MATIUS 25 - ALLAH NIHYET MEM TUNGWATU NYA

Nihyet nibiti nindati tut sop gwam nitta pilei nya ibou simnai

¹ “Allah Ninyeng Tak Kepti rinok mun di pek kep mem sop gwam nitta pilei nya ibou simnai di igyai ide mini ninjeng lene yuug um pinai di buwak nitnem nikweisi.

² Sop gwam nitta pilei dima yok ibou muhwi ingon mbum lene ibou muhwi ingon ki.

³ Gi hi di ingon mbum nya ittei ide mini ninjeng noro ipwoi mini niken hi bikwei sut bi.

⁴ Ibou muhwi di ingon ki nya ipwoi mini ampou nuut gom kin bu mem ide mini ninjeng.

⁵ No di ug buwak nitnem dima kwei sisip bi apino sop nya yahagom igyai nggrop buhun bibong mai leu.

⁶ Mmun mau rino nihyet gom tibim kwei bipai ‘Pinai di kwei buwak nitnem kwei su ba, jiya um noni o!’

⁷ Lene sop gwam nitta pilei ibou simnai dima yahagom ida igyai bikiju leu api itin ide mini noyam.

⁸ Gi hi di ingon mbum nya yahara gi hi di ingon ki nya ‘Juhug mini niken hi binye lewo nitin nyende mini noro njeng bi.’

⁹ Sop di ingon ki nya ibuhup ‘E bi! Lewo mini niken dini dem mem yahagom bi. Juug ba, jipek mini mem jenti ei kiosti.’

¹⁰ Yoni yuug pek mini mem yonti sri leu lo, pinai di kwei buwak nitnem ttau kep sop ibou muhwi di ingon ki nya leu api icoi ug ei ig bei bit noni. Leu lene dimbou nggam bingkiem.

¹¹ Ariman bu lene sop nindigsi nya ikwei krau leu api yahara ‘Andigpoi e, akau dimbou leu nyeni cem.’

¹² Noro noni buhup ‘E bi! Dikan tut je bi!’ ”

¹³ Lene Yesus pai ningwigsi kep bisok kep yok “Gima rino ma jiyai ngkiem lewo jikan tut tto bou mem njap kin jam nidemti bi.”

Nihyet nibiti nindati tut awak nya ibou ningai

¹⁴ “Mpe dino Munggwom Tungwatu Nipmot kwei sut ninyeng Tuhan lene nipek kep mem tungwatu nyati rinok nihyet nibiti nindati dini. Andigpoi gom tin ei bimbut ug ei minu ting. Gima rino noni nduk nide awak nya kwei lene ba ningon com yok tut nide mitiei di kwas tut yok.

¹⁵ Noni kwas mitiei mas sribu muhwi tut tungwagom lene kwas mitiei mas sribu can tut tungwagom bu lene kwas mitiei mas sribu gom tut tungwagom bu. Hagom bit leu nok ide nijoi biborti. Leu api noni mbut leu.

¹⁶ Awak di yai mitiei mas sribu muhwi ba mitiei dima bipek mun bitri lene biyai mitiei mas sribu muhwi bikum eisi bu.

¹⁷ Nok gima cem tut awak di yai mitiei mas sribu can ba mitiei dima bipek mun bitri lene biyai mitiei mas sribu can bikum eisi bu.

¹⁸ Noro awak di yai mitiei mas sribu gom ne ug ba, tig niceu nide mitiei ei dihyeiti.

¹⁹ Mimbrek-mimbrek bu lene iceu kwei ttau hanyen kep yok leu api hig bram yok tut nide mitiei ngwam di jo biyok.

²⁰ Awak di yai mitiei mas sribu muhwi pwoi mitiei mas sribu simnai kwei bipai ‘Andigpoi e, akwas mitiei mas sribu muhwi tut da lo, diba mitiei mas sribu muhwi bikum eisi bu.’

²¹ Niceu buhup ‘Ayai mun di igbit. Nani ne awak di kei di angon gom ri. Ajoi bibor tut mitiei mien. Gima rino midiba dingon com nani tut mun di nindig bibor bu. Akwei gwam bit da ba, sillei ngwig sut yam.’

²² Lene awak di yai mitiei mas sribu can cem pwoi mitiei mas sribu bitai kwei bipai ‘Andigpoi e, akwas mitiei mas sribu can tut da lo, diba mitiei mas sribu can bikum eisi bu.’

²³ Lene niceu buhup ‘Ayai mun di igbit. Nani ne awak di kei di angon gom ri. Ajoi bibor tut mitiei mien. Gima rino midiba dingon com nani tut mun di nindig bibor bu. Akwei gwam bit da ba, sillei ngwig sut yam.’

²⁴ Lene awak di yai mitiei mas sribu gom cem coi kwei bipai ‘Andigpoi e, dikan tut bipia asibut bibor. Lewo apuk biei ngat di ata bi ba, aket gandum di ahap bi cem.

²⁵ Dinghuisi mpig sut Andigpoi. Gima rino duug tig ade mitiei ei dihyeiti. Ditug ade mitiei dini hanyen bina.’

²⁶ Andigpoi buhup ‘Nani ne awak di sibut bibor di nghen cem ri! Akan tut bipia dipuk biei ngat di dita bi bidiket gandum di dahap bi e?

²⁷ Gino akan tut da nok lene nggon rino acom ditde mitiei ei bankti leu binhyepo nibou bank mitug ditde mitiei hanyen bikum ei nibitugsi mem dikwei hanyenti bi i?’

²⁸ Lene noni cuk nide awak nya ‘jipos mitiei leu noni leu api jiyai bak no di tug ndei nimangti ug ei mitiei mas sribu simnai.

²⁹ Lewo midikum eisi bak no di nyohou mun di jo binoni apino noni nyeng tut mang bibor. Noro midipos niken hanyen leu no di nyeng tut mun nyeng hi bi.

³⁰ Ma jinjei awak di sibut dini kikau ug ei nidinditi di jo nisai ma kwei. Noni mipim ba, mitug ndei ninghuisi wei ei mpia dima.’ ”

Munggwom Tungwatu Nipmot mbus ingonti ei Njap Ningwig Honti

³¹ “Tirigi Munggwom Tungwatu Nipmot mikwei hanyen nok Nibou Ndig bitut malaikat nya yahagom cem lene Noni migwam ei Nide banggo mbrei di kei-kau-keiti.

³² Leu api tungwatu dihyeisi dini yahagom midem yam bigya ei nimig him. Lene Noni mikwas yok ei nimpung can bit leu nok gembala di kwas domba nya bigya ter leu kambir nya.

³³ Yo di igyai igbit Allah ningon kanti igya keyam kui ninda com lene nindigsi nya migya keyam kui ninda prak.

³⁴ Leu api Nibou Ndig dima mipai bak yo di igya kui ninda com ‘He je di Dicig singat tut jeni e, jikwei coi bit Allah Ninyeng Di Tak Kepti di Noni tin ei mem je habiei ei nimbie him tirigi Noni pai tes dihyeisi bitut mun di joti nya.

³⁵ Lewo tirigino dinggum lene jikwas njita hi tut Da. Tirigino dinggobiau lene jitin kau tut minyei hi biDa. Tirigino dinok ngkiai lene jicigit Da kui ig.

³⁶ Tirigino Ditde sinsun rik-ta lene jijuk jide sinsun ei Dati. Tirigino dinggwen lene jinyohou Da. Tirigino disima lene jikwei cem kep Da.’

³⁷ Lene yo di ingon sren di igya kui ninda com ihig ser Noni ‘Tuhan e, mpe di pitou rino ningat Nani anggum ba, nikwas njita tut Na i? Mpe di pitou rino ningat Nani anggobiau ba, nitin kau tut minyei biNa i?

³⁸ Mpe di pitou rino ningat Nani nok ngkiai lo, nicigit Na kui ig i? Mpe di pitou rino ningat Ade sinsun rik-ta ba, nijuk nyende sinsun ei nati i?

³⁹ Mpe di pitou rino ningat Nani anggwen ba, asima cem ba, nihwou mpu Na i?’

⁴⁰ Nibou Ndig mibuhup ‘Ma jiyok ngon kep bipia tirigi jingondut dikinjoi bat di ibon inyeng bi sren dini yok lene gima dem kep nok jingondut Dani!’

⁴¹ Lene Noni pai bak yo di igya kui ninda prak ‘Juug bihigom leu Doho bei lewo Allah mbriom je tu! Juug dor kikau ug ei hum di bit bon hi mu kan bi di Allah tin ei mem Bilis kin nide malaikati nya!

⁴² Lewo tirigino dinggum lene jikwas njita hi tut Da bi. Tirigino dinggobiau lene jitin kau tut minyei hi biDa bi.

⁴³ Tirigino dinok ngkiai lene jicigit Da kui ig bi. Tirigino Ditde sinsun rik-ta lene jijuk jide sinsun ei Dati bi. Tirigino dinggum ba, disima cem lene jihwou mpu Da bi.’

⁴⁴ Lene yoni ibuhup ‘Tuhan e, mpe di pitou rino ningat Nani anggum cem anggobiau cem anok ngkiai cem Ade sinsun rik-ta cem anggwen cem asima cem pima lene ningondut Na bi i?’

⁴⁵ Nibou Ndig buhup ‘Ma jiyok ngon kep bipia tirigi jingondut dikinjoi bat di ibon inyeng bi sren dini yok bi lene gima dem kep nok jingondut Da cem bi.’

⁴⁶ Gima rino yo dini itug ndei hukum di jo kikau noro yo di igyai igbit Allah ningon kanti icoi ug ei niyaijo nijep di jo kikauti.”