MATIUS 23 - ALLAH NIHYET MEM TUNGWATU NYA

Yesus nisok kep yokti tut guru Puig Yahudi nicukti nya kin Farisi nya

¹ Lene Yesus tri tut nihyet bak tungwatu ningot ndig kin yo di igya kui Noni,

² bipai biyok “Guru Puig Yahudi nicukti nya kin Farisi nya igya luei Musa nohoti ba, ingginau je tut nicukti di tug hon noni.

³ Gima rino ma jice tut bijibit nicukti di itri tut nya hagom. Noro ma jiyai bram igyai kepti nya au. Lewo igyai kepti nya tte tut ide ningginau jeti nya.

⁴ Ibidip huk tungwatu nya tut mun di nggruk bibor ba, itri tut nidimig sutti nya di buhun tak yok noro isu inda bikon tut yok bi.

⁵ Igyai kep igyai kepti nya hagom brei bou tungwatu nya igyai him he. Ikui li ba, indei miep ho di ayat joti nya binap ninggrun di jei bibor bindun him ide sinsun ndok di jei ninghas him cem,

⁶ igwam bibie mem njita di tungwatu nya ingei ei pestati lene igwam bilen dip kui nimbar ei jide ig mbusyameisi ba,

⁷ ingon llei sut gino tungwatu nya ibou cut biyok ei biyati bindat kep inyeng ‘Guru.’

⁸ Noro ma jibidip huk tungwatu nya leu binhyepo ijem jinyeng ‘Guru’ au. Lewo jahagom jikinjoi bat yam ba, jibon jide Guru gom ngat.

⁹ Ma jijem tungwatu dihyeisi hi ninyeng Arig cem au. Lewo jibon Jicig gom ngat ba, No rinaha ei gwamti.

¹⁰ Nok gima cem ma jibidip huk tungwatu nya leu binhyepo ijem jinyeng ‘Nibou’ au. Lewo jibon jide Nibou gom ngat ba, Noni ne Nibou Ndig di teu tungwatu nya biyai niyaijo nijep biyok ri.

¹¹ Suar no di ninyeng jei ei jikieti om no nok awak mem nindigsi nya.

¹² Lewo Allah om kep no di yok ningon mem ninyeng di jei noro kon bikwop no di om kep ningonti ninyenga.

Yesus pai kep guru Puig Yahudi nicukti nya kin Farisi nya drek dip ingon canti

¹³ Aye! Notou mem je di guru Puig Yahudi nicukti nya kin je di Farisi nya i? Jingon can yo! Lewo jibigen ser dimbou di bie ug ei Allah Ninyeng Tak Kepti. Jenti jicoi kak dimbou hui dima bi lene jibigen ser yo di ijoi sut icoi nya. [

¹⁴ Aye! Notou mem je di guru Puig Yahudi nicukti nya kin je di Farisi nya i? Jingon can yo! Lewo jiris sop kibom nya ba, jipos ide ig tut mun di joti nya hagom. Leu api jibiti ninda tut jingon srenti tug hon nadi di juhuk kikau. Gini yok hagom bindei dino mijitug ndei hukum nindig bibor!]

¹⁵ Aye! Notou mem je di guru Puig Yahudi nicukti nya kin je di Farisi nya i? Jingon can yo! Lewo jimbut bidem dihyei nisurti-nipekti ba, jisigon minyei mang bibor leu binhyepo jinggok tungwagom ngat di mitti kin je bibit jide puig timiei leu api jipingok ningonti bijibindei ba, ningon wer mui mbican bram yam dor njiriek je di juug dor humti jingon di mui!

¹⁶ Aye! Notou mem je di jinok nibou di niyai tu i? Lewo jitri tut ‘Gino tungwagom heng bitug hon Tuhan De Ig noro luei ningonti tut hanyen lene buhun bi. Noro tut no di heng bitug hon mas di jo ei Tuhan De Igti lene suar noni yai igbit nihengti dima biluei ningonti tut hanyen bi.’

¹⁷ Jingon mbum ba, jiyai tu! Gi tou ribon ninyeng i? Mas e, he Tuhan De Ig di bindei ba, mas dima kwes e?

¹⁸ Nok gima cem jitri tut ‘Gino tungwagom heng bitug hon nimbar hum dok leu api luei ningonti tut hanyen ne buhun bi. Noro tut no di heng bitug hon mindhe di ibui ei nimbar hum dokti ne suar noni yai igbit nehengti dima biluei ningonti tut hanyen bi.’

¹⁹ Jiyai tu! Gi tou ribon ninyeng i? Mindhe di ibui e, he nimbar hum dok di bindei ba, mindhe dima kwes e?

²⁰ Gino tungwagom heng bitug hon nimbar hum dok ne gima noyam kin noni heng bitug hon nimbar hum dok bitut mindhe-ndhe di joti nya cem.

²¹ Gino tungwagom heng bitug hon Tuhan De Ig lene gima noyam kin noni heng bitug hon Ig dima bitut Allah di ningat rin ei Tuhan De Ig dimati cem.

²² Gino tungwagom heng bitug hon gwamti lene gima noyam kin noni heng bitug hon Allah de banggo mbrei bitut No di gwam banggo mbrei dimati cem.

²³ Aye! Notou mem je di guru Puig Yahudi nicukti nya kin je di Farisi nya i? Jingon can yo! Lewo jikwas jide mun di bindei di njita nyop kei gom leu ningot gom tut Allah. Noro jiba jinghim bak mun di bon ninyeng ei Allah niggai serti nok ningon srenti kin ningondut yamti kin ningon gomti. Suar jiyai igbit mun dini yok lene ma jingon prion ser nicukti nya pima cem au.

²⁴ Jinok nibou di niyai tu yo! Lewo jinyohou ser kros gom leu gi mokti noro jiba jingon di mbum bipinde unta ningut gom!

²⁵ Aye! Notou mem je di guru Puig Yahudi nicukti nya kin je di Farisi nya i? Jingon can yo! Lewo jipiap jide mok kin jide den nisai he bipwoi kei noro bei ninsi ne rom-rau bimpung tut mun di jiba jingon di sibut kin jidrui bou ngwakti bipos leu tungwatu nya.

²⁶ Je di Farisi nya e, jiyai tu! Ma jipiap mok kin den ninsi bipwoi kei nipou ug e leu binhyepo nisai cem pwoi kei.

²⁷ Aye! Notou mem je di guru Puig Yahudi nicukti kin je di Farisi nya i? Jingon can yo! Lewo jinok jui dip di iba ap bihwen nisai bingat lo, dia-diau kei noro bei ninsi lene mpung tut nimai njum kin nimbiam ngut di mpiei.

²⁸ Jeni cem jinok gima. Jibon jenti nok yo di ingon sren ei tungwatu nya igyai him noro jingon bei mpiei bimpung tut jingon canti kin jide sisar.”

Yesus pai sut notou Allah mikes hukum ei yo dima dip

²⁹ “Aye! Notou mem je di guru Puig Yahudi nicukti nya kin je di Farisi nya i? Jingon can yo! Lewo jiwin nabi di imai su nya ijui dip bijimau cou tig nya di itas ei jui dip di yo di ingon sren nya ide.

³⁰ Jipai biyam bipia gino jiyaijo ei nijam po jidigup bat-jidigai bat nya igyaijo eisi nipou mimbrek ngan pima ba, ningat ne jikou sut gima jibicom yam bit yok tirigi ikimukep nabi nya.

³¹ Leu api jipaisi dima ndo brei bipia jintun yo di ikimukep nabi pima yok him!

³² Gi nok lene ma jibinut sisar po jidigup bat-jidigai bat nya ikinyon eisi pima bingwig ug e!

³³ Jinok wou nya bijintun wou piet nya him! Notou jingwes ngun leu hukum di micut igkep je ei hum njengti i?

³⁴ Gima rino ma jiyok ngon kep bipia midicuk nabi nya kin yo di ingon ki nya kin guru nya yahagom ndam je noro jikimukep bihi bijipek bihi ei biei salibti cem. Jimbas bihi ei jide ig mbusyameisi bijuhuk yok leu minu ttou nsi hi ug ei minu ttou nsi hi kin bu.

³⁵ Gima hagom nok apino mijitug ndei hukum drek dip yo di ingon ngun nya di tungwatu nya ikimukep yok yahagom ei nimbie him tirigi ikimukep Habel di ningon ngun kikau kwei bipek nijam di je di mben Yahudi jikimukep Zakharia di Berekhya nipmot ei Allah De Ninsi Di Kwes kin nimbar hum dok nikieti.

³⁶ Ma jiyok ngon kep bipia tungwatu nya nijam dini itug ndei hukum drek dip yo dima yahagom imaisi!”

Yesus ningon ngguk tut timiei minu ndig Yerusalem nya

³⁷ “Ayo! Je di timiei minu ndig Yerusalem nya e, jikimukep nabi nya ba, jiba tig bihwen yo di Allah cuk yok kwei ndam je cem. Dipi bidinggriou jahagom bit leu nok kuke di kieng ninyehei gau nimien nya noro jikou sut Da.

³⁸ Gima rino Allah mikes jide minu ndig dini ei ba, dem kep ha ngunti ri.

³⁹ Jimiap e, hon kep ammani kui ne mijingat dingat bou jiyai him bu bi bibou jipai ‘No di kwei tug hon Allah ninyeng ningon nggei-hi-nggei ug e.’ ”