicom mitiei rindin ei brua mem munkwas di jo ei Tuhan De Igti au.”

⁷ Gima rino ihig yam tut rindin dima mbigom kin bu bice tut yam leu api ibipek jui dip gom di ninyeng rino Hanjop Tukan Igtuyap. Gima ne mpia ttou nsi gom di tungwatu nya itig ngkiai nya eisi ri.

⁸ Tungwatu nya ijem mpia ttou nsi dima ninyeng “Gumihyep Ninggrom Siber Eisi” ba, ninyeng dima jo kikau kwei bipek ammani kep.

⁹ Gima hagom pek kep bit leu nok nabi Yeremia nipaisi “Igyai mitiei di buhun nitig ningot ningai ba, mitiei dima ne nimangti di mben Israel ice tut nok rindin mem Noni ri.”

¹⁰ Lene iba mitiei dima bipek Hanjop Tukan Igtuyap. Tuhan pingok dingonti tut nihyet dima.

Pilatus hig simber Yesus

¹¹ Tirigi Yesus ya ei Pilatus di nibou minu dima noho bei lene Pilatus hig ser Noni “Nani ne Nibou Ndig mem mben Yahudi rin e?” Leu api Yesus buhup “Bit leu nok apaisi dima.”

¹² Noro tirigi imam nindig nya kin nibou mben Yahudi nya ikkin kep Yesus ninghapti tut mun nyeng mang bibor lene Yesus birop ighyet bi.

¹³ Gima rino Pilatus hig ser Noni “Amiap mun nyeng mang bibor di ikkin kep anghapti tut dima bi e?”

¹⁴ Noro Yesus birop ighyet bi. Gima rino nibou dima nga leu tut Noni nindig bibor.

Pilatus jem nimai gau Yesus

¹⁵ Bikwop mpe dino mben Yahudi ibon pesta kep Njap Ndig Paskah ne nibou Roma kes tungwagom leu ig bui nsi mem yok bit leu ingon kanti.

¹⁶ Mpe dima ne tungwagom di sima di ninyeng Yesus Barabas di tungwatu nya yahagom ikan tut noni.

¹⁷ Gima rino tirigi tungwatu ningot ndig idem yam lene Pilatus hig ser yok “Jindo igbit no di dikes mem je bit leu jingon kanti. Dikes Yesus Barabas e, he dikes Yesus di ijem ninyeng Nibou Ndig di teu tungwatu nya biyai niyaijo nijep biyok e?”

¹⁸ Pilatus hig singgre yok nok gima lewo kan tut bipia nibou mben Yahudi nya ikes Yesus ei nindati kin ingon di kinei sut Noni.

¹⁹ Tirigi Pilatus gwam ser nide kintrorti di mbus tungwatu nya ingonti eisi lene nitnem sok nihyet kwei mem noni bipai “Ma apriet no di ningon ngun dima au. Lewo dingon hukti tut mun di dimumpriem tut Noni mem himmun di aponi.”

²⁰ Noro imam nindig nya kin nibou mben Yahudi nya ikes ingon di mbuk tut Yesus bak tungwatu ningot ndig dima yok leu binhyepo yahara Pilatus bipia kes Barabas leu ig bui nsi mem yok leu api jem nimai gau Yesus.

²¹ Lene Pilatus hig ser yok “Jindo igbit no di jijoi sut dikes hak mem je.” Lene ibuhup “Barabas.”

²² Leu api noni hig ser yok “Dinggon ndei Yesus di ijem ninyeng Nibou Ndig di teu tungwatu nya biyai niyaijo nijep biyok i?” Lene yahagom ibuhup “Apek Noni ei biei salibti!”

²³ Noro Pilatus hig ser yok bu “Noni yai mun tunggwei mindei i?” Lene yoni iba ighyet di kui yam mbrua ser noni bipai “Apek Noni ei biei salibti!”

²⁴ Ningwigsi rino Pilatus kan tut bipia bit bon kimut ninda kep yok kan bi ba, mbigom yahagom iba imbuk ibigen ser noni ug ri. Gima rino noni tau minyei bipiap ninda ser ei yahagom igyai him bipai biyok “Dingon ngun. Midibiang nibuhunti tut No dini ninggrom bi noro jeni rino jibiang nibuhunti.”

²⁵ Yahagom ice “Yo, nyeni kin nyeni nimunggwom bat nya minibiang nibuhunti tut ninggrom.”

²⁶ Gima rino Pilatus kes Barabas leu ig bui nsi bit leu yo dima ingon kanti lene kes Yesus ei nide tentara nya indati leu binhyepo imbas Noni nipou leu api ipek ei biei salibti.

Tentara nya iba ighyet bicig Yesus

²⁷ Leu api Pilatus de tentara nya ibuwak Yesus ug ei nibou Roma de biyati lene tentara nindigsi nimpung gom induk yam bingwig ttai Noni.

²⁸ Ijuk Nide sinsun leu Noni leu api iba sinsun ndok di jei di ningwoi bijuk Noni.

²⁹ Inghau cibou nggwen cem ba, ibijuk nibou bittin nok topi bigyai tom bikrau ei ninda com ba, ikuk yok ei nimig him cem. Iba ighyet bicig Noni bipai bak “Na di Nibou Ndig mben Yahudi e, ma ayaijo kikau ug!”

³⁰ Itrai ndei Noni biba Nide tom bibui nibou cem.

³¹ Tirigi iba ighyet bicig Noni bingwig leu lene ijuk sinsun ngwoi di ndok di jei leu Noni leu api ijuk Nide sinsun ei Noniti hanyen. Leu api yehei sut Noni leu binhyepo ipek Noni ei biei salibti.

Tentara nya ipek Yesus ei biei salibti

³² Tirigi ibuwak Yesus biyuug cut puig sinon lene yuum Simon leu Kirene. Ikat noni bikes Yesus de biei salib ei ninghat dip bittei.

³³ Leu api yuug krau Golgota. Iba nihyet Yunani bijem ninyeng “Gumihyep Nimbiam Bou”.

³⁴ Yuhug ba anggur ngei kin mun di mpo-mpam srigsi biNoni bidut ei sirima noro Noni piei mbigom lene bikou.

³⁵ Ipek Noni ei biei salibti leu api iko bibinggok tut gima ikwas Nide sinsun tut yam.

³⁶ Gima ngwig leu lene igwam ser Noni.

³⁷ Ipek srat meng gom di ipas Nide hukum eisi anai nibou. Nipas kepti pai “No dini ne Yesus di Nibou Ndig mben Yahudi ri”.

³⁸ Ipek yo di isibut nya ibou can kin bu kin ide biei salib bitas hi ei nite bei Yesus ninda com lene hi ei nite bei ninda prak.

³⁹ Yo di injiriek mpia ttou nsi dima ighyet wer mpiahi tut Yesus ba, ikit-kit nyen ibou leu Noni.

⁴⁰ Ipai biNoni “Apo apai bipia alet Tuhan De Ig leu api angot hanyen ei njap ningai e? Gino Nani ne Allah Nipmot nijit-jau rin lene ma ateu Nanti ba, ajuk kwei leu biei salib hak ug.”

⁴¹ Nok gima cem imam nindig nya kin guru Puig Yahudi nicukti nya iba ighyet bicig Noni bu,

⁴² bipai “Noni teu yo di hiter noro bit bon teu Nonti biningwes ngun kan bi. Noni ne Nibou Ndig mem mben Israel rin e? Gino juk kwei leu biei salib nogindini lene ningon jo kep Noni.

⁴³ Noni ba ningon com Allah lene pai sut Nonti bipia Noni ne Allah Nipmot ri. Gi nok ne itou kep gino Allah miteu Noni biningwes ngun nogindini e?”

⁴⁴ Nok gima cem yo cin di isibut di ipek yok ei biei salibti simiak Yesus iba ighyet bicig Noni bu.

Yesus nimaisi

⁴⁵ Ug ei mpia huk pijum rino mmun ken nggai kep minu dima hagom lene mpia njap com bi kikau mem jam nitindur ningai.

⁴⁶ Bui jam ningai rino Yesus ba nihyet nindig bahara “Eli, Eli, lama sabakhtani.” Ikiek nihyet dini lene nibimbiti pai “Ditde Allah e, Ditde Allah e, akes Da ei leu binggon i?”

⁴⁷ Ibou poi di igya-ya nyen ei mpia dima imiap naharati lene ipai biyam “Noni hig Nabi Elia kwei.”

⁴⁸ Tungwagom bipbur buug yai aigmui mbom tut ba anggur ngei di hyenha di joti kwei lene hak ei pikati bipi bisu bak Yesus leu binhyepo muhun.

⁴⁹ Noro hiter itte tut bipai “Ayai au. Itou kep ma Nabi Elia kwei teu Noni leu biei salib biningwes ngun ug e?”

⁵⁰ Leu api Yesus ba nihyet nindig bahara mbigom bu leu api ninnei kimbas.

⁵¹ Ban mbrawin di ipindur ei Tuhan De Ig rik hacan bipek guhu bipek gimu. Dihyei mun brim ba, hak cem ki hacan.

⁵² Jui dip nya cem kau leu yo di ingon jo kep di imai su nya leu api yonti njem ikiju hanyen leu imai eisi.

⁵³ Yo dini yehei leu jui nsi ba, igwam bibou Yesus kiju hanyen leu nimai eisi nipou ug e leu api icoi ug ei Yerusalem apino tungwatu nya imang bibor ingat yok bou igyai him.

⁵⁴ Tirigi nibou tentara kin nide limwa nya di igya ser Yesus ingat dihyei mun brim kin mun di hagom di bitimon yok cem lene inghuisi mpig sut nindig bibor bipai biyam “Ningat ne No dini Allah Nipmot nijit-jau ri!”

⁵⁵ Ei mpia dima cem sop nya imang bibor icap leu minu ting. Sop dini yok ibit Yesus kwei leu Galilea binyohou Noni.

⁵⁶ Yoni inyeng rino Maria Magdalena kin Maria di Yakobus Yusuf nya ipmem kin Zebedeus nipmot bat cin ipmem.

Itig Yesus ningut

⁵⁷ Yusuf di nyeng bibor kwei leu minu mien Arimatea mem mmunti. No dini ningon jo kep Yesus.

⁵⁸ Noni coi ug ei Pilatus noho bei bahara noni leu binhyepo kes Yesus ningut binoni. Pilatus ce tut ba, cuk nide limwa nya leu binhyepo icug Yesus ningut bak.

⁵⁹ Gima rino Yusuf kon ningut buug sut leu api ba sre jep di iba minghas linen bibon binggai.

⁶⁰ Leu lene noni kon ningut ei nide jui di noni tu ei tring behei di tig nimai eisi bigyo leu api rim tig mma nindig bibor bitas ser jui nuhui lene mbut leu.

⁶¹ Mpe dima cem Maria Magdalena kin Maria hiter igwam dideu mpia ttou nsi dima bicap jui dip.

Prisi mben Yahudi igya ser jui dip

⁶² Njap di hyep bu ei Njap Nigwam Kep Ninghuisi lene imam nindig nya kin Farisi nya induk yam kwei ei Pilatus noho bei,

⁶³ bipai binoni “Andigpoi e, nikan kep bipia tirigi niris mun cig pima niyaisi jo yo ne pai bak tungwatu nya ‘Njap ningai bu ne mporo dikiju hanyen leu dimai eisi.’

⁶⁴ Gima rino ma acuk ade tentara nya leu binhyepo igya ser jui dip kikau mem njap ningai leu binhyepo bit bon yo di igya kui Noni ikwei ket ningut hanyen leu jui nsi kan bi. Gi bi ne mbigom yoni mitri tut bipia Noni kiju hanyen leu nimai eisi tu. Gi nok lene niris bak tungwatu nya ei ningwigsi mikinei bibor dor njiriek niris yok gi nipou pima.”

⁶⁵ Pilatus ce “Jide tentara nya yo rinaha. Ma jibuwak ibou poi ba, yuug ya ser jui dip bit leu jingon kanti hak ug.”

⁶⁶ Gima rino imbut biyuug ei jui dip lene iba lilin ngei kin kuk mbrei bikingkrai tig mma ser leu api ikes tentara nya bigya ser nhyema hi kwei nggek tut jui dip bi.