MATIUS 21 - ALLAH NIHYET MEM TUNGWATU NYA

Yesus coi Yerusalem bit yo di ingon llei sut Noni

¹ Tirigi Yesus nya yuug ei dideu Yerusalem ba, yuug krau minu mien Betfage dideu Nungug Tou Zaitun lene Noni cuk yo di igya kui Noni ibou can bidor bibie leu yok.

² Lene bipai biyok “Jug ei minu mien di jitau eisi dima api mijingat keledai niwek di niceu u ei ba, nipmot di nehen pap ya bit. Jipas kuk tut ba, jijem kwei biDa.

³ Gino hi tte tut je lene ma jibuhup ‘Tuhan suar bibri mbigom ug e.’ Gima rino no dima mibrim ningkek bisindui sut ba, jijem keledai cin dima kwei.”

⁴ Mun dini pek kep mem yok dem igbit tto bou mem nabi nipaisi,

⁵ “Ma jipai bak timiei minu ndig Sion bipia Jingat i! Jide nibou ndig hwou ndam je ba, ba nibou coi mem tungwatu nya. Noni bri bigwam keledai ningut gom dip ba, bri bigwam keledai nipmot nehen pap dip.”

⁶ Lene yo cin di igya kui Yesus imbut ba, igyai hagom bit leu nok Yesus nicuk yokti ba,

⁷ ijem keledai ningut gom bitut nipmot nehen pap bingkwei hanyen tut ei Yesus niyati. Lene yo di igya kui Noni iba ide sinsun ndok di jei bijuk kep keledai ninghim leu api Noni bri bigwam dip.

⁸ Tungwatu ningot ndig ingig ide sinsun ndok di jei kak simpak bibingon nok kwo ngig mem nimbutti ba, nindigsi nya itot mpam meng kwei bingig kak simpak bu.

⁹ Tungwatu ningot ndig bihi ibie lene bihi igya abia kep Noni leu api ighyet kui yam bipai “Jikwei ba, inggei sut Daud Nipmot o! Allah e, anjei mun di kei bak No di kwei sut Tuhan de nisindemti o! Jikwei ba, yahagom inggei sut Allah di ningat rin ei ginyo kug o!”

¹⁰ Tirigi Yesus coi kikau ug ei Yerusalem lene timiei nya yahagom ighyet ngwig kep yam bihig yam “Tou rini i?”

¹¹ Tungwatu ningot ndig di ijop bram Noni ibuhup “No dini ne Nabi Yesus di kwei leu Nazaret ei hanjop Galilea ri.”

Yesus coi ug ei Tuhan De Ig

¹² Lene Yesus coi kikau ug ei Tuhan De Ig leu api jji nitri-nipek kep mun cig nya yahagom leu mpia dima. Noni njei bilen di iluei mitiei eisi kin yo di itri hakimoi nya ide bilen hagom ug ei ansan dip.

¹³ Noni pai biyok “Allah Nihyet pai bipia tungwatu nya itri tut bipia Ditde Ig rinok mpia di mem tungwatu nya ingat nadi eisi. Noro jibon ig dini nok hak mihyeti mem ninggimang kep mun cig nya iku yok eisi.”

¹⁴ Mpe dima ne yo di igyai tu nya kin yo di imig-inda hom nya induk yam kwei kep Yesus ei Tuhan De Ig leu api Noni bindei ba, yahagom ikei hanyen.

¹⁵ Noro imam nindig nya kin guru Puig Yahudi nicukti nya ingon sibui sut Yesus tirigi ingat mindur di Noni bibon nya. Ba, ingon sibui sut Noni bu drek dip munggwom nya di igyai nillei ei Tuhan De Ig di ipai “Jinggei sut Daud Nipmot o!”

¹⁶ Gima rino ihig ser Yesus “Amiap mun di tibim ei munggwom dima yok yuhui him e?” Noni ce “Dimiap tu. Jikwop leu Allah Nihyet di pai ‘Angginau munggwom kin ningwoi-ngwoi nya leu binhyepo iba ingon di gom binggei sut Na’ pima bi e?”

¹⁷ Lene Noni kes yok ei minu ndig bingkwei hanyen ug ei Betania bibong ser ig gom ei minu mien dima.

Yesus mbriom biei ara

¹⁸ Njap bigyoti di hyep bu tirigi Yesus kak pui kwei ei Yerusalem lene Noni nggum hapuig,

¹⁹ bicap biei ara ninjem gom di jo ei simpak ninghas buug ngat lo, nimeng nggrou noro ningat ntun him bi. Gima rino Noni mbriom biei dima bipai “Hon kep ammani kui ne ma angat angat bu bi sren.” Hammi tirigi pai bak nok rino biei ara mui hak ug.

²⁰ Tirigi yo di igya kui Yesus ingat niyai munti dima lene inggap leu tut nindig bibor bihig ser Noni “Mindei ribindei dino biei ara dima mui hak nok i?”

²¹ Yesus buhup “Ma jiyok ngon kep bipia gino jiba jingon com Allah ba, jihig jingon eisi bi lene dem mem jiyai bram diyaisi dima ba, jimbriom biei ara hak ug. Nok gima cem mijicuk nungug tou dini ‘Ason leu mpia dini ug ei muk ngeisi.’ Lene dem igbit jipai bakti ri.

²² Gino jiba jingon com Allah tirigi jingat nadi mem mun nyeng hi lene mijiyai mun dima yok.”

Ihig ser Yesus tut Nide nisindemti nikwei leusi

²³ Tirigi Yesus kwei krau Tuhan De Ig hanyen ba, tri tut nihyet lene imam nindig nya kin nibou mben Yahudi nya ikwei hig ser Noni “Mindur di abon pima tug hon tou ninyeng i? Tou risindem tut Na i?”

²⁴ Yesus buhup “Dani cem dihig ser je tut mun nyeng gom. Gino jibuhup igbit lene midibirop bije tut no di sindem tut Da mem dibon mindur nya.

²⁵ Yohanes di tur tungwatu nya ei minyeiti nide nisindemti kwei leu tou i? Allah e, he tungwatu nya e?” Lene isimbot kep biyam tut ninyen bipai biyam “Ibuhup notou? Leu gino ibuhup bipia Allah sindem tut Yohanes lene Noni mibuhup hanyen binye ‘Nggon rino jingon jo kep noni bi i?’

²⁶ Ne gino ibuhup bipia tungwatu nya isindem tut noni lene notou mem nye i? Lewo ittin tut tungwatu nya di ikan bipia Yohanes ne nabi ri.”

²⁷ Gima rino ibuhup “Nikan tut bi.” Leu api Yesus pai biyok “Gi nok lene Dani cem midipai igbit bije tut Ditde nisindemti nikwei leusi bi.”

Nihyet nibiti nindati tut no di bon nipmot ibou can

²⁸ Yesus binut nihyet bipai “Jihig yam tut gini ug e. Tungwagom nipmot ibou can ba, ug pai bak nipmot mighumbou ‘Dipmot na e, njap di ammani ne ma ayai midyai ei ba anggur nghousi.’

²⁹ Lene nipmot srep ‘Dikou.’ Noro ariman bu lene noni luei ningonti buug yai midyai dima.

³⁰ Lene andigpoi dima ug pai bak nipmot nipumiap nok gi pima bu leu api noni ce ‘Arig e, duug yai midyai dima ug ri.’ Noro ug yai igbit nipaisi dima bi.

³¹ Gima rino jindo igbit gi tou riyai igbit nicig nicuk noti i?” Lene imam ndig nya kin nibou mben Yahudi nya ibuhup “Nipmot mighumbou a.” Gima rino Yesus sok kep yok “Ma jiyok ngon kep bipia yo di igya tindei belasten bigyem jimuhup kin sop sundal nya micoi bit Allah Ninyeng Tak Kepti njiriek je.

³² Lewo Yohanes di tur tungwatu nya ei minyeiti kwei tri tut Allah ningon kanti mem tungwatu nya noro jingon jo kep nihyet bi. Noro yo di igya tindei belasten bigyem jimuhup kin sop sundal nya ingon jo kep. Mbro nok gino jingat gima yok hagom bou jiyai him lo, jittin ser jide sisar bijingon jo kep Tuhan bi.”

Nihyet nibiti nindati tut yo di inyohou ba anggur nghousi

³³ Yesus pai biyok “Dipai dihyet nibiti nindati gom kin bu bije. Mpe di gom ne miai ceu gom ug yai midyai ei ba anggur kioisi leu api bon ngug ser ba, heu huk nindig bibor mem gima pot ba anggur ningei eisi. Lene hok ig jibei cem ser. Hagom put tu lene noni ndo midyai dima bak yo di inyohou ba anggur kan ba, ibitug ndei imuhup leu api noni mbut ug ei minu ting leu.

³⁴ Tirigi nijam nipuk ba anggur ningatti dem lene noni cuk nide awak nya ibou poi bingkwei hanyen ba, igyai ningat leu yo di inyohou ba anggur nghousi bitug ndei imuhup.

³⁵ Noro yo dima ikat awak dima yok bibui bihi ba, ihwen bihi lene iba tig hwen bihi.

³⁶ Jei bi lene miai ceu dima cuk nide awak nya ba, imang bibor njiriek yo di nipou po cuk yok pima bu noro yo di inyohou ba anggur nghousi nya igyai bram igyaisi pima tut yok hanyen bu.

³⁷ Jei bi ne noni cuk nipmot buug yok niyai kep yok lewo kan ‘Yo dima mikuk yok bak sipmot ri.’

³⁸ Noro tirigi yo dima ingat igbit nipmot di kwei dima rino yuhum yam nsi bipai ‘No dima ne nipmot ri. Noni miba nokep mun di jo bak nicig hagom. Jikwei ba, ihwen noni leu binhyepo iba nyekep ba anggur nghousi dini.’

³⁹ Gima rino ikat noni binjei noni ug ei ngug sai leu api ihwen.”

⁴⁰ Yesus hig ser yok “Gi nok lene tirigi ba anggur niceu ngkwei hanyen bingat yo dima lene noni minggon ndei yo dima i?”

⁴¹ Yoni ibuhup “Noni miyai nimai bak yo di isibut dima yahagom leu api ndo ba anggur nghousi dima bak yo di hiter di inyohou ba anggur nghousi. Ba, yoni ijoi sut gima igyai ningat hanyen binoni igbit tto bou.”

⁴² Lene Yesus hig ser yok “Jikwop Allah Nihyet di ipas kep bi e? Nihyet dima pai, ‘Tig mma di tukan nya ikou sut bon ninyeng jei dor njiriek tig nindigsi nya. Allah bon mun dini ba, nyeni ingon llei sut nindig bibor!’ ”

⁴³ “Gima rino ma jiyok ngon kep bipia Allah mitug Nide Ninyeng Tak Kepti leu je leu api mikes bak yo di ningat di kei ntun yok him. [

⁴⁴ No di ndrat tig dima minir wap bingwig ba, gino tig dima tot tungwagom lene mitam noni binem-nnai ri.]”

⁴⁵ Tirigi imam nindig nya kin Farisi nya imiap Yesus nihyet nibiti nindati dima lene ikan tut bipia Noni pai singgre yok.

⁴⁶ Gima rino ipi bikat Noni noro ittin tut tungwatu ningot ndig dima di ikan bipia Yesus ne nabi ri.